قازاقستان مەن رەسەيدىڭ ۆولونتەرلىك ۇيىمدارى كوشباسشىلارىنىڭ قاتىسۋىمەن ۆولونتەرلىق كەڭەستىڭ IV وتىرىسى ءوتتى. ونلاين رەجىمدە ۇيىمداستىرىلعان ءىس-شارانى رەسەيلىك تاراپ ۇيىمداستىردى.
ءىس-شاراعا قازاقستان پارلامەنتى ءماجىلىسىنىڭ دەپۋتاتى ۆەرا كيم, رەسەي ەرىكتىلەر ورتالىقتارى قاۋىمداستىعى كەڭەسى توراعاسىنىڭ ورىنباسارى يۆان رادكو, ەلىمىزدىڭ اقپارات جانە قوعامدىق دامۋ مينيسترلىگى ازاماتتىق قوعام ىستەرى كوميتەتىنىڭ توراعاسى ماديار قوجاحمەت, بۇۇ-نىڭ قازاقستانداعى ەرىكتىلەر باعدارلاماسىنىڭ ۇيلەستىرۋشىسى نيكيتا شاباەۆ, «روسمولودەجا» حالىقارالىق قىزمەتىنىڭ, رەسەي ۆولونتەرلەردىڭ ۇتقىرلىعى ورتالىعىنىڭ, « ۇلى دالا ەلى» قب, «ۇلتتىق ۆولونتەرلىك جەلى» زتب باسشىلارى جانە ەكى مەملەكەتتىڭ ۆولونتەرلىك جانە جاستار ۇيىمدارىنىڭ باسقا دا وكىلدەرى قاتىستى.
كۇن تارتىبىندە بىرلەسكەن جوبالاردى ىسكە اسىرۋ, ىنتىماقتاستىق جوسپارىنا وزگەرىستەر ەنگىزۋ جانە V وتىرىستىڭ مىندەتتەرىن ايقىنداۋ ماسەلەلەرى تالقىلاندى.
كەڭەستىڭ ماقساتى – اقپاراتتىق, ادىستەمەلىك جانە ساراپتامالىق دامۋ تاجىريبەسىن كەڭەيتۋگە باعىتتالعان جاستار جانە ۆولونتەرلەر قوزعالىسىن دامىتۋ سالاسىنداعى ىنتىماقتاستىقتى ۇيىمداستىرۋ.