شايبالى حوككەيدەن قازاقستان كۋبوگى جولىنداعى ءتۋرنيردىڭ فينالدىق جەكپە-جەگىندە وسكەمەننىڭ «تورپەدو» كومانداسى مەن قاراعاندىلىق ۇجىم «سارىارقا» كۇش سىناستى, دەپ حابارلايدى Egemen.kz.
اسا تارتىستى وتكەن ماتچ قورىتىندىسىندا كەنشىلەر استاناسىنىڭ كومانداسى وۆەرتايمدا شىعىسقازاقستاندىق حوككەيشىلەردى 2:1 ەسەبىمەن تىزە بۇكتىرىپ, ەل كۋبوگى جۇلدەسىن جەڭىپ الدى.
«سارىارقا» ساپىنان ۆاديم زەلەنكوۆ پەن سەرگەي گولودنيۋك ءبىر-ءبىر شايبادان سوعىپ, كوماندانىڭ جەڭىسىنە سۇبەلى قوستى.
قازىرگى تاڭدا «سارىارقا» حوككەي كلۋبى قازاقستاننىڭ تۇراقتى چەمپيوناتىندا ءۇشىنشى ساتىدا تۇر. ۇجىمنىڭ قورجىنىندا 36 ويىننان كەيىن 73 ۇپايى بار. ال قاراعاندىلىق حوككەيشىلەردەن كۋبوكتىڭ فينالىندا ەسە جىبەرگەن «تورپەدو» تۋرنير كەستەسىندە 90 ۇپايمەن كوش باستاپ كەلەدى. ەكىنشى ورىندا نۇر-سۇلتان قالاسىنىڭ «Nomad» كومانداسى تۇر.