جۋىردا عانا نيدەرلاندتىڭ حەرەنۆەن قالاسىندا كونكيمەن جۇگىرۋدەن جەكەلەگەن قاشىقتىق بويىنشا الەم بىرىنشىلىگى ءوز مارەسىنە جەتتى. بۇل سىنعا دميتري بابەنكو باپتايتىن قازاقستاندىقتار دا قاتىسقان بولاتىن.
ۇلتتىق قۇراما جاتتىقتىرۋشىسى الەمدىك دودانى قورىتىندىلاپ, سپورتشىلار ناتيجەسىنە باعاسىن بەردى. «الەمدىك جارىستارعا دايىندىق كەزەڭى وتە قيىن جاعدايدا ءوتتى. دەسە دە, الەم چەمپيوناتىنا جەڭىپ العان جولدامالار سانى بويىنشا رەكورد ورناتتىق. كەيىنگى 20 جىلدا ءبىزدىڭ كوماندا ساپىنان مۇنشا سپورتشى الەم چەمپيوناتىنا قاتىسپاعان. سوندىقتان بىرىنشىلىك ءبىز ءۇشىن ءساتتى ءوتتى دەپ ەسەپتەيمىن», دەيدى ول.
ايتا كەتەيىك, جاھاندىق دودادا 1500 مەترگە جارىسۋدان ەكاتەرينا ايدوۆا مەن نادەجدا موروزوۆا قازاقستاندىقتار اراسىندا ەڭ ۇزدىك ناتيجەگە قول جەتكىزدى. ەكى سپورتشى وندىقتىڭ قاتارىنان كورىندى. دەميان گاۆريلوۆ, دميتري موروزوۆ پەن ۆيتالي ششيگولەۆ كوماندالىق جارىستا التىنشى ورىندى قاناعات تۇتتى.