بيىلعى ماۋسىم ايىندا اقمولا وبلىسى ەڭبەكشىلدەر اۋداندىق سوتىنىڭ بۇرىنعى توراعاسى قايرات توقسانباەۆ قىز بالانى كولىگىمەن قاعىپ كەتىپ, ارتىنان ول اۋرۋحانادا كوز جۇمعان بولاتىن. بۇل تۋرالى Nur. kz حابارلادى.
تەرگەۋ بارىسىندا 2013 جىلدىڭ 5 ماۋسىمىندا ستەپنياك قالاسىندا ق.توقسانباەۆتىڭ ماس كۇيىندە, قۇجاتسىز كولىك جۇرگىزگەندىگى انىقتالدى. ول كولىگىنە يە بولا الماي, جولدان شىعىپ كەتىپ, جول جيەگىندە تۇرعان كامەلەت جاسىنا تولماعان قىزعا سوعىپ كەتەدى. اۋىر دەنە جاراقاتتارىن العان ءجاسوسپىرىم اۋىر حالدە ەڭبەكشىلدەر اۋداندىق اۋرۋحاناسىنا جەتكىزىلگەن. الايدا,ءبىر كۇن وتكەندە ول اۋرۋحانادا كوز جۇمدى. سوت ءىستى قاراۋ كەزىندە توقسانباەۆقا قاتىستى قىلمىستىق ءىستى توقتاتۋ تۋرالى ءوتىنىش كەلىپ ءتۇستى. ول بويىنشا ايىپتالۋشى ءوز كىناسىن مويىنداعان جانە جابىرلەنۋشى تاراپقا كەلتىرگەن ماتەريالدىق, مورالدىق شىعىنداردى تولەگەن. ءارى ءوز ارالارىندا بۇل ماسەلەنى بىرجاقتى شەشكەنى بەلگىلى بولدى. وسىعان وراي, سوت شەشىم قابىلدادى.
«قايرات توقسانباەۆتى قىلمىس جاساعانى ءۇشىن ايىپتاۋ جونىندەگى قر قك 296-بابىنىڭ 2-بولىمىندە ەسكەرىلگەن قىلمىستىق ءىستى تاراپتار ءوز ارالارىندا ىمىراعا كەلگەندىكتەن جانە كەلتىرىلگەن شىعىنداردىڭ ورنى تولتىرىلعاندىقتان, قر قك 67-بابى 2-ءبولىمى نەگىزىندە توقتاتىلسىن. توقسانباەۆقا قاتىستى «ەلدەن كەتپەۋ تۋرالى قولحات» جازاسى جويىلسىن», - دەپ جازىلعان بۇلاندى اۋداندىق سوتىنىڭ قاۋلىسىندا.
باقىتبەك كەنەش ۇلى.
دەرەككوز: Nur. kz
فوتو: respublika.kz