كەشە, 20 جەلتوقسان كۇنى اقتاۋدا 2013 جىلدىڭ قورىتىندىسى بويىنشا «جىل ادامدارىن» ماراپاتتاۋ ءراسىمى بولدى. اتاق 15 اتالىم بويىنشا تاعايىندالدى. بۇل تۋرالى Lada.kz حابارلادى.
جىلدىڭ ۇزدىك ادامدارىن ماراپاتتاۋعا ارنالعان سالتاناتتا ماڭعىستاۋ وبلىسىنىڭ اكىمى اليك ايدارباەۆ نومينانتتاردى وسى جەتىستىكتەرىمەن قۇتتىقتاپ, ولارعا جاڭا جىلدا جاڭا تابىستار تىلەدى.
«2013 جىل اياقتالىپ كەلەدى. ءوتىپ بارا جاتقان جىلدىڭ قورىتىندىسىن شىعارا وتىرىپ, ءبىز ءداستۇرلى «جىل ادامى» سىيلىعىنىڭ لاۋرەاتتارىن دا انىقتادىق. «جىل ادامى» - ءوز ىسىنە بەرىلگەندىك پەن وتانعا دەگەن سۇيىسپەنشىلىگىن كورسەتۋ ارقىلى جۇرتقا ۇلگى-ونەگە بولىپ كەلە جاتقان ءتۇرلى ماماندىقتىڭ يەلەرى, - دەدى ايماق باسشىسى.
اتالىم يەگەرلەرىنە ماراپاتتارىن تاپسىرۋ ءراسىمى ايگىلى «وسكار» سىيلىعىن تابىس ەتۋ تاسىلىمەن جۇرگىزىلدى. ءاربىر اتالىم بويىنشا بىرنەشە ۇمىتكەردىڭ ىشىنەن ءبىر ۇزدىك اتالىپ وتىردى. وعان «جىل ادامىنىڭ» سيمۆولى رەتىندە التىن ادام كەيپىندەگى ءمۇسىن تاپسىرىلدى. ال جۇلدەلەردى ايماقتاعى دەنساۋلىق ساقتاۋ, ونەر, قۇرىلىس سەكىلدى كوپتەگەن سالالار بويىنشا ەڭبەك سىڭىرگەن مايتالمان ماماندار ۇسىنىپ تۇردى.
«جىل عالىمى» اتاعى ش.ەسەنوۆ اتىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەرسيتەتىنىڭ كافەدرا دوتسەنتى, تاريح عىلىمدارىنىڭ كانديداتى ەلۆيرا ابلانوۆاعا بەرىلدى. «جىل تاربيەشىسى» جۇلدەسىنە تالاستا اقتاۋداعى №4 وبلىستىق ارنايى كوررەكتسيالىق مەكتەپ-بالاباقشانىڭ تاربيەشىسى گالينا كورولەۆا وزىپ شىقتى. «جىل مۇعالىمى» اتالىمى تۇپقاراعان اۋدانىداعى №1 مەكتەپ-ليتسەيدىڭ ديرەكتورى سايىن شاپاعاتوۆاعا بۇيىردى. «جىل دارىگەرى» اتاعىنا وبلىستىق اۋرۋحانا كارديوحيرۋرگيا ءبولىمىنىڭ مەڭگەرۋشىسى جەڭىس بولات ۇلى لايىقتى دەپ تانىلسا, «جىل اياجانى» بولىپ بالالار اۋرۋحاناسى جاڭا تۋعاندار پاتولوگياسى ءبولىمىنىڭ قىزمەتكەرى ۆالەنتينا بۋزار اتالدى. «جىل سپورتشىسى» ماراپاتىنا بوكسشى بەرىك ءابدىراحمانوۆ قول جەتكىزدى.
بۇدان ءارى «جىل فەرمەرى» اتاعىن «كاسپياگروكومپاني» جشس ديرەكتورى تالانت ناۋرىزباەۆ, «جىل قۇرىلىسشىسى» اتاعىن «ەۆروستروي-ا» جشس ديرەكتورىنىڭ قۇرىلىس جونىندەگى ورىنباسارى ۆالەري پاستۋحوۆ, «جىل مۇنايشىسى» اتاعىن «جەتىبايمۇنايگاز» وپەراتورى قايرات دۇيسەنباەۆ الدى.
ال جاڭاوزەن قالاسى ىشكى ىستەر باسقارماسىنىڭ ينسپەكتورى ماقسات مولداباي «جىل پوليتسەيى» اتاندى.
مۇرات ايتقوجا.
دەرەككوز: Lada.kz.