كوكشەتاۋدا تاعى ءبىر وتباسى باسپانالى بولدى. وبلىس ورتالىعىنداعى ناۋان حازىرەت اتىنداعى ورتالىق مەشىت پەن «زەكەت» كورپوراتيۆتىك قايىرىمدىلىق قورى «ەل ۇلەسى – پاتەرگە!» جوباسى اياسىندا قالا تۇرعىنى نۇرلان ابەن ۇلىنا ەكى بولمەلى پاتەردىڭ كىلتىن تابىس ەتتى.
ءوزى دە وزگەگە جاناشىرلىق جاساۋعا ۇمتىلىپ تۇراتىن يمام نۇرلان ابەن ۇلىنىڭ وتباسى ءۇشىن اق تۇيەنىڭ قارنى جارىلعان كۇن بولدى. التى بىردەي پەرزەنتىن تاربيەلەپ وتىرعان اتا-انا باسپانالى بولعان ساتىندە اق العىستارىن جاۋدىرىپ, ريزاشىلىقتارىن ءبىلدىردى.
وڭىردە جاقسىلىق شاراپاتىمەن تالاي جاننىڭ العىسىن يەلەنىپ كەلە جاتقان بۇل جوبا بويىنشا بۇگىنگە دەيىن 15 وتباسى جايلى پاتەرمەن قامتىلىپ وتىر. قازاقستان مۇسىلماندارى ءدىني باسقارماسىنىڭ اقمولا وبلىسىنداعى وكىل يمامى قۋانىش ءسابيتتىڭ ايتۋىنا قاراعاندا, شاراپاتى مول جوبا اياسىندا ەلىمىز بويىنشا بۇگىنگە دەيىن مۇقتاج ادامدارعا 349 پاتەر سىيلانعان ەكەن. يگى باستاما الداعى ۋاقىتتا دا جالعاسىن تاپپاق.
كوكشەتاۋ