سقو-نىڭ «تايىنشا-كەللەروۆكا» اۆتوجولىندا 31 جاسار پەتروپاۆلدىق «Lexus» اۆتوكولىگىمەن جىلقىعا سوقتىعىسقان, دەپ حابارلايدى Egemen.kz.
كەشكى قاراڭعىلىق تۇسكەن ساعات جەتى شاماسىندا منوگوتسۆەتنوە اۋىلى ماڭىندا ونىڭ الدىنان ءبىر تابىن جىلقى شىعا كەلگەن. ونىڭ بىرنەشەۋى جولعا شىعىپ كەتكەن. جۇرگىزۋشى بىردەن ارەكەت ەتىپ ۇلگەرمەي, جىلقىلاردىڭ بىرىمەن سوقتىعىسىپ قالادى. ادام دا, جىلقى دا امان, بىراق اۆتوكولىككە مەحانيكالىق زاقىم كەلتىرىلدى. قىمبات ماشينانىڭ اقاۋىن جوندەۋدىڭ ءوزى شامامەن ءبىر جىلقىنىڭ قۇنىنا تەڭ. سوندىقتان جۇرگىزۋشى تابىن يەسىن انىقتاۋ ماقساتىمەن پوليتسياعا حابارلاسقان.
وقيعا ورنىنا جەتكەن ۋچاسكەلىك پوليتسيا ينسپەكتورى جىلقى تابىنىنىڭ يەسى اۋدان ورتالىعىنىڭ 59 جاسار تۇرعىنى ەكەنىن انىقتادى. مال باعۋ ەرەجەسىن بۇزعانى ءۇشىن ەندى وعان قاتىستى اكىمشىلىك ماتەريال جينالادى.