اقپاننىڭ ات قۇلاعى كورىنبەيتىن دۇلەي بوراندارىنىڭ بىرىندە سولتۇستىك قازاقستان وبلىسىنىڭ ۇيالى اۋىلدىق وكرۋگىنىڭ 28 تۇرعىنى «ماي-ۇيالى» تراسساسىندا كولىكپەن كەلە جاتىپ, ايدالادا قار قۇرساۋىندا قالادى. وركەنيەتتىڭ جوعارى ساتىسى ءوزىنىڭ وزىقتىعىن بارلىق جەردە كورسەتەدى عوي. ەگەر وسى كىسىلەر وسىدان بار بولعانى جيىرما جىل بۇرىن وسىنداي قۇرساۋدا قالسا, اجال قۇشار ەدى. ويتكەنى ۇستەرىنەن ءجۇرىپ كەتكەن بوران ولاردى كورسەتپەي تاستاعان. قازىر جۇرتتىڭ بارىندە تەلەفون بار جانە ونىمەن قاي جەردەن حابارلاسىپ تۇرعانىن دا انىقتاۋعا بولادى.
قۇرساۋداعى جاندار توتەنشە جاعداي قىزمەتىنە, اۋىل اكىمىنە, پوليتسيا بولىمىنە قايتا-قايتا حابارلاسىپ, وزدەرىن قۇتقارۋدى وتىنگەن. ارينە, بۇل قىزمەتتەر دە تۇك كورىنبەيتىن بوراندا قۇرساۋداعىلارعا تەز جەتىپ, قۇتقارا قويمايدى. تەك ارادا 12 ساعات وتكەندە عانا اقجار اۋداندىق توتەنشە جاعداي ءبولىمىنىڭ قىزمەتكەرلەرى س.قاليەۆ, م.عابدىسالام جانە ۆ.ماتۆەەۆ قاردى جارىپ وتەتىن قۋاتتى تەحنيكا «ترەكول-مەن» قۇرساۋدا قالعاندارعا جەتەدى. تۇك كورىنبەيتىن بوراندا جانە ءتۇن جارىمىندا قار استىندا قالعاندارعا بارىنشا اقىرىن بارماسا جانە قيىن. ويتكەنى اۋىر ماشينا جەڭىل كولىكتەردى زاقىمداپ كەتۋى دە مۇمكىن. بىراق قۇتقارۋشىلاردىڭ شەبەرلىگىنىڭ, كاسىبي دايىندىقتارىنىڭ جوعارىلىعىنىڭ ارقاسىندا قۇرساۋداعى ازاماتتار قۇتقارىلدى.
قۇتقارۋشىلار ۇسۋگە تاياپ, ابدەن توڭىپ, دىرىلدەگەن جانداردى ەۆاكۋاتسيالىق تىرەككە جەتكىزىپ, اۋىزدارىن جىلىتىپ ىستىق شاي مەن تاماق بەرىپ, بويلارىنا قان جۇگىرتەدى. ءتىپتى وسىندا قوندىرىپ, تەك بوران باسىلعان سوڭ, ەرتەڭىنە جولعا سالىپ جىبەرەدى. شەكسىز العىستارىن جاۋدىرعان جۇرگىنشىلەر ءسويتىپ اجال اۋزىنان امان قالىپ, ۇيلەرىنە جەتەدى.
ال ۇيالى اۋىلدىق وكرۋگىنىڭ اكىمى ع.كارىباەۆ ءوزىنىڭ ۇلكەن العىسىن سولتۇستىك قازاقستان وبلىستىق توتەنشە جاعدايلار دەپارتامەنتىنىڭ باستىعى راميل كامالوۆقا حاتپەن جەتكىزىپ, قۇتقارۋعا قاتىسقان ازاماتتاردىڭ ىستەرىن اتاپ ءوتۋدى وتىنگەن. «ەگەر وسى ازاماتتار ءوز ىستەرىنە ادالدىقتى, جوعارى شەبەرلىك پەن كاسىبي دايىندىقتىڭ بيىكتىگىن كورسەتپەسە بۇگىنگى تاڭدا ۇيالى اۋىلدىق وكرۋگىندە قانشاما وتباسى قان جۇتىپ, قايعى شەگىپ وتىرار ەدى. ءسىزدىڭ قىزمەتكەرلەرىڭىز ولارعا ەكىنشى ءومىر سىيلاعانداي بولدى. سوندىقتان ءبىز ولاردىڭ ەرلىكتەرىنىڭ الدىندا باس يەمىز جانە ولاردىڭ ەڭبەگىن لايىقتى اتاپ ءوتۋدى وتىنەمىز» دەلىنگەن ەكەن حاتتا.
وسىعان ۇقسايتىن العىس حاتتاردى بيىلعى اقپاندا سولتۇستىك قازاقستان وبلىستىق تج دەپارتامەنتى كوپ الدى. ءوز ىسىنە العىس العانعا نە جەتسىن؟!
سولتۇستىك قازاقستان وبلىسى