بۇعان دەيىن ىندەت كورسەتكىشى بويىنشا ەلىمىزدىڭ اۋماعىندا «قىزىل ايماقتا» بىرنەشە اپتا بويى جالعىز قالعان پاۆلودار وبلىسى قازىر «سارى ايماققا» ءوتتى. بىراق اقسۋ قالاسى, جەلەزين, اققۋلى, اقتوعاي, شارباقتى جانە باسقا دا اۋداندار ءالى دە «قىزىل ايماق» قۇرساۋىندا.
ءوڭىردىڭ «سارى ايماققا» وتۋىنە وراي كارانتين شارالارى جەڭىلدەتىلدى. قازىر باياناۋىل, ماي جانە تەرەڭكول اۋداندارى «جاسىل ايماقتا» بولسا, پاۆلودار, ەكىباستۇز قالالارى مەن ەرتىس جانە ۋسپەن اۋداندارى – «سارى ايماقتا». وبلىستىق سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى باتىربەك اليەۆتىڭ ايتۋىنشا, كارانتيندىك شەكتەۋلەرگە بىرقاتار وزگەرىس ەنگىزىلدى. دەپارتامەنت ماماندارى تۇرعىندارعا سانيتارلىق تالاپتى ساقتاپ, مەديتسينالىق بەتپەردە كيۋ كەرەگىن, 65 جاستان اسقان ادامداردىڭ ۇيدە وتىرۋلارىن ەسكەرتۋدە.
– ءوڭىردىڭ «سارى ايماققا» وتۋىنە بايلانىستى كارانتيندىك شەكتەۋ شارالارى جەڭىلدەتىلدى. بىراق ناۋرىز ايىنداعى مەرەكە كۇندەرى تۇرعىنداردان سانيتارلىق تالاپتاردى ساقتاۋىن وتىنەمىز, – دەدى ب.اليەۆ وڭىرلىك كوممۋنيكاتسيالار قىزمەتى وتكىزگەن ونلاين ءباسپاسوز-كونفەرەنتسياسىندا.
وبلىستىڭ باس سانيتار دارىگەرىنىڭ №4 جاڭا قاۋلىسىنا سايكەس, كينوتەاترلار جۇمىسىنا رۇقسات بەرىلگەنىمەن, زالداردىڭ تولىمدىلىعى 20 پايىزدان اسپاۋى ءتيىس. وسى جاعدايعا بايلانىستى بۇعان دەيىنگى شەكتەۋ شارالارى جەڭىلدەتىلدى. ساۋدا ورىندارى اشىلدى.
– مادەني نىسانداردىڭ قىزمەتىنە رۇقسات بەرىلەدى. دايىندىق شارالارىنا قاتىساتىن ادامداردىڭ سانى 30 پايىزدان اسپاۋى ءتيىس. كىتاپحانا, مۋزەيلەردىڭ اشىلۋىنا رۇقسات بەرىلدى. كينوتەاتر مەن تەاترداعى كەلۋشىلەر سانى 20 پايىزدان اسپاۋى كەرەك, – دەدى ب.اليەۆ.
سونىمەن قاتار اپتانىڭ بارلىق كۇنىندە وبلىس ورتالىعىنداعى قوعامدىق كولىكتەر, قالاارالىق, اۋدانارالىق اۆتوبۋستار جولعا شىعاتىن بولدى. وڭىردەگى حالىققا قىزمەت كورسەتۋ ورتالىقتارى, «قازپوشتا» اق بولىمدەرى جۇمىس كۇندەرى ساعات 9:00-دەن 18:00-گە دەيىن جانە سەنبى كۇنى 9:00-دەن 14:00-گە دەيىن ىستەيدى. قوعامدىق تاماقتانۋ ورىندارى بارلىق كۇنى تاڭعى ساعات 7:00-دەن تۇنگى ساعات 00:00-گە دەيىن جۇمىس ىستەيدى. كەلۋشىلەر سانى 50 پايىزدان اسپاۋى كەرەك. مۇز ايدىندارى, ساۋنا, مونشا قىزمەتى دە ىسكە قوسىلدى.
بۇعان دەيىن وبلىستا 15 787 ادامنان ىندەت انىقتالسا, 14 450 ناۋقاس جازىلىپ شىققان, 107 ادام كوز جۇمدى. ال جىل باسىنان بەرى 6 656 ادام ىندەت جۇقتىرعان. وتكەن تاۋلىكتە وبلىستا 82 ادامنىڭ ىندەت جۇقتىرعانى انىقتالسا, بارلىعى – 17 617 (+82).
وڭىرلىك كوممۋنيكاتسيالار قىزمەتىندە وتكەن ءباسپاسوز ءماسليحاتىندا وبلىستىق ءبىلىم بەرۋ باسقارماسىنىڭ باسشىسى ءدىنيسلام بولاتحان ۇلىنىڭ مالىمدەۋىنشە, 1 ناۋرىزدان باستاپ 5-9 سىنىپ وقۋشىلارىنا مەكتەپكە كەلىپ ساباق وقۋعا مۇمكىندىك بەرىلدى.
– قازىر 500 بالادان استام كونتينگەنتى بار 238 قالا جانە اۋىل مەكتەپتەرى ءداستۇرلى فورماتتا وقىتۋدى باستايدى, – دەيدى د.بولاتحان ۇلى. – ءاربىر سىنىپتا 15 بالادان ارتىق توپ جيناۋعا تىيىم سالىنادى. 19 مىڭنان استام وقۋشى ءداستۇرلى وقۋعا كىرىسسە, 199 مەكتەپتەگى 40 مىڭنان استامى وقۋىن قاشىقتان جالعاستىرادى. مەكتەپتەن وقۋ ءۇشىن ارنايى انىقتامالاردىڭ قاجەتى جوق.
باسقارمانىڭ قوسىمشا مالىمەتىنشە, 11-سىنىپ وقۋشىلارى ءۇشىنشى توقساننان, ال 9-سىنىپ وقۋشىلارى 1 ناۋرىزدان باستاپ ارالاس وقۋ جۇيەسى بويىنشا ءبىلىم الۋدا. سونىمەن قاتار 1 ناۋرىزدان باستاپ جوعارى وقۋ ورىندارىندا ءبىلىم الاتىن 2 432 1-كۋرس ستۋدەنتتەرى ءداستۇرلى فورماتقا كوشىرىلەدى. بۇل ستۋدەنتتەردىڭ 40 پايىزىن قۇرايدى. قالعان ستۋدەنتتەر قاشىقتان وقي بەرەدى.
پاۆلودار وبلىسى