الماتى وبلىسىندا ەپيدەميالىق احۋال اسقىنىپ بارادى

سانيتارلىق قىزمەتتىڭ باعامداۋىنشا, ىندەت جۇقتىرۋشىلار سانى ادامدار ءجيى شوعىرلانعان قالالار مەن الماتى ماڭىنداعى اۋدانداردا كوبەيگەن ەكەن. ماسەلەن, تالدىقورعان مەن تەكەلى قالالارىندا 13 جاعداي تىركەلسە, مەگاپوليسپەن شەكارالاس جاتقان تالعار اۋدانىندا - 12, ىلە اۋدانىندا – 11, قاراساي اۋدانىندا – 10, ەڭبەكشىقازاق جانە جامبىل اۋداندارىندا 9 تۇرعىننان كوروناۆيرۋس تابىلىپ وتىر. بۇدان بولەك پانفيلوۆ اۋدانىندا 8 ناۋقاس, كوكسۋدە اۋدانىندا 6 ناۋقاس, ەسكەلدى اۋدانىندا  4 ناۋقاس, قاراتال جانە رايىمبەك اۋداندارىندا دا 3 ناۋقاس دارگەرلەردىڭ كومەگىنە جۇگىنگەن. سونداي-اق, ىندەت بەلگىسى انىقتالعان ناۋقاستارمەن بايلانىستا بولعان تاعى 383 ادام انىقتالىپ, ولاردىڭ بارلىعى ءۇي كارانتينىنە جاتقىزىلعان. قازىر وبلىستىڭ مەديتسينا مەكەلەرىندە 1053 ناۋقاس ەم قابىلداۋدا. وكىنىشكە قاراي 25 ناۋقاستىڭ جاعدايى اۋىر  ەكەن. ال سوڭعى بىرەر كۇندە دارىگەرلەر 18 ناۋقاستى ەمدەپ شىعارىپتى.

جالپى, جۇقپالى ىندەتتىڭ جاپپاي تارالۋىنىڭ الدىن الۋ ماقساتىندا ايماقتا بىرقاتار شەكتەۋلەر ەنگىزىلگەن بولاتىن. الايدا, وتكەن تاۋلىكتە تىركەلگەن ناۋقاس سانىنىڭ كۇرت كوبەيۋى قوسىمشا كارانتين ەنگىزۋ ماسەلەسىن كۇن تارتىبىنە شىعارىپ وتىر. بۇل تۋرالى وڭىردەگى ەپيدەميالىق احۋالعا وراي وتكەن ءباسپاسوز ءماسليحاتىندا وبلىس اكىمىنىڭ ورىنباسارى باتىرجان بايجۇمانوۆ تا ايتتى.

- وتكەن ءبىر تاۋلىكتە 104 ادامنىڭ كوروناۆيرۋس جۇقتىرعانى انىقتالىپ وتىر. ماماندار ىندەت تارالۋىنىڭ شارىقتاۋ شەگى ءساۋىر ايىنىڭ العاشقى كۇندەرىنە تۇسپا-تۇس كەلەتىنىن ايتۋدا. دەمەك, كارانتين شەكتەۋلەرىن قاتاڭداتۋعا قاتىستى قوسىمشا شەشىم قابىلداۋىمىز كەرەك. ۆيرۋستىڭ تارالۋىن توقتاتۋ ءۇشىن ءبىز تۇرعىنداردان ادامدار كوپ جينالاتىن ورىندارعا بارۋدان مۇمكىندىگىنشە باس تارتىپ, ۇيدە بولۋدى جانە سىرتقا شىققاندا بەتپەردە  تاعىپ, الەۋمەتتىك قاشىقتىقتى قاتاڭ ساقتاۋدى سۇرايمىز, - دەدى وبلىس اكىمىنىڭ ورىنباسارى باتىرجان بايجۇمانوۆ.

ال ايماقتا جاپپاي ۆاكتسيناتسيالاۋدىڭ ەكىنشى كەزەڭى قارقىندى ءجۇرىپ جاتىر. وسى ماقساتتا رەسەيلىك «سپۋتنيك V» ەكپەسىنىڭ 11 350 دوزاسى جەتكىزىلگەن. بۇگىندە كوروناۆيرۋس ينفەكتسياسىنا قارسى ۆاكتسينا سالۋ وڭىردەگى 30 ەگۋ پۋنكتىندە جۇرگىزىلۋدە. قازىرگە دەيىن 6883 ادامعا ەكپە جاسالعان ەكەن.

- ۆاكتسينا – كوروناۆيرۋس جۇقتىرعان جاعدايدا, دەرتتىڭ اسقىنىپ كەتۋىنەن قورعايدى. ناتيجەسىندە ادامدارعا اۋرۋحاناعا جاتۋدىڭ قاجەتى شامالى بولادى. ياعني, ەكپە سالدىرۋ – اعزانىڭ قورعانىس قابىلەتىن نىعايتادى, - دەيدى بۇل جايىندا وبلىستىق دەنساۋلىق ساقتاۋ باسقارماسىنىڭ باسشىسى ومىرزاق نيازبەكوۆ.

ايتپاقشى, وبلىستىڭ مەديتسينالىق ۇيىمدارى جۇقپالى ىندەتپەن كۇرەسۋگە قاجەتتى جابدىقتارمەن جانە دارىلىك پرەپاراتتارمەن تولىقتاي قامتاماسىز ەتىلگەن ەكەن. بۇگىندە ينفەكتسيالىق ستاتسيونارداعى توسەكتەر سانى 412 ورىنعا دەيىن كوبەيتىلىپ, ولاردىڭ جالپى سانى 1 550 بىرلىككە جەتكىزىلدى. ىندەتتىڭ تارالۋىنا جول بەرمەۋ مەن ەرتە انىقتاۋ ماقساتىندا دا جۇمىس ءجۇرىپ جاتىر. جىل باسىنان بەرى وڭىردە جۇمىس ىستەپ تۇرعان 11 پتر-زەرتحاناسىندا 137 مىڭ ادام  تەست وتكىزىپ, تەكسەرىلگەن كورىنەدى.