بۇگىن سەنات وتىرىسىندا سوت جۇيەسىن جەتىلدىرۋ جانە قوعامنىڭ سوتتارعا دەگەن سەنىمىن ارتتىرۋ ماسەلەلەرى قارالدى. سوعان سايكەس پارلامەنت دەپۋتاتتارىنىڭ باستاماسىمەن سوت جۇيەسىن جاڭعىرتۋ ماقساتىندا «قازاقستان رەسپۋبليكاسىنىڭ سوت جۇيەسى مەن سۋديالارىنىڭ مارتەبەسى تۋرالى» كونستيتۋتسيالىق زاڭعا, اكىمشىلىك قۇقىق بۇزۋشىلىق تۋرالى كودەكسكە جانە كەيبىر زاڭنامالىق اكتىلەرگە سوت جۇيەسىن جاڭعىرتۋ ماسەلەلەرى بويىنشا وزگەرىستەر مەن تولىقتىرۋلار ەنگىزىلدى, دەپ حابارلايدى Egemen.kz.
ماۋلەن اشىمباەۆ ءوز سوزىندە مەملەكەت باسشىسى VII شاقىرىلىمداعى پارلامەنتتىڭ ءبىرىنشى سەسسياسىنىڭ اشىلۋىندا بەلگىلەپ بەرگەن مىندەتتەرگە توقتالدى. اتالعان جيىندا پرەزيدەنت سوت جۇيەسى جابىق جۇيە بولماۋ كەرەكتىگىن جانە ونى جاڭعىرتۋ قاجەت ەكەنىن ايتقان بولاتىن. سوندىقتان قارالعان زاڭ جوبالارى سوت جۇيەسىن جەتىلدىرۋگە ارنالىپ وتىر. بۇل زاڭدار ارقىلى پرەزيدەنتىمىزدىڭ ۇسىنىسىمەن بىلىكتى مامانداردى جوعارعى سوتتىڭ قۇرامىنا تارتۋ مۇمكىندىگى كەڭەيتىلەدى.
«بيىلعى 1 شىلدەدەن باستاپ ەلىمىزدە اكىمشىلىك يۋستيتسيا ينستيتۋتى ءوز جۇمىسىن باستايدى. سونىڭ اياسىندا ازاماتتاردىڭ قۇقىقتارىن قوسىمشا قورعايتىن جاڭا كەپىلدىكتەر مەن تەتىكتەر قولعا الىنادى. وسى ينستيتۋتتىڭ الەۋەتىن تولىقتاي قولدانۋ ءۇشىن جوعارعى سوتتا جاڭا اكىمشىلىك ىستەر جونىندەگى سوت القاسى قۇرىلادى. جالپى, وسى زاڭدار سوت جۇيەسىنىڭ اشىقتىعىن قامتاماسىز ەتۋگە جانە ونىڭ تيىمدىلىگىن ارتتىرۋعا وڭ اسەرىن تيگىزەدى دەپ سەنەمىز», – دەدى ماۋلەن اشىمباەۆ.
سونىمەن قاتار پالاتا وتىرىسىندا دەپۋتاتتار تاعى ەكى زاڭدى قاراپ, قابىلدادى. كەدەن وداعىنا مۇشە مەملەكەتتەردىڭ كەدەن قىزمەتتەرىنىڭ بىرىككەن القاسى تۋرالى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ ەۋرازيالىق ەكونوميكالىق وداققا مۇشە مەملەكەتتەردىڭ كەدەن ورگاندارىنىڭ ءوزارا ءىس-ارەكەتتەرىنىڭ ناقتى جانە ءتيىمدى ۇيلەسىمدىلىگىنە ىقپال ەتەدى.
ال, «سۋعا باتىپ كەتكەن كەمەلەردى جويۋ تۋرالى 2007 جىلعى نايروبي حالىقارالىق كونۆەنتسياسىن راتيفيكاتسيالاۋ تۋرالى» زاڭ سۋعا باتىپ كەتكەن كەمەلەردى جانە تەڭىز اپاتتارىنىڭ سالدارىن ءتيىمدى جويۋعا قاتىستى بىرىڭعاي ەرەجەلەر مەن راسىمدەردى بەلگىلەيدى.
سونداي-اق, وتىرىستا سەناتورلار دەپۋتاتتىق ساۋالدارىن جولدادى. دەپۋتات نۇرجان نۇرسيپاتوۆ قر قارۋلى كۇشتەرىنىڭ ارسەنالدارى, بازالارى جانە قويمالارى جانىندا تىيىم سالىنعان ايماقتار مەن اۋدانداردى بەلگىلەۋگە قاتىستى ماسەلەلەردى كوتەردى. سەناتور عۇمار دۇيسەمباەۆ اتىراۋ وبلىسىنىڭ تۇرعىندارىن سۋمەن قامتاماسىز ەتۋدەگى پروبلەمالارعا نازار اۋداردى. دەپۋتات اقىلبەك كۇرىشباەۆ جوعارى وقۋ ورىندارى وقىتۋشىلارىنىڭ جالاقىسىن كوبەيتۋ قاجەت ەكەنىن ايتسا, سەناتور ءالي بەكتاەۆ تۇركىستان وبلىسى پوليتسيا دەپارتامەنتىنىڭ قىزمەتىن قارجىلاندىرۋ ماسەلەسى تۋرالى ءسوز قوزعادى.