الماتى وبلىسىندا كوروناۆيرۋسقا قارسى ەكپە سالۋ جالعاسىپ جاتىر. وڭىرگە رەسەيلىك «سپۋتنيك V» ۆاكتسيناسىنىڭ العاشقى لەگى كەلىپ, ەرىكتىلەر مەن مىندەتتى ەكپە الۋشىلار ءالى دە ەگىلۋدە. جالپى ەكپەنى سالۋدىڭ العاشقى كەزەڭىندە 1450 ادام قامتىلماق, دەپ حابارلايدى Egemen.kz.
- وبلىستا كوروناۆيرۋس ىندەتىنە قارسى ۆاكتسينا سالۋ باستالدى. «سپۋتنيك V» ۆاكتسيناسىنىڭ 1450 دوزاسى ايماقتاعى ءتورت ەمدەۋ مەكەمەسىنە تاراتىلدى. العاشقى كۇنى ۆاكتسينا 40 ادامعا سالىندى. ولاردىڭ جاعدايى دارىگەردىڭ قاداعالاۋىندا. جالپى, ەكپە سالدىرعاننان كەيىن دەنە قىزۋى كوتەرىلۋى مۇمكىن. ەگەر تەمپەراتۋرا 37 گرادۋسقا جەتسە, پاراتسەتامول نەمەسە «يبۋپروفەن» ءدارىسىن ءىشۋ كەرەك. ال دەنە قىزۋى 39 گرادۋستان اسسا, دارىگەرگە جۇگىنگەن ءجون. ءبىز ەكپە سالاردان بۇرىن ادامداردىڭ دەنساۋلىعىن تولىق تەكسەرۋدەن وتكىزەمىز جانە ەكپەدەن كەيىن دە ءبىرشاما ۋاقىت ءجىتى باقىلايمىز. ازىرگە وبلىستا ەكپە سالعاننان كەيىن قانداي ءبىر تەرىس اسەر نەمەسە دارىگەردىڭ كومەگىنە جۇگىنۋ تىركەلگەن جوق. تاعى ءبىر بايقاعانىمىز, ادامداردا ەكپە الۋعا دەيىن قورقىنىش ۇدەپ, قان قىسىمىنىڭ اۋىتقۋى بولىپ جاتتى. ارينە, بۇعان دا تۇسىنىستىكپەن قاراۋىمىز كەرەك. ويتكەنى, كوروناۆيرۋسقا قارسى ەكپە الەم بويىنشا تۇڭعىش رەت قولدانىسقا ەندى, تۇرعىنداردىڭ كوڭىلىندە كۇدىك تە, الاڭ دا بولۋى زاڭدى, - دەيدى وبلىستىق دەنساۋلىق ساقتاۋ باسقارماسىنىڭ باسشىسى ومىرزاق نيازبەكوۆ.
قازىر وبلىستىڭ 4 اۋدانىندا ەگۋ جۇمىسى ءجۇرىپ جاتىر. بۇگىنگە دەيىن ايماقتاعى جۇقپالى اۋرۋلار اۋرۋحانالارى, جەدەل مەديتسينالىق جاردەم قىزمەتى, رەانيماتسيا بولىمشەلەرى, اۋرۋحانالاردىڭ قابىلداۋ بولمەلەرىنىڭ دارىگەرلەرى مەن سانيتارلىق قىزمەت ماماندارى ەگىلگەن. مىندەتتى ەكپە الاتىندار ساناتىندا 11 192 مەديتسينا قىزمەتەرى بار. سونداي-اق, وبلىستىڭ شالعاي وڭىرىندەگى تۇرعىندارعا ەكپە سالۋ ماقساتىندا 12 جىلجىمالى بريگادا ىسكە كىرىسكەن ەكەن. ۆاكتسينا سالىنعان قۇتىلاردى تاسىمالداۋ ءۇشىن سىيىمدىلىعى 253 ليتر بولاتىن 11 تەرموكونتەينەر ارنايى ساتىپ الىنىپتى. مۇنان بولەك, تۇرعىندار اراسىندا كوروناۆيرۋسقا قارسى ەكپە سالۋ جۇمىسىنىڭ تيىمدىلىگى مەن قاۋىپسىزدىگى جايىندا تۇسىندىرمە جۇمىسى ءجۇرىپ جاتىر.
- بۇعان دەيىن سانيتارلىق-ەپيدەميولوگيالىق باقىلاۋ دەپارتامەنتىنىڭ ماماندارى اۋداندارداعى مەديتسينا قىزمەتكەرلەرىنە كوروناۆيرۋس ينفەكتسياعا قارسى ۆاكتسيناتسيا الگوريتمى, ۆاكتسينالاردى ساقتاۋ, جۇرگىزىلگەن ەگۋلەردى ەسەپكە الۋ بويىنشا سەمينار وتكىزگەن بولاتىن. قازىرگە دەيىن 491 مەديتسينا قىزمەتكەرى ء دارىس تىڭداپ, 474 دارىگەر اتتەستاتتالدى, – دەيدى وبلىستىق سانيتارلىق ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسحات شاراپيەۆ.
ايتپاقشى, العاشقى كۇنى ەرىكتى تۇردە ەكپە سالدىرعاندار اراسىندا وبلىس اكىمىنىڭ ەكى ورىنباسارى مەن دەنساۋلىق ساقتاۋ باسقارماسى باسشىسىنىڭ ورىنباسارى جانە وبلىستىق سانيتارلىق ەپيدەميالىق باسقارماسى باسشىسىنىڭ ورىنباسارى بولعان ەدى. بۇگىندە ولاردىڭ جاعدايى قالىپتى, دارىگەر قىزمەتىنە جۇگىنبەگەن. لاۋازىمدى تۇلعالار ءوز قىزمەتتەرىن جالعاستىرىپ جاتىر. ماسەلەن, كوروناۆيرۋسقا ەكپەنى وبلىس بويىنشا ءبىرىنشى سالدىرعان وبلىس اكىمىنىڭ ورىنباسارى باتىرجان بايجۇمانوۆ (سۋرەتتە) جۇمىس بابى بويىنشا جيىن وتكىزىپ, ءتيىستى مىندەتىن تولىق اتقارۋدا. ول بۇگىن دە اۋدان اكىمدەرىنىڭ ونلاين ەسەپ بەرۋ جيىندارىنا قاتىسقان.
سونداي-اق, ەرىكتى تۇردە ەكپە العاندار تىزىمىندە ارىپتەستەرىمىز دە بار. العاشقى بولىپ وبلىستىق «وگني الاتاۋ» گازەتىنىڭ قىزمەتكەرى جانار مىقتىباەۆا «سپۋتنيك V» ۆاكتسيناسىن سالدىردى. ءبىز جۋرناليستكە حابارلاسىپ, جاعدايىن سۇراعان ەدىك.
- ۆاكتسينا الدىم. ءۇش كۇن بويى دارگەرلەردىڭ باقىلاۋىندا بولدىم. ەشقانداي كەرى اسەرى بايقالمادى جۇمىسىمدى ىستەپ ءجۇرمىن. ارينە, كوڭىلىمدە ىندەتتەن تۋعان ۇرەي بار-دى. مەن ونى جەڭدىم. وسى كۇدىك ادامداردىڭ ەكپە الۋىنا دا كەرى اسەر ەتىپ تۇرعانداي. جەرلەستەرىمدى ەكپە سالۋ ارقىلى ىندەتتى تولىق جەڭىپ, قالىپتى تىرشىلىككە ورالاتىن كۇننىڭ جاقىن قالعانىنا سەندىرگىم كەلەدى, - دەدى ارىپتەسىمىز.