ايگىلى شۆەد جازۋشىسى استريد ليندگرەننىڭ قازاق تىلىندەگى «ۇزىنش ۇلىق پيپپي» كىتابىنىڭ تۇساۋكەسەرى ءوتتى. ميرا سەمبايقىزىنىڭ تارجىماسىمەن «فوليانت» باسپاسىنان باسىلىپ شىققان بالالار شىعارماسى قازاق تىلىنە العاش رەت اۋدارىلىپ وتىر.
ەل پرەزيدەنتى قاسىم-جومارت توقاەۆ «تاۋەلسىزدىك بارىنەن قىمبات» اتتى ماقالاسىندا بالالار ادەبيەتىنە ەرەكشە ءمان بەرىپ: ء«تىل يگەرۋ ءۇشىن بالالار ادەبيەتىنىڭ اتقاراتىن ءرولى زور. سوندىقتان قازاق قالامگەرلەرىنىڭ ۇزدىك شىعارمالارىنا قوسا, بالالارعا ارنالعان شەتەل جازۋشىلارىنىڭ دا تاڭداۋلى تۋىندىلارىن اۋدارىپ, كوپتەپ باسىپ شىعارۋدى جانە تاراتۋدى قولعا العان ءجون» دەپ اتاپ وتكەن بولاتىن. سوعان وراي 2021 جىل – بالالار مەن جاسوسپىرىمدەردىڭ كىتاپ وقۋىن قولداۋ جىلى بولىپ جاريالانعان ەدى. وسى ماقساتتا «فوليانت» باسپاسى قازىرگى ۇرپاقتىڭ پسحولوگياسىنا ءتان, ءتالىم-تاربيەلىك ماڭىزى بار ساپالى تۋىندىلاردى باسىپ شىعارۋدى, الەمدىك ادەبيەتتە ورنى بار شىعارمالاردى اۋدارۋدى قولعا الىپ وتىر.
ءىس-شاراعا شۆەتسيا كورولدىگىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ماتس فويەر, جازۋشى, قازاقستاننىڭ ەڭبەك سىڭىرگەن قايراتكەرى ساۋلە دوسجان, قالامگەر بايانعالي ءالىمجانوۆ, بالالار اقىنى سەرىكبول حاسان جانە ت.ب. زيالى قاۋىم وكىلدەرى قاتىستى.
ەكى ەل اراسىنداعى شىعارماشىلىق بايلانىستىڭ بولاشاعىنان ۇلكەن ءۇمىت كۇتەتىنىن ايتقان شۆەتسيا كورولدىگىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ماتس فويەر اتالعان جوبانىڭ «Kulturrådet» بويىنشا شۆەد كەڭەسىنىڭ گرانتىمەن ىسكە اسىرىلعانىن جەتكىزدى. «اتاقتى ادەبي كەيىپكەردىڭ قازاق تىلىندە سويلەگەنىنە قۋانىشتىمىن. شۆەتسيا بالالارىنىڭ ءبارى ۇزىنش ۇلىق ءپيپپيدى جاقسى بىلەدى. ءتىپتى, بۇل كىتاپتى وقۋ ۇلكەندەرگە دە پايدالى. ول ءاربىر ادامعا, قوعامعا, اينالاسىنا نەعۇرلىم جەڭىل, ەركىن قاراۋعا ۇيرەتەدى», دەدى ەلشى.
كىتاپ اۋدارماشىسى ميرا سەمبايقىزى ءتارجىما جۇمىستارىنا ءۇش اي ۋاقىت كەتكەنىن ايتا كەلە: «اۋدارىپ بولعاننان كەيىن دە رەداكتسيادان وتكىزىپ, ابدەن تەكسەردىك. بالالار وقىعاندا تۇسىنىكسىز ۇعىمدار, قيىن سويلەمدەر كەزدەسىپ قالماسىن دەپ سويلەمدەردى بارىنشا جەڭىل تىلمەن بەرۋگە تىرىستىم», دەدى.
استريد ليندگرەن, يۋنەسكو ۇيىمىنىڭ مالىمەتى بويىنشا, الەمنىڭ ەڭ كوپ اۋدارىلاتىن جيىرما اۆتورى اراسىندا 18-ورىندا – فەدور دوستوەۆسكي, ەرتەگى پاتشاسى اندەرسەنمەن قاتار تۇر.
76 جىل بۇرىن جارىق كورگەن «ۇزىنش ۇلىق پيپپي» سوعىستان كەيىنگى شۆەدتىك بالالار ءۇشىن بوستاندىق, ومىرگە دەگەن سۇيىسپەنشىلىك سيمۆولىنا اينالدى. اۆتور بالالارعا قارسى زورلىق-زومبىلىقتى توقتاتۋ مەن ولارعا دەگەن قۇرمەت سەزىمىن قالىپتاستىرۋ قاجەتتىلىگىن قوعامعا جەتكىزۋ ءۇشىن بارلىق مۇمكىندىكتى پايدالاندى. بارلىق كىتاپتارىنان «ەركىن تاربيەلەۋ اتا-اناعا دەگەن قۇرمەتتىڭ جوقتىعىن بىلدىرمەيدى, بۇل اتا-انانىڭ بالاعا دەگەن قۇرمەتىن بىلدىرەدى», «بالاڭىزعا شىن كوڭىلمەن ءمان بەرىڭىز», «بالاڭىزدى قولداڭىز», «بالاڭىزدى تىڭداۋدى ۇيرەنىڭىز», «بالاڭىزبەن ويناڭىز», «بالاڭىزبەن سويلەسىڭىز» جانە ەڭ باستىسى «بالاڭىزعا قول كوتەرمەڭىز» دەگەن يدەيا بايقالادى.
ال باس كەيىپكەر پيپپي – بالالاردىڭ كۇش پەن يگىلىك, بايلىق پەن جومارتتىق, بوستاندىق پەن تاۋەلسىزدىك ارماندارىنىڭ سيمۆولى. ال ۇلكەندەر كەرىسىنشە, ءپيپپيدى تۇسىنبەيدى. ءدارىحاناشى, مەكتەپ مۇعالىمى, تسيرك ديرەكتورى, ءتىپتى توممي مەن اننيكانىڭ اناسى دا ءپيپپيدى وزگەرتۋگە, قايتا تاربيەلەۋگە تىرىسادى. الايدا ەشكىم پيپپيگە قالاماعانىن جاساتا دا, مىندەتتەي دە المايدى. پيپپي تۋرالى كىتاپتار – جاقسىلىققا قۇشتارلىقتىڭ سيمۆولى سىندى.