وكىنشكە قاراي, تاس جولدارداعى جول جامىلعىسىنىڭ ساپاسى جاقسارعان سايىن جول-كولىك وقيعالارىنىڭ سانى دا ارتىپ كەلەدى. رەكونسترۋكتسيالانىپ جاتقان ۋچاسكەلەردەگى جول بەلگىلەرىنە قاراماستان, جۇرگىزۋشىلەر جول ءجۇرۋ ەرەجەلەرىن بۇزۋدا, دەپ حابارلايدى Egemen.kz يندۋستريا جانە ينفراقۇرىلىمدىق دامۋ مينيسترلىگىنە سىلتەمە جاساپ.
كوبىنە
جۇرگىزۋشىلەر اينالما جولداردان جاڭا جول جامىلعىسى بار ۋچاسكەلەرگە شىققاندا, جىلدامدىقتى شامادان تىس اسىرىپ جاتادى. ال بۇل جول اپاتىنىڭ ورىن الۋىنا اكەلىپ سوعادى. ماسەلەن, بيىل 1 قاڭتاردان باستاپ الماتى, قاراعاندى, اقتوبە, اتىراۋ, شىعىس قازاقستان جانە قوستاناي وبلىستارىنداعى جاڭارتىلىپ جاتقان جانە جىلدامدىقتى شەكتەۋ بەلگىلەرى ورناتىلعان تاس جولداردا 14 جول اپاتى ورىن العان.
جول كولىك وقيعالارى «الماتى-وسكەمەن», «اقتوبە-اتىراۋ-استراحان», «ەكاتەرينبۋرگ-الماتى», «الماتى-تاشكەنت-تەرمەز», «ومبى-مايقاپشاعاي», «قىزىلوردا-پاۆلودار», «قارابۇتاق-كومسومولسكوە-دەنيسوۆكا-قوستاناي» اۆتوجولدارىنىڭ رەكونسترۋكتسيالانعان ۋچاسكەلەرىندە ورىن العان. سالدارىنان 12 ادام مەرت بولىپ, 20 ادام جاراقات الدى.
قر يندۋستريا جانە ينفراقۇرىلىمدىق دامۋ مينيسترلىگىنىڭ اۆتوموبيل جولدارى كوميتەتى كولىك يەلەرىن قاراپايىم جول ءجۇرۋ ەرەجەلەرىن ساقتاپ, جول بەلگىلەرىندەگى اقپاراتتى ەلەپ-ەسكەرۋگە شاقىرادى.
ايتا كەتۋ كەرەك, 2021 جىلدىڭ 15 اقپانىنداعى جاعداي بويىنشا رەسپۋبليكالىق اۆتوموبيل جولدارىندا 199 جكو ورىن العان. سالدارىنان 75 ادام قازا تاۋىپ, 334 ادام ءتۇرلى دەڭگەيدەگى دەنە جاراقاتىن الدى.