جۇرتتىڭ ساناسىندا «پوليتسەي جازالايدى, ايىپپۇل سالادى» دەگەندەي تۇسىنىك قالىپتاسىپ قالعانى راس. سوندىقتان دا انەۋگۇنى الەۋمەتتىك جەلىدە قاريانىڭ سومكەسىن كوتەرىپ بارا جاتقان پوليتسەيدىڭ فوتوسى جۇرتتىڭ جىلى پىكىرىنە يە بولعان.
شىنىندا دا, ۇلكەنگە ىزەت كورسەتىپ جۇرگەن جاياۋ پاترۋلدەگى پوگوندى كىم ەكەن دەپ, وسكەمەن قالالىق پوليتسيا بولىمىنەن سۇراستىرعانبىز. جالپى قالادا جاياۋ پاترۋلدە 34 قىزمەتكەر, 6 ۋچاسكەلىك پوليتسيا بەكەتى بار ەكەن. ساقشىلار وزدەرىنە بەكىتىلگەن اكىمشىلىك اۋماقتا ءتارتىپتى قاداعالايدى, قىلمىستىڭ الدىن الادى. سونىمەن قاتار 102 ارناسىنا تۇسكەن شاقىرتۋلار بويىنشا دا قىزمەت كورسەتەدى. دەمەك, تارتىپسىزدىك, ۇرلىق, اتىس-شابىس ورىن العان جاعدايدا, الىپ-ۇشىپ الدىمەن جەتەتىن دە پاترۋلدىك پوليتسەيلەر.
سولاردىڭ ءبىرى – قارياعا قولعابىس ەتەمىن دەپ, كوپشىلىكتىڭ كوزىنە تۇسكەن سانات امىرەنوۆ. وسكەمەننىڭ تايعاق كوشەسىندە اق جاۋلىقتى انانى قولتىعىنان دەمەپ, تۇرعىنداردىڭ جانارىنا جىلى ۇشىراعان پوليتسەيدىڭ پىكىرىنشە, بۇل – كەز كەلگەن ادامنىڭ پارىزى. سولاي عوي, بىراق ءبىزدىڭ قوعامدا پوگوندىلاردىڭ كوشەدە كومەك كورسەتۋى كوزگە ەرەكشە جىلى كورىنەدى. ارينە, ازاماتتارعا قاۋىپ تونسە, تارتىپسىزدىك ورىن السا, قۇقىق قورعاۋ قىزمەتكەرلەرىنە جۇگىنۋ ادەتتەگى جاعداي. ال ساناتتاي قولعابىس ەتىپ, العىس ارقالاعاندار ساناۋلى دەسەم, وتىرىك ەمەس.
– ءبىزدىڭ قاراماعىمىزداعى اكىمشىلىك اۋماق – توعىز جولدىڭ تورابىندا. ەرسىلى-قارسىلى اعىلىپ جاتقان كولىك كوپ. الەۋمەتتىك جەلىدە تاراپ كەتكەن سۋرەت ەسىمدە. ول كۇنى جۇمىسقا تاڭەرتەڭ كەلدىك. كۇن اياز. قاراسام, جول جيەگىندە اۋىر سومكە كوتەرگەن اپا تۇر ەكەن. سومكەسىن الىپ, جولدىڭ ارعى شەتىنە وتكىزىپ جىبەردىم. بويىندا تاربيەسى بار كەز كەلگەن ازامات ۇلكەنگە ىزەت كورسەتەدى, – دەيدى پاترۋلدىك پوليتسەي سانات امىرەنوۆ.
ۇلان اۋدانى, بوزانباي اۋىلىنىڭ تۋماسى سانات امىرەنوۆ – قازاقى مادەنيەتتى, سالت-سانانى بويىنا ءسىڭىرىپ وسكەن ازامات. ۆولەيبولداعى جاتتىقتىرۋشىسى دا ءتارتىپ اركىمنىڭ وزىنەن باستالاتىندىعىن ايتىپ وتىرادى.
البەتتە, فورماداعى قىزمەتكەر – مەملەكەتتىڭ ايناسى ىسپەتتى. سوندىقتان دا ورتاق تارتىپكە باعىنىپ, قىزمەتكە ادال بولىپ, جان-جاعىنا جاقسىلىعىمەن تانىلسا, قۇقىق قورعاۋ سالاسىنىڭ سەنىمىن اقتاعانى, ابىرويىن اسقاقتاتقانى.
سوڭعى جىلدارى پوليتسەيلەردىڭ ەل اراسىنان تابىلىپ, كومەك كورسەتۋلەرى جاقسى ۇردىسكە اينالعان. جۋىردا قار قالىڭ تۇسكەن كۇنى وسكەمەننىڭ پوليتسەيلەرى قىزمەتتىك فورماسىن جۇمىس كيىمىنە اۋىستىرىپ, «نەگىزگى ورتا مەكتەپ-ينتەرناتى» مەكەمەسىنىڭ اۋلاسىن قاردان تازالادى.
– قالانى قار باسقان كۇنى ءبىزدىڭ قىزمەتكەرلەر قولعا كۇرەك الىپ, مەكتەپ اۋلاسىنىڭ قارىن كۇرەدى. سەنبىلىك كوڭىلدى ءوتتى. ەڭ باستىسى, قوعامعا پايدامىز ءتيىپ جاتقانىنا قۋاندىق, – دەيدى وبلىستىق پوليتسيا دەپارتامەنتىنىڭ جەكە قيمىلدايتىن ارنايى جاساق كومانديرى ايدار نۇرمۇحامبەتوۆ.
ويلاماعان جەردەن اۋلاسى ايناداي بولعان مەكتەپ ديرەكتورى انار جەتىباەۆا دا وقۋشىلار مەن مۇعالىمدەر اتىنان ءتارتىپ ساقشىلارىنا العىس ءبىلدىردى.
– ينتەرنات اۋماعىندا بالالاردى قويىپ, ەرەسەكتەردىڭ ءجۇرۋى مۇمكىن بولماي قالدى. قۋانىشىمىزعا وراي, پوليتسيا قىزمەتكەرلەرى كومەككە كەلدى. ايتپەگەندە, بالالار ويىن الاڭىنا جاقىنداي الماۋشى ەدى, – دەيدى مەكتەپ ديرەكتورى.
مۇنداي جاقسىلىق جاساۋ جاريالانا بەرمەگەنىمەن, اۋدانداردا دا داستۇرگە اينالعان. اۋىلدىق جەرلەردەگى پوليتسەيلەر جۇمىستان بوس ۋاقىتتارىندا جالعىزباستىلارعا, قارتتارعا كومەك كورسەتىپ تۇرادى.
شىعىس قازاقستان وبلىسى