اقتاۋدا تۇرار جولدىباەۆتى ەسكە الۋعا ارنالعان دزيۋدودان ەرلەر مەن ايەلدەر اراسىنداعى اشىق ازيا كۋبوگى اياقتالدى. اسكەري ورتالىق سپورت كلۋبىنىڭ نۇسقاۋشى سپورتشىلارى تۋرنيردە ءارتۇرلى دارەجەدەگى ءۇش مەدالدى قانجىعالارىنا بايلادى, دەپ حابارلايدى Egemen.kz قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.
جالپى العاندا جارىسقا اۆستراليا, قازاقستان, قىرعىزستان, رەسەي, تاجىكستان جانە وزبەكستان ەلدەرىنەن 198 سپورتشى قاتىستى.
جارىس قورىتىندىسى بويىنشا 100 كەلىدەن استام سالماق دارەجەسىندە ارميا سپورتشىسى ەفرەيتور ەراسىل قاجىباەۆ چەمپيون اتاندى. اقتىق سىندا ول «قازاقستان بارىسى – 2017» تيتۋلىنىڭ يەگەرى, وتانداسى ەلامان ەرعاليەۆتى جەڭدى. 60 كەلىگە دەيىنگى سالماق دارەجەسىندە وسك سپورت روتاسىنىڭ مەرزىمدى قىزمەت اسكەري قىزمەتشىسى قاتارداعى جاۋىنگەر داۋرەن سيۋكەنوۆ كۇمىس مەدالعا يە بولدى. 100 كەلىدەن جوعارى سالماق دارەجەسىندە ەفرەيتور ءادىل ورازباەۆ قولا جۇلدەگەرى اتاندى.
«مەن جاتتىقتىرۋشىلارىمنىڭ, ارىپتەستەرىمنىڭ جانە دوستارىمنىڭ سەنىمىن اقتاعانىما وتە قۋانىشتىمىن. تالىمگەرلەردىڭ بارلىق تاپسىرمالارىن ورىنداپ, «التىن» جەڭىپ الدىم. 19 ناۋرىزدا اسكەري قىزمەتشىلەر اراسىندا وتەتىن «اسكەر بارىسى – 2021» تيتۋلىنا ىرىكتەۋ تۋرنيرىندە قارۋلى كۇشتەردىڭ نامىسىن قورعاۋعا تىرىسامىن», دەپ ءبولىستى اسكەري سپورتشى ەفرەيتور ەراسىل قاجىباەۆ.
تۇرار جولدىباەۆتى ەسكە الۋعا ارنالعان دزيۋدودان اشىق ازيا كۋبوگى ليتسەنزيالانعان تۋرنير بولىپ تابىلاتىنىن ايتا كەتۋ كەرەك. IJF ەرەجەلەرى بويىنشا تۋرنير چەمپيوندارى مەن جۇلدەگەرلەرى حالىقارالىق دزيۋدو فەدەراتسياسىنىڭ رەيتينگى ەسەبىنە ۇپاي الادى: ءبىرىنشى ورىن – 100 ۇپاي, ەكىنشى ورىن – 60 ۇپاي جانە ءۇشىنشى ورىن – 40 ۇپاي.