الەۋمەتتىك جەلىلەردە كەيبىر قازاقستاندىق پايدالانۋشىلار COVID-19 پتر-تەستىلەۋ ناتيجەسىن بۇرمالاۋ تۋرالى اقپاراتپەن بولىسۋدە. بۇل زاڭسىز. قازاقستاندا جالعان قۇجاتتار دايىنداۋ جانە پايدالانۋ ءۇشىن جاۋاپكەرشىلىك قاراستىرىلعان, دەپ حابارلايدى Egemen.kz stopfake سايتىنا سىلتەمە جاساپ.
الەۋمەتتىك جەلىلەردە تاراتىلىپ جاتقان جاريالانىمدا Telegram-چاتقا اپاراتىن سىلتەمە كورسەتىلگەن. وندا COVID-19 پتر-تەستىلەۋدىڭ تەرىس ناتيجەلەرى بار بلانكىلەر ۇسىنىلعان. چاتتى قۇرۋشىنىڭ ايتۋىنشا, بۇل ۇلگىلەردى ادامنىڭ اتى-ءجونى مەن كۇندى ەنگىزۋ ارقىلى وزگەرتۋگە بولادى.
دەنساۋلىق ساقتاۋ مينيسترلىگى تالداۋ ناتيجەلەرى بار جالعان بلانكىلەردى تۇپنۇسقادان اجىراتۋ جانە ولاردىڭ دۇرىستىعىن تەكسەرۋ وڭاي ەكەنىن اتاپ ءوتتى.
«كوميتەتتىڭ «ۇلتتىق ساراپتاما ورتالىعى» فيليالدارى ۇسىنعان زەرتتەۋ حاتتامالارىنىڭ تۇپنۇسقالىعىن زەرتحانالىق اقپاراتتىق جۇيە (زاج) باعدارلاماسى ارقىلى سايكەستەندىرۋ مىناداي پارامەترلەر بويىنشا جۇرگىزىلەدى: زاج باعدارلاماسى بەرگەن زەرتتەۋ حاتتاماسىنداعى شتريح كود; www.nca.kz سايتىندا سايكەستەندىرۋگە بولاتىن اككرەديتتەۋ اتتەستاتىنىڭ ءنومىرى كورسەتىلگەن, قازاقستان رەسپۋبليكاسىنىڭ ۇلتتىق اككرەديتتەۋ ورگانى بەرگەن اككرەديتتەۋ بەلگىسىنىڭ بولۋى; «حالىقتىڭ سانيتاريالىق-ەپيدەميولوگيالىق سالاماتتىلىعى سالاسىنداعى ەسەپكە الۋ جانە ەسەپ بەرۋ قۇجاتتاماسىنىڭ نىساندارىن بەكىتۋ تۋرالى» بۇيرىقپەن رەگلامەنتتەلگەن زەرتتەۋدىڭ ءاربىر تۇرىنە ارنالعان زەرتتەۋ حاتتاماسىنىڭ بەكىتىلگەن نىسانى. نىساندا زەرتتەۋ ورىنداۋشىسىنىڭ, زەرتحانا باسشىسىنىڭ دەرەكتەرى جانە ۇيىمنىڭ ءمورى كورسەتىلگەن», دەپ حابارلادى ۆەدومستۆودان.
قازاقستاندا جالعان قۇجاتتاردى, ءمورتابانداردى, مورلەردi, بلانكىلەردى, مەملەكەتتiك پوشتا تولەمى بەلگىلەرىن, مەملەكەتتiك ناگرادالاردى قولدان جاساۋ, دايىنداۋ نەمەسە وتكiزۋ زاڭسىز بولىپ تابىلادى. بۇل ءۇشىن قر قك 385-بابىنا سايكەس قىلمىستىق جاۋاپكەرشىلىك كوزدەلگەن. زاڭ بۇزۋشىلار ەكى جىلعا دەيىنگى مەرزىمگە باس بوستاندىعىن شەكتەۋگە نە سول مەرزiمگە باس بوستاندىعىنان ايىرۋعا جازالانادى. كورىنەۋ جالعان قۇجاتتى پايدالانۋ 160 اەك دەيiنگi مولشەردە ايىپپۇل سالۋعا نە 40 تاۋلىككە دەيىنگى مەرزىمگە قاماۋعا الۋعا جازالانادى.
سونىمەن قاتار COVID-19 پتر تالداۋىنىڭ تەرىس ناتيجەسى كورسەتىلگەن بلانك جاساۋ قاۋىپتى. مۇنداي قۇجاتتى قولدانعان ادام ءىس جۇزىندە ىندەتپەن اۋىرىپ, ونى باسقالارعا جۇقتىرۋى مۇمكىن.