دەنساۋلىق ساقتاۋ مينيسترلىگى سانيتارلىق-ەپيدەميالىق باقىلاۋ كوميتەتىنىڭ توراعاسى ايجان ەسماعامبەتوۆا كوروناۆيرۋس شتاممدارىنا قاتىستى پىكىر ءبىلدىردى, دەپ حابارلايدى Egemen.kz
ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا ا.ەسماعامبەتوۆادان كوروناۆيرۋستىڭ قانداي شتاممدارى قازاقستاندا انىقتالعانى سۇرالدى.
«قازاقستاندا تارالعان ۆيرۋستىڭ گەنوتيپىن تولىق زەرتتەۋ مۇمكىندىگى بار. پاندەميا باستالعالى 285 شتامم زەرتتەلدى, ولار ناۋرىز ايىنان قاڭتار ايى ارالىعىندا بولىنگەن شتاممدار. سىزدەردى «مۋتاتسيالانعان وڭتۇستىكافريكالىق, بريتاندىق جانە جاڭا برازيليالىق شتاممدارى ءبولىندى مە» دەگەن سۇراق مازالاپ تۇرعانى بەلگىلى. ماۋسىم مەن قاڭتار ارالىعىندا گەنوتيپتەۋ ناتيجەسىندە قازاقستان اۋماعىندا اتالعان شتاممدار انىقتالمادى», دەدى ا.ەسماعامبەتوۆا.
سونىمەن قاتار دەنساۋلىق ساقتاۋ ۆيتسە-ءمينيسترى اجار عينيات وڭتۇستىكافريكالىق, بريتاندىق جانە برازيليالىق شتاممداردى ەلگە كىرگىزبەۋ ءۇشىن مەملەكەتتىك شەكارادا ءتيىستى شارالار قابىلدانعانىن ەسكە سالدى.
«سول سەبەپتى ەلىمىزگە ساپارلاپ كەلىپ جاتقان ازاماتتار ءتيىستى تەكسەرۋدەن ءوتىپ جاتىر. بارلىق وڭىرلەردە شتاممدار تەكسەرىلىپ وتىر. قازىرگى كەزدە وسى زەرتحانانىڭ جۇمىسى كۇشەيتىلدى», دەدى ۆيتسە-مينيستر.