ونلاين-رەجيمدە, قازاقستان مەن رەسەيدىڭ ۆولونتەرلىك ۇيىمدارى كوشباسشىلارىنىڭ قاتىسۋىمەن, ۆولونتەرلىك كەڭەستىڭ IV وتىرىسى ءوتتى. ءىس-شارانى رەسەيلىك تاراپ ۇيىمداستىردى. بۇل تۋرالى اقپارات جانە قوعامدىق دامۋ مينيسترلىگىنىڭ ءباسپاسوز قىزمەتى حابارلادى.
ءىس-شاراعا قر پارلامەنتى ءماجىلىسىنىڭ دەپۋتاتى ۆەرا كيم, رف ەرىكتىلەر ورتالىقتارى قاۋىمداستىعى كەڭەسى توراعاسىنىڭ ورىنباسارى يۆان رادكو, اقپارات جانە قوعامدىق دامۋ مينيسترلىگىنىڭ ازاماتتىق قوعام ىستەرى كوميتەتىنىڭ توراعاسى ماديار قوجاحمەت, بۇۇ قازاقستانداعى ەرىكتىلەر باعدارلاماسىنىڭ ۇيلەستىرۋشىسى نيكيتا شاباەۆ, روسمولودەجا حالىقارالىق قىزمەتىنىڭ, رف ۆولونتەرلەردىڭ ۇتقىرلىعى ورتالىعىنىڭ, " ۇلى دالا ەلى" قب, "ۇلتتىق ۆولونتەرلىك جەلى" زتب باسشىلارى جانە قازاقستان مەن رەسەيدىڭ ۆولونتەرلىك جانە جاستار ۇيىمدارىنىڭ باسقا دا وكىلدەرى قاتىستى.
كۇن تارتىبىندە بىرلەسكەن جوبالاردى ىسكە اسىرۋ, ىنتىماقتاستىق جوسپارىنا وزگەرىستەر مەن تولىقتىرۋلار ەنگىزۋ جانە V وتىرىستىڭ مىندەتتەرىن ايقىنداۋ ماسەلەلەرى تالقىلاندى.
م.قوجاحمەت قازاقستاننىڭ وتاندىق ۆولونتەرلىكتى دامىتۋداعى جەتىستىكتەرى تۋرالى ايتىپ, قاتىسۋشىلاردىڭ نازارىن الداعى ماقساتتارعا, اتاپ ايتقاندا, بۇۇ باس اسسامبلەياسىنىڭ 75-سەسسياسىندا ايتىلعان ۆولونتەرلەردى جۇمىلدىرۋدىڭ حالىقارالىق جىلىن جاريالاۋ تۋرالى قازاقستان پرەزيدەنتىنىڭ باستاماسىن ىلگەرىلەتۋگە اۋداردى. سونىمەن قاتار, م.قوجاحمەت رەسەيلىك ارىپتەستەرىن قازاقستاننىڭ يدەياسىن حالىقارالىق ارەنادا تابىستى ىلگەرىلەتۋ ءۇشىن قولداۋ كورسەتۋگە شاقىردى.
ەستەرىڭىزگە سالا كەتەيىك, ۆولونتەرلىك كەڭەس 2019 جىلى قوستاناي قالاسىندا وتكەن قازاقستان مەن رەسەي جاستارى كوشباسشىلارىنىڭ فورۋمى اياسىندا قازاقستان رەسپۋبليكاسىنىڭ پرەزيدەنتى ق.توقاەۆتىڭ باستاماسىمەن العاش رەت قۇرىلعان بولاتىن.
كەڭەستىڭ ماقساتى – اقپاراتتىق, ادىستەمەلىك جانە ساراپتامالىق دامۋ تاجىريبەسىن كەڭەيتۋگە باعىتتالعان جاستار جانە ۆولونتەرلەر قوزعالىسىن دامىتۋ سالاسىنداعى ىنتىماقتاستىقتى ۇيىمداستىرۋ.