بۇگىندە جامبىل وبلىسىندا كوروناۆيرۋس ىندەتىن جۇقتىرۋدىڭ 5 709 جاعدايى تىركەلىپ, 100 مىڭ تۇرعىنعا شاققاندا ناۋقاستار كورسەتكىشى 501,4-ءتى قۇراپ وتىر. ال پنەۆمونيانىڭ 1 329 جاعدايى انىقتالعان. تىركەلگەن جاعدايلاردىڭ ىشىندە 2 692 ناۋقاس سيمپتومدى, 3 017 ناۋقاس سيمپتومسىز بولىپ وتىر. وڭىردە قابىلدانعان جەدەل شارالاردىڭ ناتيجەسىندە 5 383 ازامات قاۋىپتى ىندەتتەن جازىلىپ شىققان. الايدا وكىنىشكە قاراي, كوروناۆيرۋس ىندەتىنەن 64 ادام قايتىس بولعان.
جامبىل وبلىستىق دەنساۋلىق ساقتاۋ باسقارماسىنىڭ مالىمەتىنشە, كوروناۆيرۋس ىندەتىن جۇقتىرۋ كورسەتكىشى تاراز قالاسىندا ءورشىپ تۇر. بۇگىنگى تاڭدا وبلىس ورتالىعىندا 2 772 دەرەك تىركەلگەن. ال بايزاق اۋدانىندا – 385, جامبىلدا – 301, جۋالىدا –199, قوردايدا – 652, ت.رىسقۇلوۆتا – 199, مەركىدە – 188, مويىنقۇمدا – 109, سارىسۋدا – 196, تالاستا –138 جانە شۋ اۋدانىندا 395 جاعداي انىقتالعان. سونىمەن قاتار اسكەرگە شاقىرىلۋشىلار اراسىنان 125 جاعداي, وڭىرگە كەلۋشى باسقا وبلىس تۇرعىندارى اراسىنان 50 جاعداي تىركەلىپ وتىر.
قاۋىپتى ىندەتتىڭ الدىن الۋ جانە ءوڭىر تۇرعىندارىنىڭ ءومىرىن ساقتاپ قالۋ ماقساتىندا جامبىل وبلىسى بويىنشا ينفەكتسيالىق ستاتسيوناردا 1 200 توسەكتىك ورىن دايىندالعان. سونداي-اق كارانتيندىك ستاتسيوناردا 15 تۇلعا بار. ولار بايزاق اۋداندىق ورتالىق اۋرۋحاناسىنا, قورداي اۋدانى قورداي اۋىلىنداعى «كەرەمەت» قوناقۇيىنە جانە ت.رىسقۇلوۆ اۋداندىق ورتالىق اۋرۋحاناسىنا ورنالاستىرىلعان. ال 2 405 تۇرعىن ءۇي جاعدايىنداعى كارانتينگە جاتقىزىلسا, وسى ۋاقىتقا دەيىن كارانتيننەن 16 مىڭ 439 ازامات شىعارىلعان.سونىمەن قاتار وڭىردەگى قوعامدىق ورىنداردا تالاپ مەيلىنشە كۇشەيتىلگەن. قاۋىپتى ىندەتپەن كۇرەستە اۋدانداردا دا ءتيىستى شارالار قولعا الىنۋدا.
جامبىل وبلىسى