«استانا بالەت» ساحناسىندا حالىقارالىق ايەلدەر كۇنىنە وراي گالا-كونتسەرت ءوتتى. 6-7 ناۋرىزدا, قاتارىنان ەكى كۇن بويى, ەلىمىزدىڭ ءۇش تەاترى – «استانا بالەت», «استانا وپەرا», اباي اتىنداعى قازاق ۇاوبت جەتەكشى سوليستتەرى, قازاقستاندىق بالەت جۇلدىزدارى ءبىر ساحنادا باس قوسىپ, ونەر كورسەتتى, دەپ حابارلايدى Egemen.kz
ەكى بولىمنەن تۇرعان كەش باعدارلاماسى 16 نومەردەن قۇرالعان: ارتىستەر كلاسسيكالىق مۇراعا اينالعان سپەكتاكلدەردىڭ ۇزىندىلەرىن, سونداي-اق, سونى حورەوگرافيالىق قويىلىمداردى ورىنداپ شىقتى.
«باعدارلامامىز وتە مازمۇندى ءارى سان-الۋان بولدى, سونداي-اق, كەيبىر نومەرلەر ساحنامىزدا العاش ورىندالعانىن اتاپ ءوتۋىمىز كەرەك. وسى باعدارلامانى دايىنداعان كەزدە, ءوز باسىم, كەلىپ جەتكەن كوكتەم شۋاعىن – جاڭا ءومىر تىنىسىن, ماحاببات پەن ىڭكار سەزىمدى جەتكىزگىم كەلدى. سوندىقتان, ءار بي ماحابباتتىڭ سان قىرىن سۋرەتتەيدى: قۇشتارلىق, رومانتيكالىق, مەلانحوليالىق سەزىم يىرىمدەرى», دەدى «استانا بالەت» تەاترىنىڭ كوركەمدىك جەتەكشىسى نۇرلان كانەتوۆ.
ءبىرىنشى بولىمدە تس.ءپۋنيدىڭ «ەسمەرالدا», پ.چايكوۆسكيدىڭ «اققۋ كولى», ب.اسافەۆتىڭ «پاريج الاۋى», ك.گليۋكتىڭ «اۋەن», ا.اداننىڭ «كورسار», پ.ماسكانيدىڭ «Diversity», پ.چايكوۆسكيدىڭ «Divine» سىندى بالەتتەرىنىڭ ۇزىندىلەرى كورسەتىلدى.
ءبىرىنشى ءبولىمنىڭ سوڭىندا ءۇش تەاتردىڭ جەتەكشى سوليستتەرى: فارحاد بوريەۆ, باحتيار ادامجان مەن جانەل توكەەۆا ادولف ادان مۋزىكاسىنا قويىلعان «كورسار» بالەتىنەن تريو ورىنداپ, كورەرمەن قاۋىمنىڭ زور ىقىلاسىنا بولەندى.
ەكىنشى بولىمدە «جيزەل» بالەتىنەن گراند-پا, «كارمەن-سيۋيتا» بالەتىنەن دۋەت, «اققۋ كولى» بالەتىنەن اداجيو, فەدور لوپۋحوۆ حورەوگرافياسىنداعى «گوپاك», «سپارتاك» بالەتىنەن دۋەت, «شوپەنيانا» بالەتىنەن ۆالس, «Love FearLoss» بالەتىنەن دۋەت جانە «دون كيحوت» بالەتىنەنپا-دە-دە كورسەتىلدى.
بي كەشىنىڭ جارقىن كورىنىسىنىڭ ءبىرى ا.حاچاتۋريان مۋزىكاسىنا حورەوگراف گەورگي كوۆتۋن قويعان «سپارتاك» بالەتىنەن اداجيو ەدى. ەلوردالىق تەاتر ساحناسىنا سپەكتاكل ءۇزىندىسىن «استانا بالەت»تەاترىنىڭ كوركەمدىك جەتەكشىسى, رف ەڭبەك سىڭىرگەن قايراتكەرى نۇرلان كانەتوۆ كوشىردى. سپارتاك پەن فريگيانىڭ بەينەسىن فارحاد بوريەۆ پەن اينۇر ابىلعازينا سومدادى.
ەكى كەش بويى ونەر كورسكەتكەن «استانا بالەت» تەاترىنىڭ سوليستتەرى مەن ارتىستەرى: تاتيانا تەن, فارحاد بوريەۆ, قازبەك احمەدياروۆ, اينۇر ابىلعازينا, ديلارا شوماەۆا, ايجان مۇقاتوۆا, ۋەسلي كارۆالو, ەلدار سارسەمباەۆ, ءبالجان ابدىراحمانوۆا جانە وزگە بيشىلەر.
گالا-كونتسەرتتە شاقىرىلعان ارتىستەر رەتىندە ونەر كورسەتكەندەر: «استانا وپەرا» تەاترىنىڭ پرەمەرى باحتيار ادامجان, اباي اتىنداعى قازاق ۇاوبت جەتەكشى سوليستتەرى جانەل توكەەۆا, راحىم دايىروۆ پەن ماليكا ەلشىباەۆا.
ەستەرىڭىزگە سالا كەتەيىك, ناۋرىز ايىندا ءبىزدىڭ ۇجىم «ۆالپۋرگيەۆ ءتۇنى» جانە «گايا» ءبىر اكتىلى بالەتتەرى مەن ناۋرىز مەيرامىنىڭ قارساڭىندا «ۇلتتىق حورەوگرافيا كەشىن» كورسەتەدى. تەاتردىڭ كوركەمدىك جەتەكشىسى ءساۋىر ايىنداعى قويىلىمدار جايلى دا ايتىپ قالدى. كوپ ۇزاماي, كورەرمەن كوزايىمىنا اينالعان – «بەيبارىس سۇلتان», «ماحاببات تۋرالى اڭىز» جانە «جيزەل» بالەتتەرى قايتا كورسەتىلەتىن بولادى.