نۇر-سۇلتان قالاسىنىڭ باس مەملەكەتتىك سانيتارلىق دارىگەرى سارحات بەيسەنوۆا COVID-19 ينفەكتسياسىنىڭ جۇقتىرۋ كورسەتكىشى ارتقانىن ءمالىم ەتتى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
«دەمالىس, مەرەكە كۇندەرى دە, باسقا كۇندەرى دە مونيتورينگتىك توپتاردىڭ جۇمىسى كۇشەيتىلەتىن بولادى. نىسان يەلەرى كوروناۆيرۋستىڭ اۋىرلىعىنا ءمان بەرۋى كەرەك. ءبىز جۇمىس ۋاقىتىن ۇزارتتىق, سوندىقتان جۇمىس كەستەسىن بۇزباۋدى, سول سياقتى سانيتارلىق نورمالاردى تولىقتاي ساقتاۋدى تالاپ ەتەمىز. نەمقۇرايلى قاراعان كاسىپكەرلەر جاۋاپكەرشىلىككە تارتىلادى. قالا تۇرعىندارىنىڭ دەنساۋلىعى ءۇشىن بارلىق شارالار قابىلدانىپ جاتىر», دەدى سارحات بەيسەنوۆا.
بۇدان سوڭ ول سوڭعى تاۋلىكتە ينفەكتسيانىڭ 112 جاعدايى تىركەلگەنىن جانە 110 وشاقتىڭ انىقتالعانىن ايرىقشا اتاپ ءوتتى.
«جىل باسىنان بەرى ەلوردادا ءCOVىD-19-بەن 7603 ادام جۇقتىردى. ونىڭ ىشىندە قاڭتاردا – 3763, اقپاندا – 2811 جانە ناۋرىزدا – 1029. سونداي-اق ناۋقاستارمەن بايلانىستا بولعان ادامداردىڭ ۇلەس سالماعى اقپان ايىنداعى 45%-دان ناۋرىز ايىندا 49 %-عا دەيىن وسكەنى بايقالادى, بۇل ءۇي وشاقتارىندا بولعان ادامداردىڭ الدىن الۋ شارالارىن ساقتامايتىندىعىن راستايدى», دەدى ەلوردانىڭ باس مەملەكەتتىك سانيتارلىق دارىگەرى.
ءسوز اراسىندا قالادا 912 ءۇي وشاعى بار ەكەنىن, وندا 2500 بايلانىستا بولعان ادام مەديتسينالىق باقىلاۋدا تۇرعانىن ايتىپ ءوتتى.
«بۇگىندە نۇر-سۇلتان قالاسىندا پيلوتتىق جوباعا 36 كاسىپكەرلىك نىسان قاتىسۋدا. بۇل جوبا «Ashyq» پيلوتتىق جوباسىنا قاتىساتىن وبەكتىلەرگە كىرگەن كەزدە كەلۋشىنىڭ COVID مارتەبەسىن انىقتاۋعا مۇمكىندىك بەرەدى, ياعني تەك ۇيدە ءوزىن-ءوزى وقشاۋلاۋ رەجيمىن بۇزاتىن ادامداردى انىقتاۋعا باعىتتالعان», دەدى ول.