ءوڭىردىڭ يندۋستريالاندىرۋ كارتاسىنا 667,5 ملرد تەڭگەنىڭ 38 جوباسى ەنگەن, دەپ حابارلايدى Egemen.kz
وبلىس اكىمى دانيال احمەتوۆتىڭ حالىققا ەسەپ بەرۋ كەزدەسۋى بارىسىندا 2025 جىلعا دەيىن شىعىس قازاقستاندا 11,3 مىڭ جاڭا جۇمىس ورنى اشىلاتىنى بەلگىلى بولدى.
«2021 جىلى 3 مىڭنان استام جۇمىس ورنىن اشۋعا مۇمكىندىك بەرەتىن, قۇنى 498 ملرد تەڭگەگە كارتانىڭ 14 ينۆەستيتسيالىق جوباسىن ىسكە اسىرۋ جوسپارلانىپ وتىر. 700 جۇمىس ورنىن اشاتىن «KAZ MineralsAktogay» جشس-ءنىڭ اقتوعاي كبك ءوندىرىس قۋاتىن كەڭەيتۋ جوباسى ىسكە اسىرىلۋ ساتىسىندا. جوبانى 2021 جىلى پايدالانۋعا بەرۋ كوزدەلگەن. ال «قازاقمىس» كورپوراتسياسى «ايدارلى» مىس كەن ورنىن ونەركاسىپتىك يگەرۋمەن اينالىساتىن تاۋ-كەن بايىتۋ كومبيناتىن سالۋ» جوباسىن ىسكە اسىرۋدى باستادى», دەگەن اكىم بۇرىن توپىراعىنا قايلا ءتيىپ كورمەگەن اۋدانداردا سۇەيكتى جوبالار ىسكە اساتىنىن ءمالىم ەتتى.
«سونداي-اق, تارباعاتاي اۋدانىندا قۋاتتىلىعى جىلىنا 25 ملن تونناعا دەيىن كەن وندىرەتىن قىزىلقايىڭ كەن ۋچاسكەسىندە كەن بايىتۋ كومبيناتىن سالۋ جوسپارلانعان. يننوۆاتسيالىق دامۋ اياسىندا تراۆماتولوگيا جانە ورتوپەدياعا ارنالعان مەديتسينالىق يمپلانتانتتار ءوندىرىسى بويىنشا قازاقستاندا العاشقى تاجىريبەلىك-ونەركاسىپتىك ۋچاسكە قۇرىلدى. وتكىزگىشتىگى جوعارى سىمداردى دايىنداۋعا ارنالعان تەحنولوگيالار ازىرلەندى. «قازتسينك» جشس-مەن بىرلەسىپ ەلەكتروليتتىك تاسىلمەن مىرىشتى الۋ بويىنشا زەرتتەۋ جەلىسى قۇرىلدى. بۇل تەحنولوگيانى ونەركاسىپتىك اۋقىمدا ەنگىزۋ قىمبات تۇراتىن كوكس شىعىنىن 30%-عا دەيىن قىسقارتۋعا مۇمكىندىك بەرەدى. ال بۇل ءوز كەزەگىندە پارنيكتىك گازدار شىعارىندىلارىنىڭ سانىن قىسقارتادى», دەدى د.احمەتوۆ.