سقو-دا پوليتسەيلەر قاتتى بوراندا اداسىپ كەتكەن كامەلەتكە تولماعان ەكى بالانى امان الىپ قالدى, دەپ حابارلايدى Egemen.kz Polisia.kz سايتىنا سىلتەمە جاساپ.
18 اقپاندا ساعات 20 شاماسىندا ەسىل اۋدانى پوليتسيا ءبولىمىنىڭ كەزەكشى بولىمىنە بىرلىك اۋىلىنىڭ ماڭىندا ەكى بالانىڭ اداسىپ كەتكەنى جايلى حابارلاما كەلىپ تۇسكەن. 17 جانە جەتى جاستاعى اعايىندىلار شاناعا جەگىلگەن اتپەن ەسىل وزەنىنىڭ جاعاسىندا جايىلىپ جۇرگەن جىلقىلاردىڭ تابىنىن قاراۋعا شىققان. كوپ ۇزاماي قار جاۋىپ, سوڭى قاتتى جەلگە ۇلاسقان, ال بالالار وزدەرىمەن بىرگە تەلەفوندارىن الماعان. ەسىل اۋدانىنىڭ پوليتسيا ءبولىمىنىڭ باستىعى ەرلىك ەسلامبەكوۆتىڭ ايتۋىنشا, ىزدەۋدى ءوز قولىنا الىپ, حابارلاما العاننان كەيىن ۋاز «پاتريوت» اۆتوماشيناسى جانە ءۇش قاردا جۇرەتىن كولىكپەن اۋداندىق ءبولىمنىڭ تاجىريبەلى قىزمەتكەرلەرىنەن قۇرالعان توپپەن بىرلىك اۋىلىنا جول تارتقان. تجب قىزمەتكەرلەرىمەن, قورىقشىلار جانە جەرگىلىكتى تۇرعىندارمەن بىرلەسە پوليتسەيلەر جوعالعان بالالاردى شۇعىل ىزدەۋگە كىرىسكەن.
توڭىرەكتى ماشينالارمەن, قاردا جۇرەتىن كولىكتەرمەن جانە جىلقىلارمەن ارالاپ شىققان, اۋىل تۇرعىندارى تج تۇسىنىستىكپەن قاراپ, 40 شاقتى اۋىلدىق, ونىڭ ىشىندە سالت اتپەن شىققاندار ىزدەۋ جۇمىسىنا بەلسەندى كومەك قولىن سوزدى. قولايسىز اۋا رايى جۇمىستى قيىنداتا تۇسكەنىمەن, ءار ساناۋلى ءسات اسا قىمبات بولدى. اينالانىڭ كورىنبەۋى ىزدەۋ جاساعىنا, ولاردىڭ ۇيىتقىعان بوران مەن قالىڭ قاردا اداسۋىنا قاۋىپ تۋعىزدى. سوندىقتان ىزدەۋگە جۇپ بولىپ شىعىپ, ساقتىق شارالارىن ساقتاۋعا تۋرا كەلدى.
قاردا جۇرەتىن كولىكتەردىڭ ۇتقىرلىعى وسىنداي قولايسىز اۋا رايىندا اسا تيىمدىلىگىن كورسەتتى: كريمينالدىق پوليتسيا بولىمشەسىنىڭ باستىعى مۇراتبەك اياعانوۆ پەن اۋىل تۇرعىنى ابزال سادۋاقاسوۆ بالالاردى ءبىرىنشى بولىپ كورگەندەردىڭ ءبىرى. اۋىلدان بىرنەشە شاقىرىم جەر بولاتىن, ساعات ءتىلى 23.30-دى كورسەتتى. ۇلكەن اعاسى ۇستىندەگى بار سىرت كيىمىن شەشىپ, باۋىرىن وراپ, ارقاسىنا مىنگىزىپ العان… بالالار ابدەن شارشاعاندىقتان, سويلەۋگە دە شامالارى كەلمەگەن. قاتتى بوران باستالعان كەزدە شاناداعى جەگىلگەن جىلقى ولاردى ۇيدەن قاراما-قارسى باعىتقا قاراي جۇرگەن. پوليتسەيلەر, اۋىل تۇرعىندارى, قورىقشىلار مەن قۇتقارۋشىلاردىڭ كۇش بىرىكتىرۋىنىڭ ارقاسىندا وكىنىشتى جاعدايعا جول بەرىلمەي, بالالار امان-ەسەن اتا-اناسىنا ورالدى.
ايتا كەتەتىنى, جەرگىلىكتى بلوگەرلەر مەن جۋرناليستەر اۋداندىق پوليتسەيلەر مەن اۋىل تۇرعىندارىنىڭ ءىس-ارەكەتتەرىن لايىقتى باعالاپ, سول كۇنى تۇندە Facebook-تە پوگونداعى قۇتقارۋشىلاردىڭ اتىنا العىس بىلدىرىلگەن پوستتارىن ورنالاستىرعان.