قىتايدىڭ كونتينەنتتىك بولىگىندە ءبىر تاۋلىك ىشىندە بىردە-ءبىر جۇقتىرۋ جانە بىردە-ءبىر ءولىم جاعدايى تىركەلمەگەن.
قحر دەنساۋلىق ساقتاۋ ىستەرى جونىندەگى مەملەكەتتىك كوميتەتىنىڭ مالىمەتىنشە, شەتەلدەن اكەلىنگەن تەك 10 عانا جاڭا جۇقتىرۋ جاعدايى تىركەلگەن.
ەۋروكوميسسيا ەۋرووداق اۋماعىندا وندىرىلەتىن پرەپارات دوزالارىن ەكسپورتتاۋعا تىيىم سالۋدى ەنگىزۋدى جوسپارلاپ وتىر. باستى سەبەپ ەو ەلدەرىندە كوروناۆيرۋسقا قارسى ۆاكتسينانىڭ جەتىسپەۋشىگى جانە AstraZeneca بريتاندىق-شۆەدتىك ۆاكتسينا ءوندىرۋشىسىنىڭ جەتكىزىلىمىنە قاتىستى ماسەلەلەر بولىپ وتىر.
برازيليا, ءبىر كۇندە 3 مىڭنان استام ادام كوروناۆيرۋستان قايتىس بولۋ سەبەبىنەن, اقش-تان كەيىنگى الەمدەگى ەكىنشى ەل اتاندى. ەلدىڭ دەنساۋلىق ساقتاۋ مينيسترلىگىنىڭ مالىمەتىنشە, وتكەن 24 ساعات ىشىندە 3 251 ادام قايتىس بولىپ, كوروناۆيرۋستى جۇقتىرۋدىڭ 82 493 جاڭا جاعدايى انىقتالدى. COVID-19 پاتسيەنتتەرىنىڭ كوپ بولۋىنا بايلانىستى ەلدىڭ 26 شتاتىنىڭ 24-ىندە جانە ەل استاناسىنىنداعى اۋرۋحانالار ارتىق جۇكتەمەمەن جۇمىس ىستەۋدە.
ۇلىبريتانيادا العاشقى لوكداۋن باستالعاننان بەرگى ءبىر جىل ىشىندە كوروناۆيرۋستىق ينفەكتسيادان 126 000-نان استام ادام قايتىس بولعان. ۇلىبريتانيا پارلامەنتى پاندەميا قۇرباندارىن ءبىر مينۋت ۇنسىزدىكپەن ەسكە الدى. سونداي-اق, ءبىر مينۋتتىق ۇنسىزدىك بۇكىل ەلدەگى اۋرۋحانالارى مەن باسقا دا مەكەمەلەردە ءوتتى. ەسكە الۋ بەلگىسى رەتىندە تۇرعىندار تاراپىنان ۇيلەرىنىڭ ەسىك الدارىندا كەشكە تامان شامدار مەن مايشامداردى جاققان. "لوندون كوزى" شولۋ دوڭگەلەگى, ليۆەرپۋلدەگى Liver Building جانە اتتاس جاعالاۋ ماڭىنداعى قالادا ورنالاسقان بلەكپۋل مۇناراسى سارى تۇسپەن جارىقتاندىرىلعان.
گەرمانيا ۇكىمەتى الداعى ايلاردا ەلدە COVID-19 ۆاكتسينالارىنىڭ ءوندىرىسى ەداۋىر ارتىرۋعا نيەتتەنىپ وتىر. ۇكىمەتتىڭ حالىقتى ۆاكتسيناتسيالاۋ جونىندەگى ۋاكىلى كريستوف كرۋپپ مامىر ايىندا اپتاسىنا شامامەن 6 ميلليون دوزا ۆاكتسينا شىعارۋعا بولاتىندىعىن ايتتى. كرۋپپ بۇل كورسەتكىشتى ارتتىرعان جاعدايدا ۆاكتسيناتسيا تەك ارنايى ورتالىقتاردا عانا ەمەس, وتباسىلىق دارىگەرلەردەن دە الۋعا بولاتىندىعىن جوققا شىعارمادى.
COVID-19 اۋرۋىنىڭ تەز وسىمىنە بايلانىستى يەمەندە توتەنشە جاعداي رەجيمى ەنگىزىلدى. ەلدە تەك اۋىر بەلگىلەرى بار ناۋقاستار عانا كوروناۆيرۋسقا تەكسەرىلەتىندىگىنە قاراماستان, اقپان ايىنان باستاپ COVID-19 راستالعان جاعدايلاردىڭ سانى ەداۋىر ءوسىپ وتىر. سوڭعى تاۋلىكتە ىندەتتىڭ 98 راستالعان جانە 168 راستالماعان جاعدايى تىركەلدى.