تۇركىستان وبلىسىندا ءىز-ءتۇسسىز جوعالعان ەر ادام كىسى قولىنان قايتىس بولدى, دەپ حابارلايدى Egemen.kz Polisia.kz سايتىنا سىلتەمە جاساپ.
تۇركىستان وبلىسى سايرام اۋداندىق پوليتسيا باسقارماسىنا 14 ناۋرىز تۇنگى ساعات 23:00 شاماسىندا جەرگىلىكتى ايەل تۇرعىن كۇيەۋىنىڭ ءىز-ءتۇسسىز جوعالعانى تۋرالى ايتىپ, ارىزدانادى. سايرامدىق ساقشىلار ارىزدى بىردەن تىركەپ, جوعالعان ازاماتتى ىزدەستىرۋگە كىرىسەدى.
جان-جاققا باعىتتامالار بەرىلىپ, اۋداندىق پوليتسيا باسقارماسىنىڭ جەكە قۇرامى جۇمىلدىرىلادى. اۋدانداعى تاكسي جۇرگىزۋشىلەرىنەن جانە كورۋى مۇمكىن دەگەن تۇرعىنداردان سۇراق-جاۋاپتار الىنادى. وسىنداي اتقارىلعان اۋقىمدى جۇمىستاردىڭ ناتيجەسىندە اۋدان پوليتسەيلەرى كۇدىكتىنىڭ ىزىنە تۇسەدى. ونىڭ ءتۇر-تۇلعاسىن انىقتاپ, جوعالعان ەر ازاماتتىڭ تانىسى ەكەنىن بىلەدى. كۇدىكتى سايرام اۋدانىنداعى قارامۇرت اۋىلىنىڭ تۇرعىنى بولىپ شىقتى. ول ءوز كىناسىن مويىنداماي, جاۋاپتان جالتارۋعا تىرىسادى.
الايدا پوليتسەيلەر دالەلدەر مەن ايعاقتى زاتتاردى جيناقتاپ, جوعالعان ازامات ءوزىنىڭ BMW كولىگىن تاستاپ, تەك وسى كۇدىكتىمەن جولىققانىن جانە كۇدىكتىنىڭ كولىگىنە وتىرىپ كەتكەنىن تولىعىمەن دالەلدەپ شىعادى. وسىدان سوڭ بارىپ, كۇدىكتى ءوز كىناسىن تولىق مويىندايدى.
تەكسەرۋ بارىسىندا بەلگىلى بولعانداي, جوعالعان ەر ازامات ءوزىنىڭ تانىسىنداعى ءىرى كولەمدەگى اقشاسىن الۋ ءۇشىن جولىققان. كۇدىكتىنىڭ كولىگىنە وتىرىپ, جولدا كەتىپ بارا جاتىپ ەكەۋىنىڭ اراسىندا داۋ-جانجال تۋىنداعان. ناتيجەسىندە قارىزدى قايتارعىسى كەلمەگەن كۇدىكتى ەر ازاماتتى اياۋسىز قىلقىندىرىپ, جەر جاستاندىرعان. ال ءمايىتتى ءوزىنىڭ بۇرىنعى جۇمىس ىستەيتىن ورنى, كارەردىڭ ماڭىنا اۋىر قىلمىسىن جاسىرۋ ماقساتىندا كومىپ تاستاعان. كۇدىكتى ەر ازامات قاماۋدا. ول بۇرىن سوتتى بولماعان. بۇگىندە وعان قاتىستى قر قك-ءنىڭ 99-بابىنىڭ 1-بولىگىمەن (ادام ءولتىرۋ) بويىنشا سوتقا دەيىنگى تەرگەپ-تەكسەرۋ جۇمىستارى جۇرگىزىلۋدە. ءىستىڭ تولىق ءمان-جايى تەرگەۋ بارىسىندا انىقتالاتىن بولادى.