تالاي تار جول, تايعاق كەشۋدى باسىنان وتكەرگەن حالقىمىزدىڭ بولمىسىنداعى عاجايىپ قاسيەتتىڭ ءبىرى – جاتتى دا جارىلقاپ باۋىرىنا تارتاتىن ىزگى پەيىلى. جالپاق الەمدى جامان تۇماۋ جايلاپ, جان القىمنان الىپ تۇرعان كەزدە ادامداردىڭ ءبىر-بىرىنە قولۇشىن بەرۋى, قامقورلىق كورسەتۋى, پەرىشتەدەي قوس قولتىعىنان دەمەپ, جەبەۋى كىمنىڭ بولسىن كوكىرەگىندەگى سەنىم وتىن قولامتانىڭ شوعىنداي مازداتاتىنى بار.
بۇگىنگى تاڭدا وبلىستا 86 ەرىكتىلەر ۇيىمى جۇمىس ىستەيدى. ونىڭ ىشىندە جاس تولقىننىڭ ۇلەسى مول بولۋى ۇلبىرەگەن ءۇمىت وتىن مازداتىپ, كوڭىل قۋانتادى. وبلىستىق ءبىلىم بەرۋ جانە كاسىبي-تەحنيكالىق ءبىلىم سالاسىندا 800 وقۋشى مەن ءبىلىم الۋشىنى بىرىكتىرەتىن 33 جاساق بار. شىن مانىندە بۇل وتە ۇلكەن كۇش. ولاردىڭ 80 پايىزدان استامى قازاقستاننىڭ «ۇلتتىق ەرىكتىلەر جەلىسى» جۇيەسىنە كىرەدى. ءاربىر ەرىكتىلەر ورتالىعى 7 باعىت بويىنشا تىڭعىلىقتى جۇمىس ىستەپ, ءار سالانى تەگىس قامتۋعا ۇمتىلۋدا. قامقورلىق اياسىندا جاردەمگە مۇقتاج 24 444 ادام قامتىلىپ, ولارعا جالپى قۇنى 13,9 ملن تەڭگەنى قۇرايتىن دەمەۋشىلىك كومەك كورسەتىلدى. ءبىز بۇل كومەكتىڭ قۇنىن اقشالاي مولشەرلەپ قانا قويا سالۋىمىز مۇمكىن. شىنتۋايتىندا, ونىڭ استارىندا جانىڭدا جۇرگەن ادامدارعا دەگەن جۇرەك جىلۋى, كوڭىل دەمدەيتىن ىزگى نيەت جاتقاندىعىن ايتا كەتسەك تە ارتىقتىعى بولماس. وزگەگە كومەك قولىن سوزۋعا ۇمتىلىپ تۇرعان جاناشىر جانداردىڭ ىشىندە جاس تولقىننىڭ بولۋى, بولىپ قانا قويماي, وزدەرى دە وسى يماندى ىسكە بەل بۋا كىرىسىپ, قولدارىنان كەلگەن كومەگىن كورسەتىپ جاتۋى تاماشا كورىنىس. كۇنى ەرتەڭ وسى جاستار مەيىر مەن پەيىلگە سۋسىنداپ, قولى اشىق, جۇرەگى جىلى, نيەتى دۇرىس ازامات بولىپ وسەدى.
وڭىردەگى وسى باعىتتاعى ىسكە سارالاي كوز سالاتىن بولساق, اۋىز تولتىرىپ ايتۋعا ابدەن لايىقتى ءتاپ-ءتاۋىر شارۋالار قولعا الىنعان ەكەن. ماسەلەن, وبلىس بويىنشا وتكەن جىل ىشىندە 552 قايىرىمدىلىق شارا ۇيىمداستىرىلىپ, 26 649 ادامدى قامتىعان. قولى قىسقا, الەۋمەتتىك جاعىنان از قامتىلعان 12 121 وتباسىنا, مۇمكىندىگى شەكتەۋلى ادامدارعا كومەك كورسەتىلگەن. ءتىپتى ۇيلەرىنە تازا اۋىز سۋ دا جەتكىزىپ بەرگەن. اتام قازاقتىڭ «قىسىلعاندا اۋزىڭا سۋ تامىزاتىن ادام بولسىن» دەيتىن تىلەگىنىڭ ورىندالعان تۇسى ما دەرسىڭ. جاڭاعى جاناشىرلار جامان تۇماۋدىڭ جان تىتىركەنتەر شاعىندا 45 360 ليتر اۋىز سۋ جەتكىزىپتى. وعان قوسا 1 571 ازىق-ت ۇلىك سەبەتىن قوسا تاپسىرعان. ءبىزدىڭ ءوڭىردىڭ وزىندىك ەرەكشەلىگى بار, قىسى قاتتى. اتان تۇيەنى الىپ جىعاتىن اقىرعان ايازىمەن قوسا, ات قۇلاعى كورىنبەيتىن اق تۇتەك بورانى دا از ەمەس. بيىل دا قار قالىڭ بولدى. اۋلالاردى باسىپ قالدى. قارعا ادىم جەر مۇڭ بولىپ وتىرعان مۇمكىندىگى شەكتەۋلى ادامدارعا تاڭسارىدەن تىربانىپ اۋلانى قالىڭ قاردان تازالاۋدىڭ ءوزى تيتىعىنا تيەتىن ازاپتى جۇمىس. مەكتەپ وقۋشىلارى مەن كوللەدجدەردە ءبىلىم الاتىن جالىندى جاستار جۇزدەگەن اۋلالاردى تازارتىپ, اعا بۋىننىڭ العىسىن العان. 162 مارتە ماتەريالدىق كومەك كورسەتىلىپتى. جوعارىدا اۋا رايىنىڭ قاتەرى كوپ ەكەندىگىن ايتتىق. جول ۇستىندە كولىگى سىنىپ, قارعا كەپتەلىپ, قاتەر اۋزىندا قالىپ جاتقاندار دا از ەمەس. وزگەگە دەگەندە قوڭ ەتىن كەسىپ بەرۋگە دايار ەرىكتىلەر جولدا قالعان 60 اۆتوكولىكتى قاردان ارشىپ, جولاۋشىلاردى قۇتقارىپتى. 130 جۇرگىزۋشىگە كومەك كورسەتىلگەن.
قايىرىمدى جاستار قارتتاردى نازارىنان ەش شىعارمايدى. جان جىلۋىن سەبەزگىلەگەن كومەك الدىمەن زامانىندا وسى قوعامنىڭ بايلىعىن ەسەلەۋگە ولشەۋسىز ۇلەس قوسقان قارتتارعا كورسەتىلەدى. وتكەن جىلى جۇزدەگەن قارت ادام جاستاردىڭ قولعابىسىن كورىپ, كوڭىل دەمدەگەن. ولارعا 475 مارتە ءدارى-دارمەك جەتكىزىپ بەرىلدى. جامان تۇماۋ قاتال سىناق بولدى. دەرت شەڭگەلىنە ىلىككەندەر دە ەرىكتىلەردىڭ جان جىلۋىن سەزىندى. اۋرۋحانالارعا 94 وتتەگى كونتسەنتراتتارى, 4 تونومەتر, 6 پلانشەت اپەرىلگەن. وسى ىسكە قالتالى ازاماتتار 49,4 ملن تەڭگە قاراجات بولگەن.
وبلىستا رەسپۋبليكالىق ء«بىز بىرگەمىز» اكتسياسى اياسىندا «تازا الەم» باعىتىندا بىرقاتار شارۋا اتقارىلۋدا. اۋقىمدى ءىستى قولعا العان ەرىكتىلەر بىرنەشە ۇيىممەن بىرلەسە وتىرىپ, ءوڭىردىڭ ەكولوگيالىق جاعدايىن جاقسارتۋعا اتسالىسۋدا. ەرەيمەنتاۋ اۋدانىنىڭ ەرىكتىلەرى كوبەيتۇز جانە تەڭىز كولدەرىنىڭ ماڭىن تازارتىپ, اباتتاندىردى. سوڭعى ۋاقىتتا بۇل جەرلەرگە ات ءىزىن سالۋشىلار كوپ. كەلىمدى-كەتىمدى كىسى كوپ بولعان سوڭ كول ماڭىن قوقىس باسىپ كەتۋ دە مۇمكىن ەدى. تابيعاتقا جاناشىر ەرىكتىلەر كول جاعالاۋلارىن تازارتىپ قانا قويماي, تىنىعۋعا كەلگەن ادامدارعا ءتول تابيعاتىمىزدىڭ تاماشا كورىنىسىن ساقتاۋ – پەرزەنتتىك پارىز ەكەنىن ۇعىندىردى. ارشالى اۋدانىنداعى بىرنەشە تۋريستىك باعىتتا ءدال وسىنداي ءىس جۇزەگە اسىرىلدى. قورعالجىن اۋدانىندا دا كورىكتى تابيعاتتىڭ كەسكىنىنە تۇسەتىن قىلاۋدىڭ الدىن الۋعا جۇمىلا كىرىستى. بىرنەشە مارتە سەنبىلىك ۇيىمداستىرىلدى. ەگىندىكولدەگى اگروتەحنيكالىق كوللەدجدىڭ ەرىكتىلەرى جوعارىدا اتالعان اكتسيا شەڭبەرىندە ناتيجەلى جۇمىس ىستەدى. ەلۋدەن استام ەرىكتى تۋعان جەردىڭ ءتوسىن كوركەيتۋگە اتسالىسىپ, ءوز قولدارىمەن تازالىق شارالارىن تياناقتى اتقاردى. وڭىردە جالپى وسى تاقىلەتتەس جۇمىسقا 3 مىڭنان استام ەرىكتىنىڭ قاتىسقانىن ايتاتىن بولساق, ءوز ەلىن, ءوز جەرىن جانىنداي جاقسى كورىپ, ونىڭ ەرتەڭىنە ەلەڭدەيتىن جاس تولقىننىڭ قاۋلاپ ءوسىپ كەلە جاتقانىن ايقىن كورۋگە بولادى.
قايىرىمدىلىق جاساۋدىڭ Qamqor باعىتى بويىنشا اسىرەسە وبلىس ورتالىعىندا اۋىز تولتىرىپ ايتۋعا ابدەن لايىقتى شارۋالار جۇزەگە اسىرىلدى. بۇل ورايدا ناقتى مەكەنجاي بويىنشا كوپتەگەن شارۋا اتقارىلدى. ەرىكتىلەر قولى قىسقا ادامداردىڭ اۋلالارى عانا ەمەس, پاتەرلەرىن دە تازالاۋعا قولۇشىن سوزدى. وسىلايشا, 114 وتباسىنا كومەك كورسەتىلدى. جاستار رەسۋرستارى ورتالىقتارى جاناشىرلىق جاساۋدىڭ ايقىن ۇلگىسىن كورسەتتى. 2020 جىلى گەرمانيا قىزىل كرەست قوعامى اقمولا فيليالىنا 1 ملن 011 مىڭ تەڭگە كولەمىندە كومەك كورسەتىلدى. وسى قارجىعا سەبەتتەر دايىندالدى. قاجەتتى ازىق-ت ۇلىكپەن قاتار گيگيەنالىق قۇرالدار دا الىندى. ءار سەبەتتىڭ قۇنى شامامەن 8 220 تەڭگەنى قۇرادى.
جامان تۇماۋ جايىلعان كەزدە ەرىكتىلەر ماتەريالدىق كومەكپەن بىرگە اۋرۋدىڭ الدىن الۋ باعىتىندا دا قىرۋار جۇمىس ىستەدى. دەرت شەڭگەلىنە ىلىنبەۋ ءۇشىن قالاي قورعانۋ كەرەكتىگىن ءتۇسىندىرىپ, وبلىس ورتالىعىنداعى كوپ قاباتتى ۇيلەر مەن جەكە سەكتورعا قۇلاقتاندىرۋلار تۇرىندەگى تۇسىنىكتەمە قاعازدارىن تاراتتى. بۇل دا ادامداردى اراشالاۋ باعىتىنداعى باعالى باستاما دەپ ايتۋعا ابدەن بولادى.
اقمولا وبلىسى