وڭىردە دەندەپ كىرگەن ىندەتتىڭ بەتى قايتا ما دەسەك, قايتا كوبەيىپ بارادى. سوڭعى مالىمەت بويىنشا شىعىس قازاقستان وبلىسىندا كوروناۆيرۋس ينفەكتسياسىنىڭ 81 جاعدايى تىركەلگەن.
31 قاڭتار كۇنى «سپۋتنيك V» ۆاكتسيناسىنىڭ ءبىراز بولىگى شىعىس قازاقستان وبلىسىنا دا جەتىپ, اقپاننىڭ العاشقى كۇنىنەن-اق ەگۋ باستالىپ كەتتى. ەكپە الدىمەن دەنساۋلىق ساقتاۋ سالاسىنىڭ ماماندارىنا سالىندى.
– ەڭ ءبىرىنشى ينفەكتسيالىق اۋرۋحانالارداعى دارىگەرلەرگە, مەدبيكەلەرگە, تازالىقشىلارعا قويىلادى. ەكىنشى كەزەكتە جانساقتاۋ بولىمىندە ەڭبەك ەتىپ جۇرگەن مەديتسينا قىزمەتكەرلەرى الادى. ءۇشىنشى قابىلداۋ بولىمدەرىندەگى اق حالاتتىلار ەگىلەدى. ونىمەن توقتامايدى. ۆاكتسينا اقپاننىڭ 15-نەن كەيىن تاعى كەلەدى. ساۋىردە 75 مىڭ دوزا كولەمىندە وتاندىق QazCoVac-P ۆاكتسيناسى كەلەدى, – دەيدى وبلىستىق دەنساۋلىق ساقتاۋ باسقارماسىنىڭ باسشىسى جايىق جۇماحانوۆ.
كوروناۆيرۋس ينفەكتسياسىنا قارسى ۆاكتسينانى وسكەمەندە العاشقىلاردىڭ ءبىرى بولىپ وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ وكىلى قانات تۇرديەۆ جانە «انا مەن بالا» ورتالىعىنىڭ باس دارىگەرى ەرمەك وماربەكوۆ, سەمەيدە وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى دۋمان بەرىك ۇلى, پەريناتالدىق ورتالىقتىڭ باس دارىگەرى ارقات دايىربەكوۆ الدى.
ەرىكتى تۇردە ەكپە العان دۋمان بەرىك ۇلىنىڭ ايتۋىنشا, ەشقانداي تەرىس اسەرى سەزىلمەگەن. ايتا كەتسەك, ون سەگىز جاسقا تولماعان بالالارعا, جۇكتى ايەلدەرگە, بالا ەمىزەتىن انالارعا ەكپە جاسالمايدى. سونداي-اق بۇل ەكپەگە اللەرگيالىق رەاكتسياسى بار ازاماتتار دا ەگىلمەيدى.
شىعىس قازاقستان وبلىسىنا جەتكىزىلگەن 1 300 دوزانىڭ 650-ءى وسكەمەندە قالسا, 650-ءى سەمەيگە جىبەرىلدى. ۆاكتسينا سانى مۇنىمەن شەكتەلمەي, اي سايىن 500 مىڭ دوزاعا كوبەيىپ وتىرادى. ەسكە سالا كەتسەك, ەكپە الۋ تەگىن جۇرگىزىلەدى. الدىمەن ۆاكتسينا الۋعا كەلگەن ءار ازامات دارىگەردىڭ تەكسەرىسىنەن وتەدى. ۆاكتسينالاۋ ەكى كەزەڭگە بولىنگەن. ءبىرىنشى كومپونەنتتى ەنگىزگەننەن كەيىن اراعا 21 كۇن سالىپ, ەكىنشىسى سالىنادى. ايتا كەتەرلىگى, ەگۋ ەرىكتى تۇردە جۇرگىزىلەدى. اركىمنىڭ دەنساۋلىعى – ءوز قولىندا.
شىعىس قازاقستان وبلىسى