مادەنيەت جانە سپورت مينيسترلىگى, «ازىرەت سۇلتان» مەملەكەتتىك تاريحي-مادەني قورىق-مۋزەيى ۇيىمداستىرعان «ياساۋي ىزىمەن» اتتى عىلىمي-ەكسپەديتسيا مۇشەلەرى وزبەكستان رەسپۋبليكاسى نامانگان قالاسىنان قوجا احمەت ياساۋي بابامىزعا قاتىستى شەجىرە مەن يسلام الەمىنە ايگىلى 11 شايىقتىڭ ەسىمى جازىلعان ءمور تاپتى.
بۇل جادىگەرلەر قوجا احمەت ءياساۋيدىڭ ۇرپاعى سانالاتىن عۇلاما عالىم يبراحيمجان شاريفحۋجاەۆتىڭ قولىندا ساقتالىپ كەلگەن ەكەن. قازىر 98 جاستاعى اقساقالدىڭ تۋعان جەرى – تۇركىستان قالاسى. بالا كەزى اتاسى قوجا احمەت ياساۋي كەسەنەسى ماڭىندا ءوتىپتى. اكەسىنە توپىراق تۇركىستاننان بۇيىرعان.
ءدىني سەنىمدەرگە قارسى اتەيستىك كوزقاراس دەندەپ, تاقۋا جاندار قۋدالاۋعا ءتۇسىپ, يسلام كىتاپتارى ورتەلگەن سوناۋ قيىن جىلدارى شاريفحۋجاەۆتەر اۋلەتى تۇركىستان قالاسىنان قونىس اۋدارىپ, 10 جاسار يبراحيمجان مەن اناسى ەكەۋى نامانگانعا باس ساۋعالاپتى. «بابا مۇراسى – ناسابناما (شەجىرە) مەن ءموردى امان ساقتاپ قالۋ ءۇشىن كوپ قيىندىق كوردىك» دەپتى قاريا. قۇندى مۇرانى ۇزاق جىل توپىراققا كومىپ جاسىرعان. جەر استىندا كوپ جاتقاندىقتان ناسابناما, ياعني شەجىرە جازبانىڭ كەيبىر بولىگىنىڭ بوياۋى ءوشىپ, ءشىري باستاعاندىقتان, قاريا كوزىنىڭ تىرىسىندە بۇل اماناتتى باباسى جاتقان كەسەنە قورىنا تابىستاۋدى ارمانداعان ەكەن.
ناسابناما-شەجىرەنىڭ ۇزىندىعى – 2,5 مەتر, شاعاتاي تىلىندە جازىلعان. مۇرا قاي عاسىرعا ءتان ەكەنى انىقتالۋ ۇستىندە. «الداعى ۋاقىتتا «ازىرەت سۇلتان» مەملەكەتتىك تاريحي-مادەني قورىق-مۋزەيى تاراپىنان بۇل جادىگەرگە قاتىستى تولىققاندى عىلىمي-زەرتتەۋ جۇمىسىن جۇرگىزۋ ءىسى قولعا الىنادى» دەيدى قورىق-مۋزەي قىزمەتكەرلەرى.
نامانگان عانا ەمەس بۇكىل وزبەك جۇرتى قۇرمەتتەيتىن عۇلاما عالىم يبراحيمجان اقساقالدىڭ سەگىز ۇل, ءۇش قىزىنان تاراعان ۇرپاق ۇلكەن اۋلەتكە اينالعان. «ۇل – قىزدارىم قوجا احمەت ياساۋي ۇرپاقتارىنان بولعاندىعىنا ماقتانادى. ۇلكەن ۇلىم ءدىني ءىلىمدى مەڭگەرىپ, مەنىڭ جولىمدى جالعاستىرۋدا» دەيدى قاريا.
يكرامجان قاجى ءۇيىنىڭ ءبىر بولمەسىن بوساتىپ, اتاسى قوجا احمەت ياساۋيگە ارناپ شاعىن كورمە اشىپتى. مۇندا ءياساۋيدىڭ شەجىرەسىنە قاتىستى ناسابنامانىڭ كوشىرمەسى مەن ءمورى جانە تۇركىستانعا قاتىستى سۋرەتتەر مەن كىتاپتار قويىلعان ەكەن.