تارازدا كانال جيەگىن تازالاۋ كەزىندە قاپقا سالىنعان ادامنىڭ سۇيەكتەرى تابىلدى, دەپ حابارلايدى Egemen.kz
ادامنىڭ قاڭقاسىن جاسىل ەل-تاراز مەكەمەسىنىڭ قىزمەتكەرلەرى جۇمىس جۇرگىزۋ كەزىندە تاپقان.
مەكەمە قىزمەتكەرلەرى ەكى اۋداندى ءبولىپ تۇراتىن سۋ كانالىنىڭ جاعاسىنداعى قامىستى ورىپ, قوقىستان تازارتىپ جۇرگەن كەزدە جەرگە كومىلگەن قاپتى بايقاپ قالادى. كۇدىكتى بولىپ كورىنگەن قاپتى الىپ شىققان قىزمەتكەرلەر وندا قاڭقا جاتقانىن انىقتاعان سوڭ, بىردەن ءتارتىپ ساقشىلارىن شاقىرتىپتى.
قاڭقانى تاۋىپ العانداردىڭ ايتۋىنشا, ءمايىتتىڭ تەك سۇيەگى عانا قالعان. سوعان قاراعاندا, مارقۇم بىرنەشە جىل بۇرىن ولتىرىلگەن بولۋى مۇمكىن دەگەن بولجام جاسالىپ وتىر.
جامبىل وبلىسى پوليتسيا دەپارتامەنتىنىڭ ءباسپاسوز حاتشىسىنىڭ مالىمدەۋىنشە, بۇل دەرەككە قاتىستى تاراز قالاسىنىڭ پوليتسيا باسقارماسىمەن سوتقا دەيىنگى تەرگەپ-تەكسەرۋ ءوندىرىسى باستالىپ, تابىلعان ءمايىت سۇيەكتەرىنىڭ قالدىقتارىنا سوت مەديتسينالىق ساراپتاما تاعايىندالدى. قازىرگى ۋاقىتتا ونىڭ جەكە باسىن انىقتاۋ ماقساتىندا جەدەل ىزدەستىرۋ ءىس-شارالارى جۇرگىزىلىپ جاتىر.
ايتولقىن مىرزاكاريم