قازاق جەرىنىڭ تاۋ مەن تاسى, دالاسى مەن ساي-سالاسى, ەڭ اياعى ءبىر تال جۋسانىنىڭ دا وزىندىك تاعىلىم الار تاريحى بار. تەك سونىڭ تەرەڭىنە بويلاپ, تانىمدىق جاعىنان تاڭداي ءبىلىپ, زەرتتەپ, زەردەلەپ ۇرپاققا سىي-سىباعا ەتىپ ۇسىنا الساق جەتىپ جاتىر. وسىنداي يگىلىكتى ىسكە سوڭعى جىلدارى ەلورداداعى “فوليانت” باسپاسى ۇيىتقى بولىپ كەلەدى. “مەنىڭ وتانىم – قازاقستان” سەرياسىمەن جارىق كورگەن رۋحاني قۇندىلىقتار سول سوزىمىزگە دالەل بولسا كەرەك.
ولكەتانۋ تاقىرىبىنداعى تاريحي-تانىمدىق, كوركەمسۋرەتتى, ءىشى-سىرتى وتانىمىزداعى قاسيەتتى ورىنداردىڭ شەجىرەسىن شەرتكەن “ ۇلىتاۋ”, “ويىل”, “ەرەيمەنتاۋ”, “وتىرار” اتتى كولەمدى ەڭبەكتەر وتكەن جىلى جۇرتشىلىق قولىنا تيسە, تاياۋدا بەلگىلى جازۋشى قالاۋبەك تۇرسىنقۇلوۆتىڭ “قازىعۇرت” كىتابى جارىق كوردى. قۇندى دۇنيەگە دەمەۋشىلىك جاساعان ۇلت رۋحانياتىنىڭ جاناشىرى بەكەت تۇرعاراەۆ ەكەنىن ايتا كەتكەنىمىز ءلازىم.
ىرگەلى ەڭبەكتە قازىعۇرت ءوڭىرىنىڭ ارعى-بەرگى تاريحى جۇيەلى جازىلىپ, اڭىز-ءاپسانالاردىڭ بەيمالىم سىرلارى اسەرلى باياندالعان. سوناۋ ىقىلىم زاماندا وسى ولكەنى جانكەشتىلىكپەن تالماي كەزگەن قىتاي جيھانكەزدەرىنىڭ, سونداي-اق كەيىنگى ساياحاتشىلاردىڭ جازبالارىنداعى دەرەكتەر نانىمدىلىعىمەن ەستە قالادى. تۇرىك قاعاناتىنىڭ اقىلمان ارىستارى, ودان بەرگى ۇلى حاندار مەن پاراسات پايىمى, وي ولشەمى بيىك بي-شەشەندەرى, تاريحتا ەل مەن جەرىنىڭ تۇتاستىعىن, حالقىنىڭ بەرەكە-بىرلىگىن ساقتاعان تۇلعالارى جان-جاقتى كورىنىس تاپقان.
وسىنداي ساليقالى كىتاپتىڭ تۇساۋكەسەر ءراسىمى استاناداعى ۇلتتىق كىتاپحانانىڭ ۇيىتقى بولۋىمەن ءوتىپ, جاقسى دۇنيەنىڭ جەتىستىكتەرى تۋرالى كورنەكتى قالامگەرلەر ك.سالىقوۆ, ءا.تارازي, س.ابدراحمانوۆ, سەناتور ع.ەسىم ءسوز سويلەسە, كىتاپ اۆتورىنىڭ جارى ناعيما جەڭگەي كورسەتىلگەن قۇرمەتكە شىنايى ريزاشىلىعىن ءبىلدىردى.
سۇلەيمەن مامەت.