قازاقستان ەلشىسى دارحان كالەتاەۆ ۋكراينانىڭ حالىق دەپۋتاتى, «باتكيۆششينا» پارتياسىنىڭ مۇشەسى يۆان كيريلەنكوعا قازاقستان مەن ۋكراينا اراسىنداعى دوستىق پەن ىنتىماقتاستىقتى دامىتۋعا قوسقان ۇلەسى ءۇشىن جوعارى مەملەكەتتىك ناگرادا - 2 دارەجەلى «دوستىق» وردەنىن تابىس ەتتى, دەپ حابارلايدى Egemen.kz.
ناگرادانى قابىلداي وتىرىپ, ي.كيريلەنكو پرەزيدەنت قاسىم-جومارت توقاەۆقا ەكى ەل اراسىنداعى بايلانىستى نىعايتۋعا قوسقان ۇلەسىن جوعارى باعالاعانى ءۇشىن العىس ايتتى. ءوزى ءۇشىن جانە قازاقستان مەن باۋىرلاس قازاق حالقىنا جىلى لەبىزبەن قارايتىن بۇكىل ۇلكەن «ۋكراينالىق كوماندا» ءۇشىن بۇل ۇلكەن مارتەبە, ۇلكەن جەتىستىك ەكەنىن اتاپ ءوتتى.
سونىمەن بىرگە, ول بىرنەشە رەت قازاقستانعا كەلىپ, يننوۆاتسيالىق دامۋ جولىنا نەگىزدەلگەن ەلدىڭ جەتىستىگىنە ءاردايىم سۇيسىنەتىندىگىن باسا ايتتى. ونىڭ ايتۋىنشا, قازاقستان پروگرەسىنىڭ قوزعالتقىشى قر تۇڭعىش پرەزيدەنتى – ەلباسى نۇرسۇلتان نازارباەۆتىڭ يننوۆاتسيالىق جانە تەرەڭ ەسەپتەلگەن يدەيالارى, سونداي-اق ولاردىڭ دايەكتى جۇزەگە اسىرىلۋىن قامتاماسىز ەتۋ قابىلەتى. سونداي-اق, ول ۋكراينالىق ءتۇرلى «الاڭداردا» جانە جوعارعى رادانىڭ «قابىرعالارىندا» قازىرگى زامانعى قازاقستاننىڭ ۇلگىسىن مىسالعا كەلتىرەتىنىن قوستى.
حالىق دەپۋتاتى دوستىق پەن ءوزارا سەنىمگە نەگىزدەلگەن قازاقستان-ۋكراينا قاتىناستارىن ودان ءارى دامىتۋ ءۇشىن بارلىق كۇش-جىگەرىن سالاتىنىنا سەندىردى.