قىسىلتاياڭ شاقتا قولى قىسقا ادامداردى قولتىعىنان دەمەپ, جاناشىرلىق جاساۋ شىنايى ادامگەرشىلىكتىڭ بەلگىسى. كوكشەتاۋلىق جاستار جالپاق الەمدى «جامان تۇماۋ» جان القىمنان العان كەزدە بىرلىكتىڭ بۇزىلماس قامال ەكەندىگىن وزدەرىنىڭ ىزگى نيەتتى ءىس-قيمىلدارىمەن كورسەتىپ وتىر.
جاس تولقىن كومەك قاجەت ەتكەن ادامداردى جۇرەك جىلۋىمەن نۇرلاندىرىپ, سەنىمدەرىن ارتتىرا تۇسۋدە. ءتىپتى, ەڭ باستىسى ماتەريالدىق كومەك تە ەمەس, دەرت شەڭگەلىنە ىلىگىپ, سىرقاتتانىپ جاتقانداردى ءبىراۋىز جىلى سوزدەرىمەن دەمەگەندەرىنىڭ ءوزى نەگە تۇرادى؟! Jas otan جاستار قاناتىنىڭ ەرىكتىلەرى بىلتىر جۇزدەن استام ازاماتقا جاناشىرلىق جاساپ, كومەك كورسەتتى. ونىڭ ۇستىنە ەل تۇتاستىعىن مەڭزەيتىن, بەكەم بىرلىكتىڭ ءتىنىن مىقتاي تۇسەتىن ء«بىز بىرگەمىز!» اكتسياسى اياسىندا دا ونداعان وتباسىنا دەمەۋشىلىك جاسادى.
جاسوتاندىقتار وبلىس ورتالىعىندا عانا ەمەس, ءاربىر اۋداندا اتقارىلاتىن قايىرىمدىلىق شارالاردىڭ جول كارتاسىن ازىرلەۋ ۇستىندە. ءبىرىنىڭ جاقسى ءىسىن ءبىرى كورىپ سۇيسىنگەن, يماندى شاراعا وزدەرى دە اتسالىسقىسى كەلگەن جاستاردىڭ قاتارى كۇن سايىن وسە تۇسۋدە. بۇگىندە 5 مىڭنان اسىپ جىعىلادى. نەگىزگى توپ – كوكشەتاۋ قالاسىندا. وبلىس ءوڭىرىن تۇتاس قامتىپ, ىزگىلىك نۇرىن شىمىرلاي ءسىڭىرۋ ءۇشىن ءاربىر قالا مەن اۋداندا كوۆوركينگ ورتالىقتارى ۇيىمداستىرىلعان. كەشەگى «قىزىل ايماقتا» تۇرعان كەزدە بۇل ورتالىقتاردا جۇمىس قايناپ جاتتى. ءالى دە باسەڭدەگەن جوق. ءوڭىر «قىزىل ايماقتان» شىققانىمەن, كومەكتى قاجەت ەتەتىندەر قاتارى سەيىلە قويعان جوق.
بىلتىرعى ناۋرىز ايىنان بەرى جاستار قاناتىنىڭ بەلسەندىلەرى وڭىردە قولعا الىنعان بارلىق جاناشىرلىق شارالارعا ۇزبەي قاتىسىپ, وزدەرىنىڭ بويلارىنداعى ادام سۇيسىنەرلىك ادەمى قاسيەتتەردى تانىتىپ-اق كەلەدى. ءتىپتى, تۇنەرىپ كەلگەن تۇيتكىل قيىندىقتان سەسكەنەتىن ەمەس. باستارىن بايگەگە تىگىپ ءجۇرىپ ەل باسىنا تۇسكەن اۋىرتپالىقپەن الىسۋدا.
– جاستار ازىق-ت ۇلىك سەبەتتەرىن, ءدارى-دارمەكتەر مەن كۇندەلىكتى تۇرمىسقا قاجەتتى زاتتاردى مۇقتاج وتباسىلارعا جەتكىزىپ بەرۋدە, – دەيدى Jas otan جاستار قاناتى وبلىستىق فيليالىنىڭ توراعاسى سۇلتان بەكەشەۆ, – ءارتۇرلى باعىتتا جۇمىس ىستەۋدە, سونىڭ ىشىندە «ديسپەتچەرلىك قىزمەت» دەپ اتالاتىن جوبا وتە ءتيىمدى. بۇل جوبا اياسىندا مۇمكىندىگى شەكتەۋلى ادامدارعا كومەك كورسەتىلەدى. ولار وسى قىزمەت تۇرىنە حابارلاسا الادى, جاستار بولسا ءوتىنىشتىڭ ەشقايسىسىن جەردە قالدىرماي, بىردەن كومەك كورسەتەدى. وتكەن جىلى جۇزدەگەن مۇمكىندىگى شەكتەۋلى ادامعا وسىنداي ادىسپەن كومەك كورسەتىلدى. ەندىگى ءبىراۋىز تولتىرىپ ايتۋعا لايىقتى دۇنيە – «جاس ساياساتكەرلەر كلۋبى», «اۋلا الاڭدارى» جوبالارى. بۇل جوبالاردىڭ اياسىندا ەرىكتى جاستاردىڭ بويلارىنداعى تاماشا قاسيەتتەردى ۇشتاپ, بەلسەندىلىكتەرىن ارتتىرا ءتۇسۋ كوزدەلگەن.
جاسوتاندىقتاردىڭ قاتارىنا قابىلدانعان سوڭ بىردەن بەلسەندى ءىس-قيمىلعا كوشكەن جاستىڭ ءبىرى – ومار بەكين. ول بىلتىر ايرىقشا بەلسەندىلىگى ءۇشىن «حالىق العىسى» مەدالىمەن ماراپاتتالدى. ءسوز اراسىندا وڭىردەگى ەڭبەگى ەلەنگەن قۇربىلارىنىڭ ىشىندەگى ەڭ جاسى ەكەندىگىن ايتا كەتۋگە بولار.
– جالپى جاستاردىڭ وسى ءبىر ىزگىلىككە تولى يماندى شارۋاسىن ايتا جۇرگەن ءجون. سوندا ءبىزدىڭ زامانداستارىمىز قۇلاقتانىپ, ورتاق ىسكە ۇلەستەرىن قوسىپ, توپتاسا تۇسەدى. مىسالى, ءوزىم نازارباەۆ زياتكەرلىك مەكتەبىندە جۇرگىزىلگەن ۇگىت-ناسيحات شاراسىنان سوڭ قوسىلدىم, – دەيدى Jas otan جاستار قاناتىنىڭ بەلسەندىسى ومار بەكين, – سول كەزدەسۋدە «دۋمان» پەداگوگيكالىق جاساعى تۋرالى وتە جاقسى ايتىلدى. قازىر ەرىكتىلەر قاتارىندا قولعابىسىمدى تيگىزىپ ءجۇرمىن.
ءبىر قۋانىشتىسى, ەرىكتى جاستار قاتارى تولىعا تۇسۋدە. الداعى جۇمىس تا اۋقىمدى. «ۇرپاقتار ساباقتاستىعى», «تازا سەسسيا», «جاس ساياساتكەرلەر كلۋبى» ءتارىزدى قىزعىلىقتى جوبالار جۇزەگە اسىرىلماق. ماقسات – جاستاردىڭ قوعامدىق جۇمىستاعى بەلسەندىلىگىن, جاقىنعا جاناشىر بولۋدىڭ قاجەت ەكەندىگىن ناسيحاتتاۋ. ەل جاستارىنىڭ ەڭسەلى ءىسىن كورگەندە بولاشاقتىڭ باياندى بولارىنا سەنىم دە ارتا تۇسەدى.
كوكشەتاۋ