كينولوگ قىزمەتىن ەندى باستاعان سقو مامليۋت اۋدانى پوليتسيا ءبولىمىنىڭ ينسپەكتور-كينولوگى الىبەك ءۋاليحانوۆتى جانۋارلارمەن جۇمىس ىستەۋ بالا كەزىنەن قىزىقتىرعان ەكەن. الىبەككە ايماقتاعى ەڭ تاجىريبەلى ء«تورت اياقتى پوليتسەيلەردىڭ» ءبىرى لابرادور-رەتريۆەر اميگو تيگەن. ول ەسىرتكىنى ىزدەۋ باعدارلاماسىنا ۇيرەتىلگەن. بۇرىنعى كينولوگ باسقا اۋدانعا اۋىسىپ كەتكەن سوڭ سوڭعى كەزدەرى اميگو ءماجبۇرلى دەمالىستا ەكەن. وسى يت الىبەك ۋاليحانوۆقا بەرىلگەن ەدى.
جۋىردا جاڭا جۇپقا وزدەرىنىڭ بىلىكتىلىگىن سىناۋدىڭ العاشقى ءساتى ءتۇستى. ءبىر ۇيدە ەسىرتكى ساقتالادى دەگەن جەدەل اقپاراتتى تەكسەرۋ كەزىندە الىبەك اميگونى اۋلانى تەكسەرۋگە پايدالاندى. يت 100 گراممنان استام ماريحۋانا ورالعان پاكەتتىڭ ساقتالعان ورنىن تاۋىپ بەردى. ءسويتىپ العاشقى قادام ءساتتى بولدى.
جىل باسىنان بەرى سولتۇستىك قازاقستان وبلىسىنىڭ پوليتسەيلەرى ەسىرتكى ىزدەۋ ءۇشىن 15 رەت قىزمەتتىك-ىزدەستىرۋ يتتەرىن پايدالاندى. ونىڭ بەسەۋى وڭ ناتيجە بەردى. ءيىس ارقىلى الىنعان ەسىرتكىنىڭ جالپى سالماعى 15 كەلىدەن استى.