قر پرەمەر-ءمينيسترى اسقار مامين الماتى قالاسىنا جۇمىس ساپارى بارىسىندا الماتى وبلىسىنىڭ الەۋمەتتىك-ەكونوميكالىق دامۋ ماسەلەلەرى جونىندە كەڭەس وتكىزدى.
ءوڭىر اكىمى اماندىق باتالوۆ الماتى وبلىسىن دامىتۋدىڭ وزەكتى ماسەلەلەرى تۋرالى باياندادى. تالقىلاۋعا پرەمەر-ءمينيستردىڭ ءبىرىنشى ورىنباسارى ءاليحان سمايىلوۆ, ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى قايرات كەلىمبەتوۆ, ۇلتتىق ەكونوميكا ءمينيسترى اسەت ەرعاليەۆ, ەنەرگەتيكا ءمينيسترى نۇرلان نوعاەۆ, ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ, ساۋدا جانە ينتەگراتسيا ءمينيسترى باقىت سۇلتانوۆ, دەنساۋلىق ساقتاۋ ءمينيسترى الەكسەي تسوي, يندۋستريا جانە ينفراقۇرىلىمدىق دامۋ ءبىرىنشى ۆيتسە-ءمينيسترى قايىربەك وسكەنباەۆ, قارجى ءبىرىنشى ۆيتسە-ءمينيسترى بەرىك شولپانقۇلوۆ, مادەنيەت جانە سپورت ۆيتسە-ءمينيسترى عابيدوللا ءابدىراحىموۆ قاتىستى.
كولىك جانە تۇرعىن ءۇي ينفراقۇرىلىمىن دامىتۋ, تۋريزم جانە ينۆەستيتسيالار تارتۋ, قورشاعان ورتانى قورعاۋ, وڭىردە «اۋىل – ەل بەسىگى» جوباسىن ىسكە اسىرۋ ماسەلەلەرى قارالدى. 2030 جىلعا دەيىنگى الماتى اگلومەراتسياسىن دامىتۋدىڭ وڭىرارالىق ءىس-شارالار جوسپارىن ىسكە اسىرۋ ماسەلەسىنە ەرەكشە نازار اۋدارىلدى.
2020 جىلدىڭ قورىتىندىسى بويىنشا وبلىستا ونەركاسىپ ءوندىرىسىنىڭ كولەمى 2019 جىلمەن سالىستىرعاندا 2,3%-عا, 1,3 ترلن تەڭگەگە دەيىن, ونىڭ ىشىندە وڭدەۋ ونەركاسىبى 2,7%-عا (ماشينا جاساۋ 31%-عا, فارماتسەۆتيكا 10%-عا, تاماق ونىمدەرى 3,5%-عا, سۋسىندار 2,3%-عا, قاعاز ءوندىرىسى 1,1%-عا) ءوستى. اۋىل شارۋاشىلىعىنىڭ جالپى ءونىمى 2,3% وسىممەن 917,8 ملرد تەڭگەگە جەتتى.
اۋىل شارۋاشىلىعى داقىلدارىنىڭ ەگىستىك القاپتارى 6,9 مىڭ گەكتارعا ۇلعايىپ, 968,5 مىڭ گا قۇرادى. مال باسى 5,1%-عا ارتتى, ەت جانە ءسۇت ءوندىرىسى تيىسىنشە 2,2%-عا جانە 3,2%-عا ءوستى. نەگىزگى كاپيتالعا سالىنعان ينۆەستيتسيالار 4%-عا 680,7 ملرد تەڭگەگە دەيىن ءوستى. قۇرىلىس جۇمىستارىنىڭ كولەمى 310,2 ملرد تەڭگەنى قۇرادى (+6,8%), 957 مىڭ شارشى مەتردەن استام تۇرعىن ءۇي پايدالانۋعا بەرىلدى (+6,9%).
بۇگىنگى تاڭدا وبلىستىڭ ينۆەستيتسيالىق پورتفەلىنە 44 مىڭنان استام جاڭا جۇمىس ورىندارىن قۇرا وتىرىپ, 5,4 ترلن تەڭگەگە 546 جوبا كىرەدى. بيىل 3 مىڭنان استام جاڭا جۇمىس ورنىن اشا وتىرىپ, 118 ملرد تەڭگەگە 62 جوبانى ىسكە اسىرۋ جوسپارلانۋدا.
الماتى وبلىسىنىڭ ىلە اۋدانىندا جالپى قۋاتى جىلىنا 220 مىڭ توننا بولاتىن ەكى قوقىس وڭدەۋ زاۋىتىنىڭ قۇرىلىسى باستالادى. 2020 جىلى تۋريزم سالاسىنداعى نەگىزگى كاپيتالعا سالىنعان ينۆەستيتسيالار 21 ملرد تەڭگەنى قۇرادى, بۇل رەسپۋبليكالىق كولەمنىڭ 14,5%-ىن قۇرايدى. بيىل وبلىستا 685 كم تۋريستىك مارشرۋت پەن سوقپاقتاردى اباتتاندىرۋ, 2,6 ملرد تەڭگە سوماسىنا تۋريستەردى ورنالاستىراتىن 18 ورىندى پايدالانۋعا بەرۋ جوسپارلانعان.
«الماتى وبلىسى ەكونوميكاسىنىڭ نەگىزگى سەكتورلارىندا وڭ دامۋ ديناميكاسى ساقتالدى. ءوڭىر اوك, كولىك جانە لوگيستيكا, تۋريزم جانە ونەركاسىپ سالالارىندا ەلەۋلى الەۋەتكە يە. وبلىس الماتى قالاسىنىڭ ازىق-ت ۇلىك بەلدەۋى بولىپ سانالادى. جاڭا جوبالارعا سالىناتىن ينۆەستيتسيالار كولەمىن ارتتىرۋ ارقىلى الماتى وبلىسىن ودان ءارى دامىتۋعا ەداۋىر سەرپىن بەرۋ قاجەت», دەدى ا. مامين.
ۇكىمەت باسشىسى الماتى وبلىسىن دامىتۋدىڭ جوسپارلانعان بارلىق جوبالارىن ۋاقىتىلى ءارى ساپالى جۇزەگە اسىرۋدى تاپسىردى.