2009 جىلى قۇرىلىسى باستالعان وقۋ ورنى ءالى قاڭىراپ بوس تۇر. پاۆلودار وبلىسى ەكىباستۇز قالاسىنداعى وتىن-ەنەرگەتيكالىق كەشەن ماماندارىن وقىتۋعا ارنالعان نىسان وسىدان ءبىر جىلدان استام ۋاقىت بۇرىن سالتاناتتى تۇردە اشىلۋ ءراسىمى وتكەنمەن, بۇل وقۋ ورنى بىردە-ءبىر ستۋدەنتتى قابىلداعان جوق, دەپ حابارلايدى Egemen.kz.بۇل تۋرالى inbusiness.kz سايتى مالىمدەدى.
2006 جىلى قر ءبىلىم جانە عىلىم مينيسترلىگى ەڭبەك نارىعىنا ەنەرگەتيكا, كومىر ءوندىرىسى ماماندارى اۋاداي قاجەت ەكەنىن العا تارتىپ, ەكىباستۇز قالاسىندا ءدال وسى سالا قىزمەتكەرلەرىن دايىندايتىن ورتالىق سالۋدى ۇيعاردى. ءسويتىپ, قازىنادان 4,5 ملرد تەڭگە ءبولىنىپ, 2009 جىلى اتالمىش وقۋ ورنىنىڭ قۇرىلىسى باستالدى. بۇل عيمارات 2011 جىلى پايدالانۋعا بەرىلىپ, جىلىنا 700 تۇلەكتىڭ قولىنا ديپلوم ۇستاتۋعا ءتيىس ەدى. ارادا 10 جىل ۋاقىت وتكەنمەن, ءبىلىم ورداسىنان تۇلەپ ۇشقان ەشكىم جوق. سەبەبى قر ءبىلىم جانە عىلىم مينيسترلىگى بەكىتكەن جوبادا درەناجدىق جۇيە بولماي شىقتى.
سونىڭ سالدارىنان عيمارات ەل يگىلىگىنە بەرىلمەي جاتىپ-اق سۋعا «باتتى». 13 وقۋ كورپۋسى, 480 ورىندىق جاتاقحانا, 100 كەلۋشىگە ارنالعان قوناقۇي, كىتاپحانا, اسحانا, ءماجىلىس پەن سپورت زالدارى – بارلىعى تۇككە جارامسىز بولىپ قالدى. 2014 جىلى شاتىردىڭ جارتىسى ۇشىپ كەتىپ, توبەسى وپىرىلىپ ءتۇستى. 2015 جىلى مينيسترلىك اۋەلدە دۇرىس جوسپارلانباعان «ساقالدى» قۇرىلىستى اكىمدىكتىڭ قاراماعىنا وتكىزبەك بولدى. بىراق سول تۇستا پاۆلودار وبلىسىن باسقارعان قانات بوزىمباەۆ جەرگىلىكتى بيۋدجەتتە عيماراتتى قالپىنا كەلتىرەر قارجى جوق ەكەنىن العا تارتىپ, بالانسقا قابىلداۋدان باس تارتتى. 2016 جىلى بىرنەشە اي بويى جالاقى الماعان كۇزەتشىلەردىڭ ءتوزىمى تاۋسىلىپ, جۇمىستان كەتكەن.
سودان سوڭ وقۋ كورپۋستارى ەسىك, تەرەزەلەرسىز, ءتىپتى سانتەحنيكالىق جابدىقتارسىز قالدى. 2017 جىلى ءبىلىم جانە عىلىم مينيسترلىگى «بۇل جوبا كوپ قارجىنى قاجەت ەتەدى, ونىڭ كەرەگى جوق» دەگەن مالىمدەمە جاساپ, بالەن جىل بويى بوس تۇرعان عيماراتتى ايتەۋىر اكىمدىككە وتكىزىپ تىندى. بيۋدجەتتەن تاعى 4 ملرد تەڭگە ءبولىنىپ, درەناجدىق جۇيە سالىنىپ, كورپۋستار قالپىنا كەلتىرىلىپ, 2019 جىلدىڭ جەلتوسقان ايىندا سالتاناتتى تۇردە اشىلدى. سول كەزدە وبلىس اكىمى بولات باقاۋوۆ بۇل ورتالىق ERG كومپانياسىنىڭ سەنىمدى باسقارۋىنا بەرىلىپ, وعان قاراستى كاسىپورىنداردىڭ ماماندارىن دايىندايتىنىن ايتقان ەدى. بىراق بۇل جوسپار دا جۇزەگە اسپايدى. ايتەۋىر وتكەن جىلدىڭ كوكتەمىندە ءبىر كادەگە جارادى.
ەكىباستۇز قالاسىندا كوروناۆيرۋستىق ينفەكتسياعا شالدىققاندار قاتارى كۇرت كوبەيگەن تۇستا مۇندا پروۆيزورلىق ورتالىق ۇيىمداستىرىلدى. قازىر تاعى دا بوس تۇر. وبلىستىق ءبىلىم بەرۋ باسقارماسىنىڭ وكىلدەرى قاجەت بولعان جاعدايدا وقۋ ورتالىعىنىڭ ەمدەۋ ورنىنا اينالاتىنىن ايتتى. سونداي-اق, ونى تورايعىروۆ ۋنيۆەرسيتەتىنىڭ سەنىمدى باسقارۋىنا بەرۋ ماسەلەسى قاراستىرىلىپ جاتقان كورىنەدى.