ىزگىلىك پەن مەيىرىم الەمدى قۇتقارادى. قوعامدا وزگەنىڭ ءومىرى ءۇشىن ءوز باسىن قاتەرگە تىگەتىن بەيبىت كۇننىڭ قاھارماندارى از ەمەس. ولاردىڭ ەڭبەگىن ەلەپ, باسقالارعا ۇلگى ەتۋ جاقسىلىققا جول اشادى. العاشقى قازاقستاندىق «Adam Bol Awards» سىيلىعى ومىردە ەرلىككە ءاردايىم ورىن بار ەكەنىن ءوز ىسىمەن شىنايى كورسەتە بىلگەن جاندارعا تاپسىرىلدى.
«Adam Bol Awards» قازاقستاندىق جۇلدەسى ەشقانداي قيىندىقتان قورىقپاي, ناعىز باتىرلىقتىڭ ەرەن ۇلگىسىن كورسەتكەن ازاماتتارعا ارنالعان. جۇلدە لاۋرەاتتارى ادام بويىنداعى مارتتىك, جومارتتىق, ەرلىك, مەيىرىم مەن ادىلدىك, ماحاببات پەن دانالىق, سەنىم مەن ءۇمىت سياقتى اسىل قاسيەتتەرىمەن ەرەكشەلەندى. الاۋلاعان وتتىڭ ىشىنەن التى بالانىڭ ءومىرىن اراشالاپ قالعان داۋرەن رىمقۇلوۆ تۋرالى جۋرناليستەر قاۋىمى جارىسا جازعان بولاتىن. اتاۋلى سىيلىققا يە بولعانداردىڭ ىشىندە ول دا بار. سونداي-اق جانىپ جاتقان انگاردان 22 ءيتتى امان الىپ شىعىپ, ءوزى كوك تۇتىنگە ۋلانىپ اۋرۋحانادان ءبىر-اق شىققان حايۋاناتتار قۇقىن قورعاۋشى سەرگەي سنەگيرەۆ تە لاۋرەاتتار قاتارىنان تابىلدى.
كوپشىلىكتىڭ داۋىس بەرۋى مەن ساراپشىلار كەڭەسىنىڭ شەشىمى بويىنشا جەڭىمپاز اتانعان نادير ومارعازيەۆ, يمانعالي بايمىرزا, اندرەي پەتروۆ, اقبوتا امانعاليەۆا, ەرجان امارحانوۆ, ارداق بايماناسوۆ, ارتەم بوروۆيكوۆ, الەكساندر شاحوۆ, الياكبار يۋلداشەۆ, الەكساندر جۇماباەۆ سەكىلدى ازاماتتاردىڭ ءاربىرى قۇرمەتكە لايىق. قوعامنىڭ سان سالاسىندا ەڭبەك ەتە ءجۇرىپ, اينالاسىنا جارقىن ۇلگى كورسەتكەن ولاردىڭ ىشىندە مەكتەپ وقۋشىسى دا بار.
جەڭىمپازداردى ماراپاتتاۋ راسىمىندە ءسوز العان الماتى قالاسىنىڭ اكىمى باقىتجان ساعىنتاەۆ: «قاھارماندار ارامىزدا ءجۇر. ادامعا جاقسىلىق جاساۋ ءۇشىن كوپ نارسەنىڭ قاجەتى جوق, كىشكەنتاي مەيىرىم بولسا جەتكىلىكتى. سىيلىق لاۋرەاتتارىنىڭ ارقايسىسى – قۇرمەتكە لايىق ءارى قوعامعا قىزمەت ەتۋدىڭ, جانقيارلىق پەن باتىلدىقتىڭ ۇلگىسىن كورسەتكەن جاندار», دەپ اتاپ ءوتتى.
جوبانىڭ قۇرىلتايشىسى – قوعام قايراتكەرى, «جاندانۋ الەمى» قايىرىمدىلىق قورىنىڭ نەگىزىن قالاۋشى ءاليا نازارباەۆا. لاۋرەاتتاردى قولداپ, جىلى لەبىز ءبىلدىرۋ ءۇشىن ماراپاتتاۋ كەشىنە قازاقستاننىڭ ەڭ جاس كومپوزيتورى ءنۇرالي بەيسەقوجا, Mezzo توبى, «سلاۆيانسكي بازار ۆ ۆيتەبسكە» بايقاۋىنىڭ جەڭىمپازى امرە, قازاقستاننىڭ ەڭبەك سىڭىرگەن قايراتكەرى مايرا مۇحاممەدقىزى, قازاقستاننىڭ ەڭبەك سىڭىرگەن قايراتكەرى سۇندەت بايعوجين جانە تاعى باسقالار قاتىستى.
الماتى