جەكە سەكتور كاسىپورىندارىندا باستاۋىش كاسىپوداق ۇيىمدارىن قۇرۋ بۇگىندە كاسىپوداقتار فەدەراتسياسىنىڭ باسىم مىندەتتەرىنىڭ ءبىرى بولىپ تابىلادى. سەبەبى, جەكە مەنشىك كاسىپورىنداردا دا ءجيى پروبلەمالار تۋىندايدى, ال جۇمىسكەرلەر قولداۋ مەن قورعاۋدى قاجەت ەتەدى.
نۇر-سۇلتان قالاسىنىڭ كاسىپوداقتار ورتالىعى وكىلدەرىنىڭ الدىن-الا كەلىسسوزدەر جۇرگىزۋىنىڭ ناتيجەسىندە بۇگىن ەلورداداعى «اسەم» ساۋدا ورتالىعىندا كاسىپوداق ۇيىمىن قۇرۋ بويىنشا جينالىس ءوتتى.
«ەكونوميكانىڭ جەكە سەكتورىندا كاسىپوداق ۇيىمدارىن قۇرۋدىڭ ەرەكشە ماڭىزى بار ەكەنى انىق. قيىن ەكونوميكالىق جاعدايدا مەملەكەتتىك نەمەسە جەكە كاسىپورىن بولسىن, بىردە-ءبىر قىزمەتكەردى ءوز پروبلەمالارىمەن جالعىز قالدىرماۋ ماڭىزدى»,-دەپ اتاپ ءوتتى نۇر-سۇلتان قالاسىنىڭ كاسىپوداقتار ورتالىعى توراعاسىنىڭ مىندەتىن اتقارۋشى ت.كۇنادىلوۆ.
«اسەم» ساۋدا ورتالىعىنىڭ باس ديرەكتورى نۇرلان نۇرماعامبەتوۆتىڭ ايتۋىنشا, الەۋمەتتىك باعدارلانعان كاسىپورىندا 30 قىزمەتكەر ەڭبەك ەتەدى. ولاردىڭ جالاقىلارى ۋاقىتىلى بەرىلەدى. قازىرگى ۋاقىتتا ساۋدا ورىندارىن جالعا العان 300-گە جۋىق كاسىپكەر ءوز ءىسىن دوڭگەلەتىپ وتىر. كاسىپوداق قوزعالىسىنا قاتىسۋ قىزمەتكەرلەرگە قوسىمشا جەڭىلدىكتەر مەن كەپىلدىكتەردى پايدالانۋعا مۇمكىندىك بەرەدى دەيدى.
جينالىسقا قاتىسۋشىلار باستاۋىش كاسىپوداق ۇيىمىن قۇرۋدى ءبىراۋىزدان قولدادى. ونىڭ ءتورايىمى بولىپ ساۋدا ورتالىعىنىڭ اكىمشىسى زارينا مالساعوۆا سايلاندى.
الداعى ۋاقىتتا جاڭادان قۇرىلعان باستاۋىش كاسىپوداق ۇيىمى جۇمىسكەرلەردىڭ مۇددەلەرىن ەسكەرەتىن ۇجىمدىق كەلىسىم-شارت جوباسىن ازىرلەيتىن بولادى. ءوز تاراپىنان نۇر-سۇلتان قالاسىنىڭ كاسىپوداقتار ورتالىعىنىڭ وكىلدەرى قۇقىقتىق كومەك كورسەتۋ, ەڭبەكتى قورعاۋ جاعدايىن باقىلاۋ بويىنشا جۇمىستى ۇيىمداستىرۋعا كومەكتەسەدى.