ەلىمىزدىڭ شارۋالارى ەگىس القاپتارىن قۇرعاقشىلىقتان ساقتاندىرا الادى. ونى ۇيدەن شىقپاي-اق Qoldau.kz پورتالى ارقىلى جاساۋعا بولادى. ساقتاندىرۋ قۇنىنىڭ جارتىسىن مەملەكەت تولەيدى, دەپ حابارلايدى Egemen.kz.
ونلاين ساقتاندىرۋ وتكەن جىلى باستالىپ, جاقسى ناتيجە كورسەتتى. مىسالى, فەرمەرلەرگە 535 ملن تەڭگەنىڭ ساقتاندىرۋ تولەمى بەرىلدى. ساقتاندىرۋ جاعدايى تۋىنداعانىن كوميسسيا مۇشەلەرى ەمەس, سپۋتنيكتىك مالىمەتتەرگە نەگىزدەلگەن اقپاراتتىق جۇيە انىقتادى. بۇل ساقتاندىرۋ تولەمى مەحانيزمىنىڭ وبەكتيۆتىلىگى مەن اشىقتىعىن قامتاماسىز ەتتى.
بيىل اگروساقتاندىرۋ شىعىندارىن سۋبسيديالاۋعا 3,3 ملرد تەڭگە ءبولۋ جوسپارلانىپ وتىر.
اگروساقتاندىرۋ سالاسىنداعى وپەراتور - «قازاگرو» ۇلتتىق باسقارۋشى حولدينگى» اق-نىڭ ەنشىلەس كومپانياسى اۋىل شارۋاشىلىعىن قارجىلاي قولداۋ قورى. مەملەكەت وپەراتور ارقىلى اۋىل شارۋاشىلىعى تاۋارىن وندىرۋشىلەرگە ساقتاندىرۋ سىياقىسىن تولەۋگە ارنالعان شىعىنداردىڭ ءبىر بولىگىن وتەيدى.
بارلىق ساقتاندىرۋ پروتسەسى «Agroinsurance» سەرۆيستىك جۇيەسى ورنالاسقان Qoldau.kz پلاتفورماسىندا ىسكە اسىرىلادى. قازاقستاندىق ساقتاندىرۋ كومپانيالارى ءوز تاۋەكەلدەرىن الەمدىك نارىقتا ايرىقشا ورنى بار Swiss Re, Munich Re جانە Hannover Re سياقتى ءىرى حالىقارالىق كومپانيالار ارقىلى قايتا ساقتاندىرادى.
ساقتاندىرۋعا ءداندى داقىلدار (بيداي, ارپا, جۇگەرى, س ۇلى) جانە مايلى داقىلدار (كۇنباعىس, راپس, زىعىر) جاتادى. ايتا كەتەيىك, ەگىس القاپتارىن اقمولا, اقتوبە, باتىس قازاقستان, قاراعاندى, قوستاناي, پاۆلودار جانە سولتۇستىك قازاقستان, شىعىس قازاقستان, وبلىستارىنىڭ شارۋالارى ساقتاندىرا الادى.
ەگىس القابىن ساقتاندىرۋ ءۇشىن شارۋا نە ىستەۋ كەرەك:
ەلەكتروندى تسيفرلىق قولتاڭبا ارقىلى سايتقا تىركەلۋ; جەكە كابينەتكە كىرۋ; تىزىمنەن تاۋەكەلى باسىم ساقتاندىرىلۋى ءتيىس ەگىس القابىن تاڭداۋ; ساقتاندىرۋ كومپانياسىن تاڭداۋ (جۋسان گارانت, ۆيكتوريا, نوماد ينشۋرانس); ساقتاندىرۋ قۇنىنىڭ 50 %-ن تولەۋ.وسى قاراپايىم پروتسەدۋرالاردان كەيىن فەرمەر كۇن سايىن جەكە كابينەتى ارقىلى توپىراقتاعى ىلعال دەڭگەيىن باقىلاۋعا مۇمكىندىك الادى. ول ءۇشىن ۇنەمى ونلايندا بولۋدىڭ قاجەتى جوق. ەگەر جۇيە ىلعال جەتىسپەۋشىلىگىن نەمەسە ارتىق مولشەرىن تىركەسە, فەرمەر ەلەكتروندى پوشتاسى ارقىلى حابارلاما الا الادى. وسىدان كەيىن ەلەكتروندى تسيفرلىق قولتاڭبا ارقىلى تولەم وتىنىشىنە قول قويۋى كەرەك.
بارلىق پروتسەسس اۆتوماتتاندىرىلعان جانە ساقتاندىرۋ شارتىنا سايكەس ساقتاندىرۋ جاعدايى تىركەلگەن ساتتەن باستاپ 15 جۇمىس كۇن ىشىندە تولەم جاسالادى.
ىلعال تاپشىلىعىنان بولاتىن تاۋەكەلدەردى ساقتاندىرۋ يندەكسى ءۇش كەزەڭدى قامتيدى.ء بىرىنشى كەزەڭ: 15 مامىردان 14 ماۋسىمعا دەيىن, ەكىنشى كەزەڭ: 15 ماۋسىمنان 14 شىلدەگە دەيىن جانە ساقتاندىرۋ ارقىلى قورعانۋدىڭ ۇشىنشى كەزەڭى: 15 شىلدەدەن 14 تامىزعا دەيىن. وسى كەزەڭدەردىڭ ارقايسىسى ءۇشىن جۇيەدە ءوز تريگگەرلەرى قويىلادى. ياعني, ساقتاندىرۋ جاعدايى ىسكە قوسىلاتىن نۇكتەلەر مەن كەزەڭدەردىڭ ارقايسىسىنا تولەمدەر قاراستىرىلعان. توپىراقتاعى ىلعال دەڭگەيىن انىقتاۋدىڭ تولىق پروتسەسى, تريگگەرلەر مەن باسقا دا پارامەترلەر شارۋانىڭ جەكە كابينەتىنە جىبەرىلىپ تۇرادى.
قازاقستاننىڭ كوپتەگەن ايماقتارىندا تۇسكەن قاردىڭ جانە توپىراقتاعى ىلعال قورىنىڭ ازدىعىن ەسكەرە وتىرىپ, ساراپشىلار بيىل جازدا قۇرعاقشىلىق بولادى دەپ بولجاپ وتىر. اۋىل شارۋاشىلىعىن قارجىلاي قولداۋ قورى مەملەكەتتىك سۋبسيديا ەسەبىنەن قۇرعاقشىلىقتان ساقتاندىرۋ مەحانيزمى شارۋالارعا ۇلكەن قولداۋ بولادى دەگەن سەنىمدە.