اتىراۋ وبلىسىندا براكونەرلىكپەن اينالىسىپ, ءىستى بولعاندار كوشە تازالاپ ءجۇر, دەپ حابارلايدى Egemen.kz.
وبلىستىق قىلمىستىق-اتقارۋ جۇيەسى دەپارتامەنتى پروباتسيا قىزمەتى ءبولىمىنىڭ ينسپەكتورى جارقىناي باقتياروۆانىڭ مالىمەتىنە سۇيەنسەك, يساتاي اۋدانىنداعى جانباي اۋىلىنىڭ 14 تۇرعىنى قر قىلمىستىق كودەكستىڭ 339-بابىنىڭ 1-بولىگىمەن (وسiمدiكتەردىڭ نەمەسە جانۋارلاردىڭ سيرەك كەزدەسەتiن جانە قۇرىپ كەتۋ قاۋپi تونگەن, سونداي-اق پايدالانۋعا تىيىم سالىنعان تۇرلەرىمەن, ولاردىڭ بولىكتەرىمەن نەمەسە دەريۆاتتارىمەن زاڭسىز اينالىسۋ) سوتتالعان ەكەن.
«سوت ولاردى جازانى وتەۋ كەزىندە ىشىندە جىل سايىن ءجۇز ساعاتتان ءماجبۇرلى ەڭبەككە تارتۋمەن ءار ءتۇرلى مەرزىمگە باس بوستاندىعىن شەكتەۋگە ۇكىم شىعاردى. زاڭعا سايكەس باس بوستاندىعىن شەكتەۋگە سوتتالعان ادامنىڭ جازاسى تۇرعىلىقتى جەرى بويىنشا قوعامنان وقشاۋلاۋسىز وتەلەدى. ءماجبۇرلى ەڭبەككە تارتۋدى جەرگىلىكتى اتقارۋشى ورگاندار (اكىمدىكتەر) ۇيىمداستىرادى», دەيدى جارقىناي باقتياروۆا.
قازىر جانباي اۋىلىنىڭ 14 تۇرعىنى كۇنىنە 4 ساعات كوشە تازالايدى.