پرەزيدەنتتىڭ كومەكشىسى ەرلان قارين Telegram پاراقشاسىندا جەر قاتىناستارى ماسەلەسى ۇلتتىق قوعامدىق سەنىم كەڭەسىنىڭ كۇن تارتىبىندە باستى ورىنداردىڭ بىرىندە ەكەنىن ايتىپ ءوتتى, دەپ حابارلايدى Egemen.kz
«2021 جىلى 25 اقپاندا ۇلتتىق قوعامدىق سەنىم كەڭەسىننىڭ بەسىنشى وتىرىسىندا مەملەكەت باسشىسى اۋىلشارۋاشىلىق ماقساتىنداعى جەرلەردى شەتەلدىكتەرگە جانە شەتەلدىك زاڭدى تۇلعالارعا ساتۋعا جانە جالعا بەرۋگە تىيىم سالۋدى زاڭمەن بەكىتۋدى تاپسىردى. سونىمەن بىرگە, قاسىم-جومارت توقاەۆ پرەزيدەنتتىڭ زاڭنامالىق باستاماسى اياسىندا زاڭ جوباسىن دايىنداۋ قاجەتتىلىگىنە نازار اۋداردى. ۇلتتىق كەڭەس وتىرىسىنان كەيىن پرەزيدەنت اكىمشىلىگى بىردەن ءتيىستى جۇمىستاردى باستادى. زاڭ جوباسى تەزىرەك دايىندالىپ, ماقۇلداندى», دەپ جازدى ەرلان قارين.
ول وسىنىڭ ناتيجەسىندە كەشە قازاقستان رەسپۋبليكاسى كونستيتۋتسياسىنىڭ 61-بابىنىڭ 1-تارماعىنا سايكەس مەملەكەت باسشىسى قازاقستان رەسپۋبليكاسى پارلامەنتى ماجىلىسىنە جەردى شەتەلدىكتەرگە ساتۋعا جانە جالعا بەرۋگە تىيىم سالۋدى قاراستىراتىن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسىن جولداعانىن ايتتى.
«جەر قاتىناستارى ماسەلەلەرى ۇلتتىق كەڭەستىڭ العاشقى جۇمىس كۇنىنەن باستاپ كۇن تارتىبىندەگى باستى ورىننىڭ ءبىرىن يەلەنگەنىن اتاپ وتكەن ءجون. سوندىقتان, پرەزيدەنتتىڭ اۋىلشارۋاشىلىق جەرلەرىن شەتەلدىكتەرگە ساتۋعا جانە جالعا بەرۋگە تىيىم سالۋ تۋرالى شەشىمى ۇقسك الاڭىندا جاريالاندى. بۇل تاعى دا وسى ديالوگ الاڭىنىڭ وزەكتىلىگى مەن تيىمدىلىگىن كورسەتەدى», دەدى ول.
ەسكە سالا كەتسەك, بۇعان دەيىن مەملەكەت باسشىسى قاسىم-جومارت توقاەۆ جەردى شەتەلدىكتەرگە ساتۋعا ءبىرجولا تىيىم سالۋدى كوزدەيتىن زاڭ جوباسىن ماجىلىسكە جولداعان ەدى.