COVID-19 ينفەكتسياسىن جۇقتىرعاندار سانى شىعىس قازاقستاندا قايتا كوبەيىپ بارادى. سوڭعى تاۋلىكتە ولاردىڭ قاتارى 75 ادامعا جەتتى. ال اۋىرىپ ەم ىزدەگەنشە, اۋىرماۋدىڭ جولىن ىزدەگەندەر رەسەيلىك ۆاكتسينانى سالعىزىپ جاتىر. قازىرگى ۋاقىتتا 925 ادام ەكپە الىپ ۇلگەرگەن.
ولاردىڭ 160-تان استامى ۆاكتسينانى وبلىستىق انا مەن بالا ورتالىعىنداعى ەكپە كابينەتىندە سالعىزدى. كوروناۆيرۋس ينفەكتسياسىنا قارسى ەكپە العانداردىڭ قاتارىندا اكىمدىكتىڭ ماماندارى مەن سانيتارلىق-ەپيدەميالىق قىزمەتتىڭ وكىلدەرى دە بار. جالپى ەكپە الۋ ورتالىقتارىنا كەلگەن پاتسيەنتتەردى الدىن الا تەكسەرىپ, تەراپەۆت دارىگەر رۇقسات بەرەدى. ەكپەدەن كەيىن دە ارنايى بولمەدە بەلگىلى ءبىر ۋاقىت دارىگەرلەردىڭ باقىلاۋىندا بولادى.
– ءبىز – قىزىق حالىقپىز. ەستەرىڭىزدە عوي, بىلتىر جازعا سالىم جاقىندارىمىز اۋىرا باستاعاندا «باسقاسىنىڭ ءبارىن ويلاپ تاۋىپ جاتقان عالىمدار تاجال ىندەتتىڭ بەتىن قايتاراتىن ەكپە ويلاپ تاپپاي ما؟» دەپ تۋلاعانبىز. بۇگىندە سول ەكپەنى ويلاپ تاپتى. ەندى «سالدىرمايمىن» دەپ قاشىپ جۇرگەندەر كوپ. ءوزىم ەشكىمنىڭ قولقالاۋىنسىز كەلدىم. ەكتى. بالەندەي تەرىس اسەرى جوق, – دەيدى ەكپەدەن كەيىنگى بولمەدە وتىرعان پاتسيەنت اسەم جەڭىسوۆا.
ءيا, ەكپەدەن باس تارتىپ جاتقاندار از ەمەس. تۇماۋراتىپ جۇرگەن ازاماتتىڭ ءبىرى ۆاكتسينا سالۋعا مۇلدە قارسى ەكەنىن ايتتى. ارينە, ۆاكتسينالاۋ اركىمنىڭ قالاۋىمەن بولعاندىقتان, ەشكىمدى ەشكىم قىستامايدى, كۇشتەمەيدى. دارىگەر اقبوپە تۇرسىنباەۆانىڭ ايتۋىنشا, العاشقى كۇندەرى كۇنىنە وتىز ادامعا دەيىن كەلىپ ەكپە العان.
– ەكپەدەن ەرىكتى تۇردە باس تارتقاندار دا بار. ۆاكتسينا الامىن دەگەن ازاماتتار مورالدىق تۇرعىدان دايىن بولۋى كەرەك. باسا ايتا كەتەرلىگى, ۆاكتسينالاۋعا باسىمدىق بەرىلگەن سەگىز كونتينگەنت بەلگىلەنگەن: مەديتسينا قىزمەتكەرلەرى, پەداگوگتەر, پوليتسيا قىزمەتكەرلەرى. سونداي-اق, قانت ديابەتى بار, قان قىسىمى جوعارى, وكپەنىڭ سوزىلمالى اۋرۋلارى, برونحيالدى دەمىكپەسى بار ادامدار ءبىرىنشى كەزەكتە الۋى ءتيىس. سەبەبى ولاردىڭ يممۋنيتتەرى تومەن, – دەيدى ا.تۇرسىنباەۆا.
ال ەكپە سالۋدىڭ ءوز ءتارتىبى بار. وسكەمەن مەن سەمەيگە رەسەيلىك سپۋتنيك V ۆاكتسيناسىنىڭ 270 دوزاسى جەتكىزىلگەن بولاتىن. ولار نۇسقاۋلىعى بويىنشا -18 گرادۋستا ساقتالىپ تۇر. 3 مل-دىق ءبىر قۇتى بەس ادامعا سالىنادى.
– ۆاكتسينانى مۇزداتقىشتان بەس ادام جينالعان سوڭ عانا الىپ شىعامىز. الىپ شىققان سوڭ, 15 مينۋتتان كەيىن سالا بەرۋگە بولادى. اشىلعان ۆاكتسينانى بولمە تەمپەراتۋراسىندا ەكى ساعاتتان ارتىق ۇستاۋعا بولمايدى, – دەپ ءتۇسىندىردى ەكپە كابينەتىنىڭ مەدبيكەسى گۋليا وماروۆا.
مەدبيكەنىڭ ايتۋىنشا, ەكپە سالعان جەر قىزارىپ, دەنە تەمپەراتۋراسى ازداپ كوتەرىلۋى مۇمكىن. ەكپەنىڭ نۇسقاۋلىعىندا ءۇش كۇن ىشىندە قىزۋ 40 گرادۋسقا دەيىن كوتەرىلۋى ىقتيمال دەپ جازىلعان. بۇلشىق ەتتەرى اۋىرىپ, سۇيەكتەرى دە سىرقىراۋى مۇمكىن. وعان الاڭداۋدىڭ قاجەتى جوق. دارىگەر ءۇش كۇن بويى پاتسيەنتتەرگە حابارلاسىپ, حال-جاعدايلارىن ءبىلىپ تۇرادى. وسى ۋاقىتقا دەيىن ەكپە العانداردىڭ اراسىندا بۇلشىق ەتى اۋىرسىنىپ, دەنە قىزۋى كوتەرىلگەنمەن, اۋىر جاعدايلار ورىن الماعان.
شىعىس قازاقستان وبلىسى