شقو-دا پروباتسيا ەسەبىندە تۇراتىن 60 جاستاعى سوتتالعان ازامات العاش رەت جەكە كۋالىگىن الدى, دەپ حابارلايدى Egemen.kz Polisia.kz سايتىنا سىلتەمە جاساپ.
ول 2019 جىلى ايەلىن ۇرىپ, دەنساۋلىعىنا اۋىر زيان كەلتىرگەنى ءۇشىن ءتورت جىل مەرزىمگە باس بوستاندىعىن شەكتەۋ تۇرىندەگى جازاعا سوتتالعان. 2019 جىلدان باستاپ اۋىر قىلمىس جاساعانى ءۇشىن گلۋبوكوە اۋدانىنىڭ پروباتسيا قىزمەتىنىڭ ەسەبىنە قويىلعان.
– وسى ۋاقىتقا دەيىن 60 جاستاعى ازاماتتا تۋ تۋرالى كۋالىك پەن اسكەري بيلەتتەن باسقا, ونىڭ جەكە باسىن كۋالاندىراتىن قۇجاتتارى بولعان جوق, ويتكەنى ول 2000 جىلداردىڭ باسىندا 1975 جىلعى ۇلگىدەگى پاسپورتىن جوعالتىپ العان. 2020 جىلدىڭ ماۋسىم ايىندا سوتتالعان ازامات پروباتسيا قىزمەتىنە قۇجاتتاندىرۋ تۇرىندەگى الەۋمەتتىك-قۇقىقتىق كومەك كورسەتۋدى سۇراپ جۇگىندى. ءمان-جايدى انىقتاۋ بارىسىندا اتالعان ازاماتتىڭ 1993 جىلدان 2003 جىلعا دەيىنگى كەزەڭدە رەسەي فەدەراتسياسىندا تۇرۋ فاكتىسى انىقتالدى. وسىعان بايلانىستى وعان كوشى-قون قىزمەتكەرلەرىنە رەسەي فەدەراتسياسىنىڭ كونسۋلدىعىنان رەسەي ازاماتتىعىنىڭ بولۋى نەمەسە بولماۋى تۋرالى انىقتاما ۇسىنۋ قاجەت بولدى, – دەدى شقو بويىنشا قاجد باستىعى جانبولات قالەتاەۆ.
– ماعان رف كونسۋلدىعىنان انىقتاما الۋ جانە سۇراۋ سالۋ جىبەرۋ ءۇشىن 70000 تەڭگە مولشەرىندە مەملەكەتتىك باج تولەۋ قاجەت ەكەنىن ايتتى. مەندە ونداي اقشا بولعان جوق. ويتكەنى, مەن جالدانىپ جۇمىس ىستەيمىن, كۇندەلىكتى تاماققا عانا اقشا تابامىن, – دەدى سوتتالعان ازامات.
پروباتسيا ءبولىمىنىڭ قىزمەتكەرلەرى ادام قۇقىقتارى مەن زاڭدىلىقتى ساقتاۋ جونىندەگى قازاقستان حالىقارالىق بيۋروسىنىڭ شىعىس قازاقستانداعى فيليالىنىڭ قىزمەتكەرلەرىنە حابارلاسىپ, ولار مەملەكەتتىك باج سالىعىن تولەۋگە كومەكتەستى. الايدا, كورونوۆيرۋستىق ينفەكتسياعا بايلانىستى انىقتاما بەرۋ جانە الۋ پروتسەسى 2020 جىلدىڭ قاراشاسىنا دەيىن سوزىلدى. اتالعان ازاماتتا رەسەي ازاماتتىعىنىڭ جوقتىعى تۋرالى انىقتاما العاننان كەيىن, 2020 جىلدىڭ جەلتوقسان ايىنىڭ سوڭىندا ونىڭ قۇجاتتارى جەكە كۋالىك رەسىمدەۋگە جىبەرىلدى.
– ماعان جەكە كۋالىك بەرىلگەنىنە وتە قۋانىشتىمىن. ەندى رەسمي تۇردە جۇمىسقا ورنالاسا الامىن, زەينەتاقى اۋدارىمدارىم بولادى. مەن ەندى مەديتسينالىق مەكەمەگە تىركەۋگە تۇرامىن, بۇرىن جسن بولماعاندىقتان تىركەلە المادىم. بۇعان دەيىن ماعان ەشكىم كومەكتەسكەن جوق, پروباتسيا قىزمەتكەرلەرىنە كومەكتەرى ءۇشىن ۇلكەن راحمەت ايتامىن, – دەدى سوتتالعان ازامات.