قازىرگى ءبىلىم بەرۋ جۇيەسىندە باسەكەگە قابىلەتتى مامان دايىنداۋ, جاستارعا پايدالى ءبىلىم بەرۋ, تەوريانى وندىرىسپەن ۇشتاستىرا وقىتۋ جۇيەسى جانە تەحنيكالىق, كاسىپتىك ماماندار دايارلاۋعا ايرىقشا ءمان بەرىلۋدە. ويتكەنى, ەكونوميكالىق قۋاتى ارتقان كەزەڭدە بىلىكتى, كاسىبي ماماندارعا ءبىزدىڭ وڭىرىمىزدە دە سۇرانىس جوعارى.
وسى ماقساتتا تاجىريبەگە باعىتتالعان وقىتۋ باعدارلاماسى بارىنشا ۇيلەسىممەن بىرىكتىرىلىپ, بىلىكتى مامانداردى دايىنداۋ, قازىرگى كەزدە ءبىلىم بەرۋدىڭ ءبىر جۇيەسى رەتىندە قولدانىلۋدا.
قويىلعان باستى مىندەت - مەملەكەتتىك قۇرىلىمداردىڭ كۇشىن بىرىكتىرۋ, جۇمىس بەرۋشىلەر مەن وقۋ ورىندارىن وبلىستىق كاسىپورىندار مەن ونەركاسىپتەردى بىلىكتى ماماندارمەن قامتاماسىز ەتۋ ماسەلەسىندە جۇمىلدىرۋ.
جالپى تەوريالىق ءبىلىم تاجىريبەمەن ۇشتاسقاندا عانا مامان ءوز كاسىبىنە توسەلەدى. وسى ورايدا, وبلىستا ستۋدەنتتەردى وندىرىستىك تاجىريبەگە تارتۋ جۇمىسىنا دا ەلەۋلى كوڭىل بولىنۋدە.
جۇمىس بەرۋشىلەردىڭ قاتىسۋىنسىز ەكونوميكاعا بىلىكتى كادرلاردىڭ اسپاننان جاۋمايتىنى انىق. وسىنى ەسكەرگەن ش. ەسەنوۆ اتىنداعى تەحنولوگيالار جانە ينجينيرينگ ۋنيۆەرسيتەتى مەن «قاراجانباسمۇناي» اق كومپانياسى 2020-2021 وقۋ جىلىنىڭ باسىندا ىنتىماقتاستىق كەلىسىمشارتتارعا قول قويىپ, تىعىز بايلانىس ورناتقان بولاتىن. اقپان ايىنىڭ 5-نەن باستالعان تاجىريبە الاڭىنا «ينجينيرنگ» فاكۋلتەتىنىڭ ءبىر توپ ستۋدەنتتەرى وندىرىسكە اسا قاجەتتى حيميالىق سۋ تازارتۋ اپپاراتشىسى, ەلەكترومونتەر, توكار, باقىلاۋ-ولشەۋ قۇرىلعىلارى جانە اۆتوماتيكا بويىنشا جوندەۋشىلەر, دەفەكتوپيست سياقتى ماماندىقتارى بويىنشا بارۋعا جولداما الدى.
مۇنىڭ بارلىعى – باسەكەگە قابىلەتتى مامان بولامىن دەگەن جاندارعا جاسالعان بىردەن-ءبىر مۇمكىندىك. اتالعان جوبا بويىنشا ستۋدەنتتەردىڭ ءبىلىمىن جەتىلدىرۋ ماقساتىندا قولعا الىنعان جۇمىستاردىڭ ءبىرى – شتاتتىق قىزمەتكەرلەر سياقتى بارلىق جاعدايىنىڭ قامتاماسىز ەتىلۋى ەدى. وسى تۇرعىدا جوبا بويىنشا بارلىق شىعىندى مەكەمە ءوز مىندەتىنە الدى.
- مۇنىڭ بارلىعى بىلىمگە, كاسىبي بىلىكتىلىككە ءجىتى نازار اۋدارىپ, جاستاردىڭ ساپالى مامان يەسى بولىپ شىعۋىنا جاسالعان جاعداي دەپ بىلەمىن. ستۋدەنتتەر وسى الەۋمەتتىك سەرىكتەستەرمەن تەوريا مەن تاجىربيەنى ۇشتاستىرىپ جۇمىستار جاساۋدا جانە ولار وندىرىستىك ماشىقتانۋ كەزىندە وزات ءىس تاجىريبەلى مامانداردان ۇيرەنىپ, جاڭا جابدىقتالعان تەحنولوگيانى مەڭگەرەدى. وقۋ كۋرسىنا بايلانىستى 8-10 اي كولەمىندە جۇمىستار جاسايدى. ناتيجەسىندە ەڭبەك كىتاپشاسىندا كەن ورنىندا تاجىريبەدەن وتكەندىگى جازىلادى. ءبىر قۋانتارلىعى, ۋنيۆەرسيتەتتى «قاراجانباسمۇناي» اق كومپانياسى قولداۋعا اركەز ىنتالى. ياعني, وزدەرىنە قاجەتتى بولاشاق ماماندى ماقساتتى وقىتىپ نەمەسە ستۋدەنتتەردى ەڭ العاشقى كۋرستان باستاپ وندىرىستىك تاجىريبەدەن وتكىزىپ, كەيىن جۇمىسقا شاقىرۋدى كوزدەيدى.
قورىتا كەلە, ءبىزدىڭ باستى باعىتىمىز – ءوزىنىڭ تۋعان جەرى مەن ەلىن سۇيەتىن, ءبىلىمدى دە بىلىكتى, ۇتقىر ويلى ۇرپاقتار تاربيەلەۋ. ستۋدەنتتەرىمىز ساپالى ءبىلىم الىپ, وتانعا دەگەن پاتريوتتىق سەزىمىن, ەلىنە دەگەن سۇيىسپەنشىلىگىن بولاشاققا دەگەن نىق سەنىممەن قادام باسىپ, قوعامعا قاجەتتى مامان يەسى بولادى دەپ سەنىم ارتامىن, دەيدى بولەكباەۆا گۇلميرا جايبەرگەنقىزى.