ۇلتتىق اكادەميالىق كىتاپحانادا سىبايلاس جەمقورلىققا قارسى ءىس-قيمىل اگەنتتىگى جانە مادەنيەت جانە سپورت مينيسترلىگىنىڭ ۇيىتقى بولۋىمەن «پاراسات جولى» جوباسىنىڭ تانىستىرىلىمى ءوتتى.
اگەنتتىك توراعاسى اليك شپەكباەۆ, مادەنيەت جانە سپورت ءمينيسترى اقتوتى رايىمقۇلوۆا جانە قوعام قايراتكەرلەرى مەن ءدىن وكىلدەرى قاتىسقان سالتاناتتى ءىس-شارادا ەكى مەملەكەتتىك ورگان اراسىنداعى ءوزارا ىنتىماقتاستىق تۋرالى مەموراندۋمعا قول قويىلدى.
قۇجاتتىڭ باستى كوزدەگەنى – ۇلتتىق اكادەميالىق كىتاپحانا بازاسىندا اشىلعان «پاراسات جولى» ورتالىقتارى ارقىلى پاراساتتىلىق يدەولوگياسىن ىلگەرىلەتۋ بولىپ تابىلادى. جاڭادان ىسكە قوسىلعان جوبا ادالدىق پەن پاراساتتىلىقتى, ىزگىلىك پەن دانالىقتى, ادىلدىك پەن قامقورلىقتى دارىپتەپ, سىبايلاس جەمقورلىققا قارسى مادەنيەتتىڭ ءمانىن تۇسىندىرۋگە باعىتتالعان. سونداي-اق مادەنيەت, ادەبيەت جانە رۋحانياتتى نەگىزگە الا وتىرىپ, كەلەلى اڭگىمەلەر ارقىلى قوعامدا پاراساتتىلىق يدەولوگياسىن قالىپتاستىرۋعا دا ەرەكشە كوڭىل بولىنبەكشى.
ەل استاناسىندا 8 قاڭتاردا اشىلعان «پاراسات جولى» ورتالىعىنىڭ وڭىرلىك بولىمشەلەرى قازىرگى تاڭدا قازاقستاننىڭ بارلىق وبلىستىق, قالالىق جانە اۋداندىق كىتاپحانالارىندا, الماتى جانە شىمكەنت قالالارىندا ىسكە قوسىلعان.
ەلوردالىق تاجىريبەنى ايماقتارعا تاراتۋ ماقساتىندا جۇمىستارىن باستاعان وڭىرلىك ورتالىقتار قوعام مەن وسكەلەڭ ۇرپاقتى مادەني, رۋحاني اعارتۋ جانە تاربيەلەۋ وشاقتارى بولىپ تابىلادى.
عىلىمي, شىعارماشىلىق ينتەلليگەنتسيا جانە ءدىن وكىلدەرىمەن تىزە قوسىپ, قوعامدا پاراساتتىلىق ۇعىمىن ءسىڭىرۋدى ماقسات تۇتقان «پاراسات جولى» ورتالىقتارى زيالى قاۋىم, مەملەكەتتىك جانە قوعامدىق ۇيىمدار وكىلدەرى مەن جاستار ءۇشىن اشىق ديالوگ الاڭىنا اينالعانى انىق. سەبەبى وسى الاڭدا تىكەلەي ەفير ارقىلى كوپشىلىككە جول تارتقان «جۇماداعى جۇزدەسۋ» جوباسى الەۋمەتتىك جەلى پايدالانۋشىلاردىڭ وڭ پىكىرىنە يە بولىپ وتىر.
اۋقىمدى جوباعا ءوز ۇلەستەرىن قوسۋعا نيەت تانىتقان ءىس-شاراعا قاتىسۋشىلار «پاراسات جولى» ورتالىقتارىنىڭ يگى باستامالار مەن جارقىن ىستەردىڭ ۇيىتقىسى بولاتىنىنا سەنىم ءبىلدىردى.
بانۋ ءادىلجان,
«Egemen Qazaqstan»