كەشە پەتروپاۆلداعى الەۋمەتتىك جەلىلەردىڭ قولدانۋشىلارى ينتەرناتسيوناليست-جاۋىنگەرلەردىڭ ەسكەرتكىشىنە قويىلعان گۇل شوقتارىن بىرەۋ شاشىپ كەتكەن دەپ شۋلاتقان بولاتىن, دەپ حابارلايدى Egemen.kz
كەيبىر بەلسەندىلەر ءتىپتى بۇدان ساياسي استار ىزدەپ, بۇل قاسكويلەردىڭ قاساقانا ارەكەتى, اۋعانستان سوعىسىنا قاتىسۋشىلاردىڭ رۋحىن اياققا باسۋ دەگەن سياقتى پىكىرلەرىن ءبىلدىرىپ جاتتى.
پەتروپاۆل قالالىق پوليتسياسى جەدەل ارەكەت جاساپ, گۇلدەردىڭ شاشىلۋى مەن جوعالۋىن تەكسەرگەن. سويتسە, جەلمەن شاشىلعان گۇلدەردى سول جەردى سىپىرىپ, تازالاپ جۇرگەن كوممۋنالدىق شارۋاشىلىق قىزمەتكەرلەرى جيناپ الىپ, قوقىسقا تاستاعان ەكەن. ەسكەرتكىش الاڭىنىڭ ماڭىنداعى كامەرانىڭ بەينەجازباسىندا ولاردىڭ جيناعان گۇلدەر مەن گۇل شوقتارىن قوقىس جاشىكتەرىنە اپارىپ تاستاعانى انىق كورىنگەن. پەتروپاۆل قالاسى پوليتسيا باسقارماسىنىڭ باسشىلىعى «كوممۋنحوز» جشس وكىلدەرىمەن پروفيلاكتيكالىق اڭگىمە جۇرگىزۋ بارىسىندا, بۇدان بىلاي قالا تۇرعىندارىنىڭ كوڭىلدەرىنە قاياۋ تۇسىرەتىن ءىس-ارەكەت جاساماي, ەسكەرتكىشكە قويىلعان گۇل شوقتارى مەن گۇلدەردى قوقىسقا لاقتىرۋعا جول بەرمەۋ تۋرالى ەسكەرتتى.