سوڭعى ۋاقىتتا ينتەرنەت-الاياقتىق سانى وسۋدە. مامليۋت اۋدانى پوليتسيا ءبولىمى باسشىلىعىنىڭ باستاماسىمەن قىلمىستىڭ اتالعان ءتۇرىن ەسكەرتۋ بويىنشا چەللەندج باستاۋ الدى.
ەرىكتىلەر توبى پوليتسەيلەرمەن جانە پروكۋراتۋرا قىزمەتكەرلەرىمەن بىرگە لەدەنيوۆو اۋىلىنا كەلدى. قاتىسۋشىلار لەدەنەۆو اۋىلىنداعى 178 ءۇيدىڭ ارقايسىسىندا بولىپ, اۋىلدىقتارعا الاياقتىقتىڭ كەڭ تاراعان ايلا-امالدارى تۋرالى ايتىپ بەردى, سونداي-اق پروفيلاكتيكالىق كىتاپشالار تاراتتى.
سوڭعى كەزدە الاياقتىقتىڭ بەلەڭ العان ءتۇرى – بانكتىڭ قاۋىپسىزدىك قىزمەتكەرى بولىپ تەلەفون سوعۋ. قاسكويلەر ەسەپ شوتتارىنان زاڭسىز اۋدارىمداردىڭ جاسالۋىنا جول بەرمەيمىز دەپ قۇرباندارىنان بانك كارتالارىنىڭ رەكۆيزيتتەرىن سۇراپ الادى. سونىمەن قاتار الدىن الا تولەم جاساۋدى تالاپ ەتۋمەن تاۋارلار ساتۋ تۋرالى جالعان حابارلاندىرۋلار كەڭىنەن قولدانادى. ينتەرنەت ارقىلى زاتتارىن ساتىپ جاتقان ادامدارعا قىلمىسكەرلەر وزدەرىن ساتىپ الۋشى رەتىندە تانىستىرىپ, WhatsApp ارقىلى جەتكىزۋ قىزمەتى سايتىنا سىلتەمە جولداپ, ءوتىنىمدى راستاۋىن سۇرايدى. شىن مانىندە بۇل سايتتار – ناعىز لوگيستيكالىق كومپانيالاردىڭ سايتتارى سياقتى رەسىمدەلگەن «تەلقوساقتار». وندا ەنگىزىلگەن مالىمەتتەر قىلمىسكەرلەردىڭ ولجاسىنا اينالادى جانە ول ارقىلى قۇرباندارىنىڭ ەسەپ شوتتارىنا قولدارىن جەتكىزە الادى. قازىر بارلىعى 150-دەن استام الاياقتىق تىركەلدى.