شايبالى حوككەيدەن بيىلعى الەم چەمپيوناتى جوسپار بويىنشا 21 مامىر مەن 6 ماۋسىم ارالىعىندا لاتۆيا مەن بەلارۋستە ءوتۋى كەرەك ەدى. الايدا قاڭتاردا حالىقارالىق حوككەي فەدەراتسياسى (IIHF) بەلارۋستەگى قازىرگى جاعداي رەسمي ۇيىم وكىلدەرىنە, قۇرامالارعا جانە جانكۇيەرلەرگە قاۋىپتى دەپ ەسەپتەپ, الەم چەمپيوناتىن وتكىزۋ قۇقىنان ايىرعان بولاتىن.
مىنە, كۇنى كەشە IIHF وسى جىلعى جاھاندىق دودا تولىعىمەن لاتۆيادا وتەتىنىن رەسمي مالىمدەدى. ءسويتىپ, الداعى ۋاقىتتا حوككەيدەن الەم چەمپيوناتىنداعى ماتچتاردىڭ بارلىعىن ريگا قالاسى قابىلدايدى. سونىمەن قاتار ماتچتاردىڭ باسىم بولىگى دە لاتۆيانىڭ باس شاھارىندا ورنالاسقان «ارەنا ريگادا» ۇيىمداستىرىلادى دەپ جوسپارلانۋدا.
اتاپ ايتار بولساق, مۇندا ۆ توبىنداعى بارلىق ويىن, ەكى شيرەك فينالدىق ماتچ, جارتىلاي فينالدىق كەزدەسۋلەر, ءۇشىنشى ورىن ءۇشىن كەزدەسۋ جانە فينالدىق ماتچ وتكىزىلەدى. ال قالعان كەزدەسۋلەر التى مىڭ ادامعا ارنالعان وليمپيادالىق سپورتتىق ورتالىقتا ۇيىمداستىرىلادى.
«IIHF كەڭەسى سەيسەنبى كۇنى وتكەن وتىرىستا الەم چەمپيوناتىن وتكىزۋدىڭ ءتۇرلى نۇسقالارىن قاراستىردى. ناقتىلاي تۇسەر بولسام, بيىلعى بىرىنشىلىكتى لاتۆيادا, لاتۆيا مەن دانيادا جانە لاتۆيا مەن سلوۆاكيادا وتكىزۋ ماسەلەلەرى تالقىلاندى. ناتيجەسىندە, كەڭەس مۇشەلەرى الەمدىك دودانى ءبىر مەملەكەتتە وتكىزگەن دۇرىس دەگەن توقتامعا كەلدى», دەيدى IIHF پرەزيدەنتى رەنە فازەل.
ءبىر ايتا كەتەرلىگى, لاتۆيا شايبالى حوككەيدەن الەمدىك دودانى وسىمەن ەكىنشى مارتە قابىلداماق. العاش رەت مۇندا 2006 جىلعى الەم بىرىنشىلىگى وتكىزىلگەن ەدى.
قازاقستان قۇراماسى 2019 جىلى جوعارى ديۆيزيونعا ورالعان بولاتىن, سوندىقتان بيىلعى الەم چەمپيوناتىندا باق سىنايدى. جەرلەستەرىمىز كانادا, فينليانديا, اقش, گەرمانيا, لاتۆيا, نورۆەگيا, يتاليا قۇرامالارىمەن B توبىندا سىنعا تۇسەدى.