قايتا قالپىنا كەلتىرىلگەن ساق پاتشايىمىنىڭ اشەكەيلى كيىمىنە قاراپ, سوناۋ عاسىردا-اق مادەنيەتىمىزدىڭ دامىعاندىعىن تاعى ءبىر اڭعارۋعا بولادى. 2017 جىلى بەرەل قورعانىنان تابىلعان ساق پاتشايىمىنىڭ كيىمى رەكونسترۋكتسيالانىپ, وبلىستىق تاريحي-ولكەتانۋ مۋزەيىنە قويىلدى.
بەرەلدەگى قازبا جۇمىستارى كەزىندە قيما تاعاننىڭ ىشىنە قويىلعان استاۋ تابىتتان ايەلدىڭ مۇردەسىمەن بىرگە ابزەلدەنگەن ەكى جىلقى شىققان-دى. وبا بىرنەشە رەت تونالعانىمەن, باس كيىمنىڭ اشەكەيلەرى ساقتالعان. بۇيىمداردىڭ ىشىندە اعاشتان ويىلىپ, التىن جالاتىلعان تاۋ ەشكىلەردىڭ مۇسىندەرى, جىرتقىش قۇس ستيلىندەگى ويۋ-ورنەكتەر مەن فانتاستيكالىق پوليمورفتى قاناتتى تىرشىلىك يەلەرى, ءتۇرلى ورنەكتى پلاستينالار مەن جاپسىرمالار بار. بۇعىلاردىڭ بارىسپەن ايقاسقا تۇسكەن كورىنىستەرى بەينەلەنگەن ۇلكەن تىكبۇرىشتى پلاستينالار دا ەرەكشە كوزگە تۇسەدى.
سونداي-اق بەلگىلى ارحەولوگ زەينوللا ساماشەۆتىڭ جەتەكشىلىگىمەن جۇرگىزىلگەن بۇل قازبا جۇمىستارىندا التىنمەن قاپتالعان پىشاق, قىش قۇمىرانىڭ سىنىقتارى كەزدەسكەن.
ارحەولوگ عالىمدار ايتقانداي, تابىلعان جادىگەرلەر ب.ز. د. IV ع. سوڭى مەن III ع. باسىندا ءومىر سۇرگەن اقسۇيەك ساق ايەلىنىڭ بەينەسىن قايتا جاساۋعا مۇمكىندىك بەردى.
– قورعاننىڭ تونالىپ كەتكەنىنە قاراماستان, پاتشايىم كيىمىنىڭ ۇلگىسىن سۋرەتشى قاليوللا احمەتجان جاساپ شىقتى. كونۋس ءتارىزدى ءتاجدىڭ شىرىندىلەرىنە قاراپ, ساقتىڭ شوشاق بورىگىن جاساعان. بورىك بولعانىمەن, بۇل كادىمگى قازاقتىڭ ساۋكەلەسى سياقتى. ال تابىلعان اشەكەيلەر ارحەولوگتەردىڭ بولجامى بويىنشا باس كيىمگە جابىستىرىلعان ەكەن. بايقاساڭىزدار, ورتاڭعى ءبىر تاۋتەكەنىڭ باسى ەكى دەنەگە بەكىتىلگەن. قازبا جۇمىستارى كەزىندە بەلگىلى بولعانداي, تاۋتەكە اعاشتان ويىلىپ, بەتىنە التىن جالاتىلعان, – دەيدى مۋزەيدىڭ تاريحشى مامانى الفيا باقباەۆا.
اۋىز تولتىرىپ ايتا كەتەرلىك قۇندى دۇنيە مۋزەيدىڭ سورەسىندە ساق پاتشايىمىنىڭ ءبىر قارىس ورىلگەن شاشى مەن اڭ تەرىسىنەن تىگىلگەن توننىڭ قيقىمى ساقتاۋلى تۇر. توننىڭ قانداي اڭنىڭ تەرىسىنەن تىگىلگەندىگىن عالىمدار ءالى زەرتتەپ جاتىر.
شىعىس قازاقستان وبلىسى