دەنساۋلىق ساقتاۋ ۆيتسە-ءمينيسترى – قر باس مەملەكەتتىك سانيتارلىق دارىگەرى ەرلان قياسوۆ ەلىمىزدە سوڭعى اپتادا كوروناۆيرۋسپەن اۋىرعاندار سانى 12%-عا وسكەنىن ءمالىم ەتتى, دەپ حابارلايدى Egemen.kz.
«قازاقستاندا 17 ناۋرىزداعى جاعداي بويىنشا COVID-19-عا وڭ ناتيجەمەن 226 767 ناۋقاس جانە كۆي- 49 896 جاعداي تىركەلدى. اقپان ايىندا قاڭتارمەن سالىستىرعاندا ناۋقاستار سانى 30%-عا تومەندەگەنى بايقالدى. سونىمەن قاتار سوڭعى 5 كۇن ىشىندە تاۋلىگىنە 1000-نان استام جاعداي انىقتالدى. سوڭعى اپتادا الدىڭعى اپتامەن سالىستىرعاندا ناۋقاستار سانى 12%-عا ءوسۋى بايقالادى», دەدى ە. قياسوۆ.
ونىڭ ايتۋىنشا, قازاقستان جاسىل ايماقتان سارى ايماققا اۋىستىرىلدى. قازىر قىزىل ايماقتا 3 ءوڭىر, نۇر-سۇلتان, الماتى قالالارى جانە باتىس قازاقستان وبلىسى تۇر. اقمولا, الماتى, اتىراۋ, قاراعاندى وبلىستارى سارى ايماقتا, قالعان وبلىستار جاسىل ايماقتا ورنالاسقان.